ಜರ್ಮನ್‌ ಓಪನ್‌: ಶ್ರೀಕಾಂತ್‌ ಸವಾಲು ಅಂತ್ಯ

ನವದೆಹಲಿ: ಭಾರತೀಯ ಬ್ಯಾಡ್ಮಿಂಟನ್‌ ಆಟಗಾರ ಕೆ.ಶ್ರೀಕಾಂತ್‌ ಜರ್ಮನ್‌ ಓಪನ್‌ ಗ್ರಾÂನ್‌ ಪ್ರಿ ಗೋಲ್ಡ್‌ ಟೂರ್ನಿಯಲ್ಲಿ ಚೀನಾದ ಚೆನ್‌ ಲಾಂಗ್‌ ವಿರುದ್ಧ ಹೋರಾಟದ ಸೋಲು ಕಂಡಿದ್ದಾರೆ. ಹೀಗಾಗಿ ಕೂಟದಲ್ಲಿ ಭಾರತದ ಸವಾಲು ಅಂತ್ಯವಾಗಿದೆ.

ಪುರುಷರ ಪ್ರೀಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ವಿಶ್ವ ನಂ.12 ಶ್ರೇಯಾಂಕಿತ ಶ್ರೀಕಾಂತ್‌ 19-21, 20-22 ರಿಂದ ರಿಯೋ ಒಲಿಂಪಿಕ್ಸ್‌ ಚಿನ್ನದ ಪದಕ ವಿಜೇತ ಚೆನ್‌ ಲಾಂಗ್‌ ವಿರುದ್ಧ ಸೋತರು. 47 ನಿಮಿಷಗಳ ಕಾಲ ನಡೆದ ಹೋರಾಟದಲ್ಲಿ ಭಾರತೀಯ ಆಟಗಾರ ನೇರ ಸೆಟ್‌ನಲ್ಲಿಯೇ ಪರಾಭವಗೊಂಡರು. 

ಮೊದಲ ಸೆಟ್‌ನ ಆರಂಭದಲ್ಲಿ ಶ್ರೀಕಾಂತ್‌ 12-6 ರಿಂದ ಭಾರೀ ಮುನ್ನಡೆಯಲ್ಲಿದ್ದರು. ಆದರೆ ನಂತರ ಅನುಭವಿ ಚೀನಿ ಆಟಗಾರ ಅಂಕಗಳನ್ನು ಏರಿಸಿಕೊಂಡು ಸೆಟ್‌ ವಶಪಡಿಸಿಕೊಂಡರು. ಎರಡನೇ ಸೆಟ್‌ನಲ್ಲಿ ಕೂಡ ಶ್ರೀಕಾಂತ್‌ ಮೊದಲಿಗೆ 16-12 ರಲ್ಲಿ ಮುನ್ನಡೆಯಲ್ಲಿದ್ದರು. ಆದರೆ ನಂತರ ಹಿನ್ನಡೆ ಅನುಭವಿಸಿ ಸೆಟ್‌ ಕಳೆದುಕೊಂಡರು. ಶ್ರೀಕಾಂತ್‌ ಸೋಲುಂಡರೂ ಕೂಡ ಒಲಿಂಪಿಕ್‌ ಚಾಂಪಿಯನ್‌ಗೆ ಭರ್ಜರಿ ಫೈಟ್‌ ನೀಡಿರುವುದು ಪ್ರಶಂಸನೀಯ. ಉಳಿದಂತೆ ಭಾರತೀಯ ಆಟಗಾರರಾದ ಸುಭಾಂಕರ್‌ ಮತ್ತು ಹರ್ಷಿತ್‌ ಅಗರ್ವಾಲ್‌ ಎರಡನೇ ಸುತ್ತಿನಲ್ಲಿಯೇ ಸೋಲುಂಡಿದ್ದಾರೆ.