ಕನ್ನಡದ ಮೊದಲ ಚಿತ್ರ; 5 ದಿನದಲ್ಲಿ KGF 100 ಕೋಟಿ ರೂ. ಗಳಿಕೆ

ಬೆಂಗಳೂರು: ಪ್ರಶಾಂತ್ ನೀಲ್ ನಿರ್ದೇಶನದ, ಯಶ್ ಅಭಿನಯದ ಕೆಜಿಎಫ್ ಸಿನಿಮಾ ಬಿಡುಗಡೆಯಾಗಿ ಐದು ಕಳೆದರೂ ಗಲ್ಲಾಪೆಟ್ಟಿಗೆಯಲ್ಲಿ ಭರ್ಜರಿ ಸದ್ದು ಮಾಡಿದ್ದು, ವಿಶ್ವಾದ್ಯಂತ ನೂರು ಕೋಟಿ ರೂಪಾಯಿ ಗಳಿಕೆ ಕಂಡಿದೆ. ಈ ಮೂಲಕ ಕಡಿಮೆ ಅವಧಿಯಲ್ಲೇ ಅತ್ಯಧಿಕ ಗಳಿಕೆ ಕಂಡ ಕನ್ನಡದ ಮೊದಲ ಚಿತ್ರ ಎಂಬ ಹೆಗ್ಗಳಿಕೆ ಜೊತೆಗೆ ದಾಖಲೆ ಬರೆದಿದೆ.

ಯಶ್ ಹಾಗೂ ಶ್ರೀನಿಧಿ ಶೆಟ್ಟಿ ಅಭಿನಯದ ಕೆಜಿಎಫ್ ಸಿನಿಮಾ ಬಿಡುಗಡೆಗೊಂಡ ಬಳಿಕ ಹಿಂದಿ ಅವತರಣಿಕೆ ಕೂಡಾ ಗಲ್ಲಾಪೆಟ್ಟಿಗೆಯ ಕಲೆಕ್ಷನ್ 4.35 ಕೋಟಿ ರೂಪಾಯಿಗೇರಿದ್ದು, ಒಟ್ಟಾರೆ ಐದು ದಿನಗಳಲ್ಲಿ 16.54 ಕೋಟಿ ರೂ. ಬಾಚಿಕೊಂಡಿದೆ ಬಾಲಿವುಡ್ ಸಿನಿಮಾ ವಿಶ್ಲೇಷಕ ತರಣ್ ಆದರ್ಶ್ ಕೆಜಿಎಫ್ ಗಳಿಕೆಯ ಮಾಹಿತಿಯನ್ನು ಟ್ವೀಟ್ ಮೂಲಕ ಬಹಿರಂಗಪಡಿಸಿದ್ದಾರೆ.

ಅಷ್ಟೇ ಅಲ್ಲ ಕರ್ನಾಟಕದಲ್ಲಿಯೇ ಕೆಜಿಎಫ್ ಬರೋಬ್ಬರಿ 60 ಕೋಟಿ ರೂ. ಗಳಿಸಿ ದಾಖಲೆ ಬರೆದಿದೆ. ವಿದೇಶದಲ್ಲಿಯೂ ಕೆಜಿಎಫ್ ಹವಾ ಭರ್ಜರಿಯಾಗಿಯೇ ಇದ್ದು (4 ಲಕ್ಷ ಯುಎಸ್ ಡಾಲರ್ ಗಳಿಕೆ) ಈವರೆಗೂ ಕನ್ನಡದ ಯಾವ ಚಿತ್ರವೂ ಇಂತಹ ಗಳಿಕೆ ಕಂಡಿಲ್ಲ ಎಂದು ವರದಿ ವಿವರಿಸಿದೆ.

ಪ್ರಶಾಂತ್ ನೀಲ್ ನಿರ್ದೇಶನದ ಕೆಜಿಎಫ್ ದೇಶದ ಉಳಿದ ಭಾಗಗಳಲ್ಲಿಯೂ ಹುಬ್ಬೇರಿಸುವಂತಹ ಗಳಿಕೆ ಕಾಣುತ್ತಿದ್ದು, ಈವರೆಗೆ 101.9 ಕೋಟಿ ರೂಪಾಯಿ ಗಳಿಸಿರುವುದಾಗಿ ವರದಿ ತಿಳಿಸಿದೆ.