Advertisement
ಮೈಸೂರಿನಲ್ಲಿ ಶನಿವಾರ ಮೊದಲ್ಗೊಂಡ “ಎ’ ವಿಭಾಗದ ರಣಜಿ ಪಂದ್ಯದಲ್ಲಿ ಟಾಸ್‌ ಗೆದ್ದು ಮೊದಲು ಬೌಲಿಂಗ್‌ ಆಯ್ದುಕೊಂಡ ಕರ್ನಾಟಕ ಇದರಲ್ಲಿ ಭರ್ಜರಿ ಯಶಸ್ಸು ಸಾಧಿಸಿತು. ನಾಯಕ ಆರ್‌.ವಿನಯ್‌ ಕುಮಾರ್‌ ಅಸ್ಸಾಂ ಕುಸಿತಕ್ಕೆ ಮುಹೂರ್ತವಿರಿಸಿದ ಬಳಿಕ ಸ್ಪಿನ್‌ದ್ವಯರಾದ ಕೃಷ್ಣಪ್ಪ ಗೌತಮ್‌ ಮತ್ತು ಶ್ರೇಯಸ್‌ ಗೋಪಾಲ್‌ ಸೇರಿಕೊಂಡು ಪ್ರವಾಸಿಗರ ಮೇಲೆ ಸವಾರಿ ಮಾಡಿದರು. ಇವರ ಆಫ್ಸ್ಪಿನ್‌-ಲೆಗ್‌ಸ್ಪಿನ್‌ ದಾಳಿಯನ್ನು ನಿಭಾಯಿಸುವಲ್ಲಿ ಸಂಪೂರ್ಣ ವಿಫ‌ಲಗೊಂಡ ಅಸ್ಸಾಂ 59.1 ಓವರ್‌ಗಳಲ್ಲಿ 145 ರನ್ನುಗಳ ಸಣ್ಣ ಮೊತ್ತಕ್ಕೆ ಲಾಗ ಹಾಕಿತು.
Related Articles
ಇದಕ್ಕೂ ಮೊದಲು 1ನೇ ಇನಿಂಗ್ಸ್‌ನಲ್ಲಿ ಅಸ್ಸಾಂ ಪರ ಕರ್ನಾಟಕ ದಾಳಿಯನ್ನು ಯಶಸ್ವಿಯಾಗಿ ನಿಭಾಯಿಸಿದ ಆಟಗಾರನೆಂದರೆ ನಾಯಕ ಗೋಕುಲ್‌ ಶರ್ಮ ಮಾತ್ರ. ಅವರು ಏಕಾಂಗಿಯಾಗಿ ಹೋರಾಡಿ ಇನಿಂಗ್ಸಿನ ಏಕೈಕ ಅರ್ಧ ಶತಕಕ್ಕೆ ಸಾಕ್ಷಿಯಾದರು. 114 ಎಸೆತ ಎದುರಿಸಿ, 4 ಬೌಂಡರಿ ಹಾಗೂ 2 ಸಿಕ್ಸರ್‌ ನೆರವಿನಿಂದ 55 ರನ್‌ ಹೊಡೆದರು. ಆದರೆ ಆವರಿಗೆ ಇನ್ನೊಂದು ತುದಿಯಿಂದ ಯಾರಿಂದಲೂ ಬೆಂಬಲ ಸಿಗಲಿಲ್ಲ.
Advertisement
9ನೇ ಓವರಿನಲ್ಲಿ ಪಲ್ಲವ್‌ ಕುಮಾರ್‌ ದಾಸ್‌ (15) ವಿಕೆಟ್‌ ಪತನದೊಂದಿಗೆ ಅಸ್ಸಾಂ ಕುಸಿತ ಮೊದಲ್ಗೊಂಡಿತು. ಎರಡೇ ಓವರ್‌ ಅಂತರದಲ್ಲಿ ಪ್ರೀತಂ ದೇವನಾಥ್‌ ಅವರನ್ನು ಬಿನ್ನಿ ಶೂನ್ಯಕ್ಕೆ ವಾಪಸ್‌ ಮಾಡಿದರು. ಒಂದಿಷ್ಟು ಹೋರಾಟದ ಸೂಚನೆ ನೀಡಿದ ಓಪನರ್‌ ದಾಸ್‌ 57ರ ಮೊತ್ತದಲ್ಲಿ ಪೆವಿಲಿಯನ್‌ ಸೇರಿಕೊಂಡರು. ಗೋಕುಲ್‌ ಶರ್ಮ ಹೊರತುಪಡಿಸಿದರೆ 26 ರನ್‌ ಮಾಡಿದ ರಿಷವ್‌ ಅವರದೇ ಹೆಚ್ಚಿನ ಗಳಿಕೆ.
ಈ ಹಂತದಲ್ಲಿ ಕರ್ನಾಟಕದ ಸ್ಪಿನ್‌ ಆಕ್ರಮಣ ತೀವ್ರಗೊಳ್ಳುತ್ತ ಹೋಯಿತು. 84 ರನ್ನಿಗೆ 7 ವಿಕೆಟ್‌ ಬಿತ್ತು. ಗೋಕುಲ್‌ ಶರ್ಮ ಪ್ರಯತ್ನದಿಂದ ತಂಡದ ಮೊತ್ತ ನೂರೈವತ್ತರ ಗಡಿ ಸಮೀಪಿಸಿತು.
ಸಂಕ್ಷಿಪ್ತ ಸ್ಕೋರ್‌:ಅಸ್ಸಾಂ 1ನೇ ಇನಿಂಗ್ಸ್‌ 145 (ಗೋಕುಲ್‌ ಶರ್ಮ 55, ರಿಷವ್‌ ದಾಸ್‌ 26, ಕೆ.ಗೌತಮ್‌ 20ಕ್ಕೆ 4, ಶ್ರೇಯಸ್‌ ಗೋಪಾಲ್‌ 43ಕ್ಕೆ 3), ಕರ್ನಾಟಕ ವಿಕೆಟ್‌ ನಷ್ಟವಿಲ್ಲದೆ 77/0 (ಸಮರ್ಥ್ ಬ್ಯಾಟಿಂಗ್‌ 47, ಅಗರ್ವಾಲ್‌ ಬ್ಯಾಟಿಂಗ್‌ 26). ರಣಜಿ ಇತರೆ ಪಂದ್ಯಗಳ ಸ್ಕೋರ್‌
-ಚತ್ತೀಸ್‌ಗಢ ವಿರುದ್ಧ ಪಶ್ಚಿಮ ಬಂಗಾಳ 1ನೇ ಇನಿಂಗ್ಸ್‌ (283/2)
-ರೈಲ್ವೇಸ್‌ ವಿರುದ್ಧ ದೆಹಲಿ 1ನೇ ಇನಿಂಗ್ಸ್‌ (318/6)
-ಜಮ್ಮು ಕಾಶ್ಮೀರ ವಿರುದ್ಧ ಸೌರಾಷ್ಟ್ರ 1ನೇ ಇನಿಂಗ್ಸ್‌ (428/4)
-ಜಾಖಂಡ್‌ ವಿರುದ್ಧ ರಾಜಸ್ಥಾನ 1ನೇ ಇನಿಂಗ್ಸ್‌ (250/4)
- ಕೇರಳ 1ನೇ ಇನಿಂಗ್ಸ್‌ (208/10), ಗುಜರಾತ್‌ 1ನೇ ಇನಿಂಗ್ಸ್‌ (60/2)
-ಆಂಧ್ರ ವಿರುದ್ಧ ಬರೋಡ 1ನೇ ಇನಿಂಗ್ಸ್‌ (247/7)
-ಮುಂಬೈ ವಿರುದ್ಧ ಮಧ್ಯ ಪ್ರದೇಶ 1ನೇ ಇನಿಂಗ್ಸ್‌ (250/5)
-ತಮಿಳುನಾಡು ವಿರುದ್ಧ ತ್ರಿಪುರ 1ನೇ ಇನಿಂಗ್ಸ್‌ (244/7)
-ಪಂಜಾಬ್‌ 1ನೇ ಇನಿಂಗ್ಸ್‌ (161/10), ವಿದರ್ಭ 1ನೇ ಇನಿಂಗ್ಸ್‌ (106/1)
-ಗೋವಾ 1ನೇ ಇನಿಂಗ್ಸ್‌ (255/10), ಹಿಮಾಚಲ 1ನೇ ಇನಿಂಗ್ಸ್‌ (2/0) – ಸಿ.ದಿನೇಶ್‌