ಕೇಂದ್ರದ ಕಚೇರಿಗಳಲ್ಲೂ ಕನ್ನಡ ಬಳಸಬೇಕು

ಬೆಂಗಳೂರು: ಕನ್ನಡ ರಾಜ್ಯೋತ್ಸವ, ಕನ್ನಡದ ಭವ್ಯ ಪರಂಪರೆ ನೆನೆಯುವುದಕ್ಕೆ ಸೀಮಿತವಾಗದೇ, ಕರ್ನಾಟಕದಲ್ಲಿ ಇರುವ ಕೇಂದ್ರ ಸರ್ಕಾರದ ಕಚೇರಿಗಳಲ್ಲಿ ಕನ್ನಡ ಅನುಷ್ಠಾನವಾಗಿದಿಯೇ ಎಂಬುದನ್ನು ತಿಳಿಯುವ ವ್ಯವಸ್ಥೆಯೂ ಆಗಬೇಕು ಎಂದು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಅಧ್ಯಕ್ಷ ಸಾ.ರ.ಗೋವಿಂದು ಹೇಳಿದರು.

ಕೋರಮಂಗಲದ ಕೇಂದ್ರೀಯ ಸದನದ ಕನ್ನಡ ಸಂಘವು ವ್ಯವಸ್ಥೆ ಮಾಡಿದ್ದ ಕನ್ನಡದ ವೀರ ಸೇನಾನಿ ಮ.ರಾಮಮೂರ್ತಿ ಶತಮಾನೋತ್ಸವ ಮತ್ತು ರಾಜ್ಯೋತ್ಸವ ಸಮಾರಂಭದಲ್ಲಿ ಮಾತನಾಡಿದ ಅವರು,  ಕೇಂದ್ರ ಸರ್ಕಾರದ ಕಚೇರಿಗಳಲ್ಲಿ ಕನ್ನಡ ಬಳಕೆ ಮಾಡದೇ ಇರುವುದು ಪ್ರಜಾಪ್ರಭುತ್ವ ವ್ಯವಸ್ಥೆಗೆ ಮಾಡುವ ಅಪಚಾರವಾಗುತ್ತದೆ. ತ್ರಿಭಾಷಾ ಸೂತ್ರದನ್ವಯ ಆಯಾ ರಾಜ್ಯದ ಭಾಷೆಗಳಿಗೆ ಆದ್ಯತೆ ಇರಬೇಕು. ರಾಜ್ಯದಲ್ಲಿರುವ ಕೇಂದ್ರ ಸರ್ಕಾರದ ಕಚೇರಿಗಳು ಇದನ್ನು ಪಾಲಿಸಬೇಕು. ಬೇರೆ ರಾಜ್ಯದಿಂದ ಬಂದವರೂ ಕೂಡ ಕನ್ನಡ ಕಲಿಯಬೇಕು ಎಂದರು.

ವಿದ್ವಾಂಸ ಡಾ.ಹ.ರಾ.ನಾಗರಾಜಾಚಾರ್ಯ ಮಾತನಾಡಿ, ಕನ್ನಡ ಸಂಸ್ಕೃತಿಯ ವೈಶಿಷ್ಟé, ಪ್ರಾಚೀನ ಪರಂಪರೆಯನ್ನು ಹೊರ ರಾಜ್ಯದಿಂದ ಕರ್ನಾಟಕಕ್ಕೆ ಬಂದಿರುವ ಅಧಿಕಾರಿಗಳಿಗೆ, ನೌಕರರಿಗೆ ತಿಳಿಸುವ ಕೆಲಸ ಆಗಬೇಕು ಎಂಬ ಸಲಹೆ ನೀಡಿದರು.
ಕನ್ನಡ ಚಿಂತಕ ರಾ.ನಂ.ಚಂದ್ರಶೇಖರ ಮಾತನಾಡಿ, ಮ.ರಾಮಮೂರ್ತಿಯವರು ಧೀರೋದತ್ತ ಕನ್ನಡ ಕೆಲಸಗಳನ್ನು ವಿವರಿಸಿ ಇತ್ತೀಚೆಗೆ ಕಣ್ಮರೆಯಾದ ಕೆ.ಎಸ್‌. ಅಚ್ಯುತನ್‌ ಮತ್ತು ಕನ್ನಡ ಪರಿಚಾರಕ ಕೆ.ಎಚ್‌. ನರಸಿಂಹಮೂರ್ತಿಯವರ ಕನ್ನಡ ಕೆಲಸಗಳನ್ನು ನೆನಪಿಸಿಕೊಂಡರು.

ಸಂಘದ ಅಧ್ಯಕ್ಷ ಮ.ಚಂದ್ರಶೇಖರ, ಹೆಚ್ಚುವರಿ ಮಹಾನಿರ್ದೇಶಕ ಪುನಿತ್‌ ಕುಮಾರ್‌ ವತ್ಸ, ಕನ್ನಡ ಪರಿಚಾರಕರಾದ ಜಿ.ಎಸ್‌. ಸತ್ಯಮೂರ್ತಿ, ಎಚ್‌.ಎನ್‌. ರಮೇಶ ಬಾಬು, ಬಿ. ರವಿಕುಮಾರ್‌, ಕೇಂದ್ರೀಯ ಸದನದ ಅಧಿಕಾರಗಳಾದ ಕೃಷ್ಣಮೂರ್ತಿ ಮಯ್ಯ, ವಿಶ್ವೇಶ್ವರಯ್ಯ, ನೌಕರರಾದ ಮಲ್ಲಿಕಾರ್ಜುನ, ಮಲರ್‌ ಸೆಲ್ವಂ ಮೊದಲಾದವರು ಇದ್ದರು.