Kasaragodu: ನಾಪತ್ತೆಯಾಗಿದ್ದ ಯುವಜೋಡಿ ಪತ್ತೆ

ಕಾಸರಗೋಡು: ಇಡುಕ್ಕಿಯಿಂದ ಮೂರು ದಿನಗಳ ಹಿಂದೆ ನಾಪತ್ತೆಯಾಗಿದ್ದ ಅಪ್ರಾಪ್ತ ವಯಸ್ಸಿನ ಬಾಲಕಿ ಮತ್ತು ಆಕೆಯ ಪ್ರಿಯತಮನನ್ನು ಕಾಂಞಂಗಾಡ್‌ನಿಂದ ಪೊಲೀಸರು ವಶಕ್ಕೆ ತೆಗೆದುಕೊಂಡಿದ್ದಾರೆ.

16ರ ಹರೆಯದ ಪ್ಲಸ್‌ ಟು ವಿದ್ಯಾರ್ಥಿನಿ ಮತ್ತು ಹಾಗೂ 18ರ ಹರೆಯದ ಯುವಕ ಪೊಲೀಸ್‌ ವಶವಾದವರು. ಜತೆಗಿದ್ದ ತಮಿಳುನಾಡು ತಿರುಪ್ಪೂರ್‌ ನಿವಾಸಿಯನ್ನು ತನಿಖೆಗೊಳಪಡಿಸಿ ಬಿಡಲಾಯಿತು. ಅವರು ನಾಪತ್ತೆಯಾಗಿರುವ ಬಗ್ಗೆ ಶಾಂತಂಪಾರ ಮತ್ತು ದೇವಿಕುಳಂ ಪೊಲೀಸ್‌ ಠಾಣೆಗಳಲ್ಲಿ ಕೇಸು ದಾಖಲಿಸಲಾಗಿತ್ತು.

ಸೈಬರ್‌ ಸೆಲ್‌ನ ನೆರವಿನೊಂದಿಗೆ ತನಿಖೆ ನಡೆಸಿದರೂ ಯಾವುದೇ ಮಾಹಿತಿ ಲಭಿಸಿರಲಿಲ್ಲ. ಇದೇ ವೇಳೆ ಈ ಇಬ್ಬರು ಮತ್ತು ಇನ್ನೋರ್ವನನ್ನು ಟಿಕೆಟ್‌ ಇಲ್ಲವೆಂಬ ಕಾರಣಕ್ಕೆ ರೈಲಿನ ಟಿಕೆಟ್‌ ಪರಿವೀಕ್ಷಕರು ಕಾಂಞಂಗಾಡ್‌ನ‌ಲ್ಲಿ ಇಳಿಸಿ ಪೊಲೀಸರಿಗೊಪ್ಪಿಸಿದರು. ವಿಚಾರಣೆ ಮಾಡಿದಾಗ ಇಡುಕ್ಕಿಯಿಂದ ನಾಪತ್ತೆಯಾದವರು ಎಂಬ ಮಾಹಿತಿ ಲಭಿಸಿತು. ವಿದ್ಯಾರ್ಥಿನಿ ಮತ್ತು ಯುವಕನ ಮನೆಯವರಿಗೆ ಮಾಹಿತಿ ರವಾನಿಸಿ ಠಾಣೆಗೆ ಕರೆಸಲಾಗಿದೆ.