Kasaragod;ಬೇಕಲ್‌ ಬೀಚ್‌ ನವೀಕರಣಕ್ಕೆ 5 ಕೋಟಿ ರೂ. ಯೋಜನೆ

ಕಾಸರಗೋಡು: ಬೇಕಲ್‌ ಬೀಚ್‌ ಪಾರ್ಕ್‌ ನೂತನ ಮೆನೇಜ್‌ಮೆಂಟ್‌ ವಹಿಸಿಕೊಂಡ ಬಳಿಕ ಪ್ರವಾಸಿಗರು ಸಾಕಷ್ಟು ನಿರೀಕ್ಷೆಯಲ್ಲಿದ್ದಾರೆ.

ಕಳೆದ ಹತ್ತು ವರ್ಷದಿಂದ ಬಿ.ಆರ್‌.ಡಿ.ಸಿ. ಯಿಂದ ಗುತ್ತಿಗೆ ಆಧಾರದಲ್ಲಿ ವಹಿಸಿಕೊಂಡು ನಡೆಯುತ್ತಿರುವ ಬೇಕಲ್‌ ಬೀಚ್‌ ಪಾರ್ಕ್‌ನ್ನು ಪಳ್ಳಿಕೆರೆ ಸಹಕಾರಿ ಬ್ಯಾಂಕ್‌ ಬಿಆರ್‌ಡಿಸಿಗೆ ವಾಪಸು ನೀಡಿದೆ. ಬದಲಿಯಾಗಿ ಹತ್ತು ವರ್ಷಕ್ಕೆ ಪಾರ್ಕ್‌ನ್ನು ಹೊಸದಾಗಿ ಗುತ್ತಿಗೆ ನೀಡಲಾಗಿದೆ.

ಬೀಚ್‌ ಪಾರ್ಕ್‌ನಲ್ಲಿ 5 ಕೋಟಿ ರೂ. ನವೀಕರಣ ಯೋಜನೆಯನ್ನು ಪ್ರವಾಸೋದ್ಯಮ ಇಲಾಖೆ ಸಿದ್ಧಪಡಿಸಿದೆ. ಇದರಲ್ಲಿ ಅರ್ಧದಷ್ಟು ಮೊತ್ತವನ್ನು ಪ್ರವಾಸೋದ್ಯಮ ಇಲಾಖೆ ಹಾಗು ಅರ್ಧ ಮೊತ್ತವನ್ನು ಗುತ್ತಿಗೆದಾರರು ನೀಡಬೇಕು.

ಬೀಚ್‌ ಪಾರ್ಕ್‌ ಅಭಿವೃದ್ಧಿ ಯೋಜನೆ ಪೂರ್ತಿಗೊಳಿಸಲು ಕನಿಷ್ಠ ಒಂದು ವರ್ಷ ಬೇಕಾಗಬಹುದು. ಈರೋಳುಂಗಲ್‌ ಲೇಬರ್‌ ಕಾಂಟ್ರಾಕ್ಟ್ ಸೊಸೈಟಿ ಕಾಮಗಾರಿಯನ್ನು ವಹಿಸಿಕೊಳ್ಳಲಿದೆ. ಅಭಿವೃದ್ಧಿಯೊಂದಿಗೆ ಪ್ರವಾಸಿಗರಿಗೆ ಸೌಕರ್ಯ ಕಲ್ಪಿಸಲು ಫುಡ್‌ ಕೋರ್ಟ್‌ಗಳು, ರೆಸ್ಟಾರೆಂಟ್‌ಗಳು, ಅಮ್ಯೂಸ್‌ಮೆಂಟ್‌ ಪಾರ್ಕ್‌, ಚಿಲ್ಡನ್ಸ್‌ ಪ್ಲೇ ಏರಿಯಾ, ಸಾಹಸಿಕ ಕಾರ್ಯಕ್ರಮಗಳು, ಟೆಂಟ್‌ ಅಕಮಡೇಶನ್‌, ಭದ್ರತೆ ವ್ಯವಸ್ಥೆಗಳನ್ನು ಕಲ್ಪಿಸಲಾಗುವುದೆಂದು ಬೇಕಲ್‌ ಇಂಟರ್‌ ನ್ಯಾಶನಲ್‌ ಹೊಟೇಲ್‌ ಸಾರಥಿ ಅಬ್ದುಲ್‌ ಲತೀಫ್‌ ತಿಳಿಸಿದರು.