ಪಾಕ್‌ನಲ್ಲಿ ಹಿಂದೂ ಉದ್ಯಮಿಯ ಅಪಹರಣ

ಕರಾಚಿ: ಪಾಕಿಸ್ತಾನದಲ್ಲಿ ಅಲ್ಪಸಂಖ್ಯಾತ ಹಿಂದೂಗಳ ಮೇಲಿನ ಅಪರಾಧ ಕೃತ್ಯಗಳು ದಿನೇ ದಿನೆ ಹೆಚ್ಚುತ್ತಿವೆ. ಪಾಕಿಸ್ತಾನದ ಸಿಂಧ್‌ ಪ್ರಾಂತ್ಯದ ಕಾಶ್ಮೋರ್‌ ಜಿಲ್ಲೆಯಲ್ಲಿ ಹಿಂದೂ ಉದ್ಯಮಿಯನ್ನು ಅಪಹರಿಸಿ, ಹಿಂಸೆ ನೀಡಲಾಗಿದೆ. ಬಿಡುಗಡೆಗೆ ಅಪಹರಣಕಾರರು 5 ಕೋಟಿ ಪಾಕಿಸ್ತಾನಿ ರೂ.ಗೆ ಬೇಡಿಕೆ ಇಟ್ಟಿದ್ದಾರೆ.

ಜು.20ರಂದು ಉದ್ಯಮಿ ಜಗದೀಶ್‌ ಕುಮಾರ್‌ ಮುಕ್ಕಿ ಅವರನ್ನು ಅಪರಿತರು ಅಪಹರಿಸಿದ್ದಾರೆ. ಅಲ್ಲದೇ ಅವರ ಕುತ್ತಿಗೆ, ಕೈ-ಕಾಲುಗಳಿಗೆ ಸರಳುಗಳನ್ನು ಹಾಕಿ, ಹಿಗ್ಗಾ-ಮುಗ್ಗಾ ಥಳಿಸಿರುವ ಅಪಹರಣಕಾರರು, ಅವರ ತಲೆಗೆ ಬಂದೂಕು ಇಟ್ಟು, ಈ ಕುರಿತ ವಿಡಿಯೋ ಅನ್ನು ಜಗದೀಶ್‌ ಅವರ ಪುತ್ರನಿಗೆ ಕಳುಹಿಸಿದ್ದಾರೆ. ಕೂಡಲೇ ಹಣವನ್ನು ನೀಡುವಂತೆ ಬೆದರಿಕೆ ಹಾಕಿದ್ದಾರೆ.

ಈ ಸಂಬಂಧ ಕಾಶ್ಮೋರ್‌ ಪೊಲೀಸ್‌ ಠಾಣೆಯಲ್ಲಿ ಜಗದೀಶ್‌ ಕುಟುಂಬದವರು ದೂರು ದಾಖಲಿಸಿದ್ದಾರೆ. ಅಲ್ಲದೇ ಕರಾಚಿ ಪೊಲೀಸ್‌ ಪ್ರಧಾನ ಕಚೇರಿಯಲ್ಲಿ ಕೂಡ ದೂರು ದಾಖಲಾಗಿದೆ. ಇತ್ತೀಚಿನ ವರ್ಷಗಳಲ್ಲಿ ಪಾಕಿಸ್ತಾನದಲ್ಲಿ ಹಿಂದೂ, ಸಿಖ್‌ ಮತ್ತು ಕ್ರೈಸ್ಥರನ್ನು ಗುರಿಯಾಸಿಕೊಂಡು ದಾಳಿಗಳು, ಅಪರಾಧಗಳು ಹೆಚ್ಚುತ್ತಿವೆ.