ಕಲಬುರಗಿ: ಕೋವಿಡ್ ಸೋಂಕಿಗೆ ಒಂದೇ ದಿನ ಹತ್ತು ಮಂದಿ ಬಲಿ! 168 ಹೊಸ ಪ್ರಕರಣ

ಕಲಬುರಗಿ: ಜಿಲ್ಲೆಯಲ್ಲಿ ಕೋವಿಡ್ ಸೋಂಕಿನಿಂದ ಬುಧವಾರ ಒಂದೇ ದಿನ ಹತ್ತು ಮಂದಿ ಸೋಂಕಿತರು ಸಾವನ್ನಪ್ಪಿರುವುದು ದೃಢಪಟ್ಟಿದೆ. ಇದರೊಂದಿಗೆ ಕೋವಿಡ್ ಸೋಂಕಿನಿಂದಾಗಿ ಮೃತಪಟ್ಟವರ ಸಂಖ್ಯೆ 82ಕ್ಕೆ ಏರಿಕೆಯಾಗಿದೆ.

ಬುಧವಾರ ಹೊಸದಾಗಿ 168 ಜನರಿಗೆ ಕೋವಿಡ್ ಮಹಾಮಾರಿ ಪತ್ತೆಯಾಗಿವೆ. ಇದರಲ್ಲಿ ಇಬ್ಬರು ಮಹಿಳೆಯರು ಸೇರಿ ಹತ್ತು ಜನರು ಅಸುನೀಗಿರುವುದು ಖಚಿತಗೊಂಡಿದೆ. ಸೋಂಕಿನಿಂದ ಒಂದು ದಿನದಲ್ಲಿ ದಾಖಲಾದ ಅತಿ ಹೆಚ್ಚು ಸಾವು ಇದಾಗಿದ್ದು, ಮಂಗಳವಾರ ಆರು ಜನರು ತುತ್ತಾಗಿದ್ದರು. ಇದಕ್ಕೂ ಮುನ್ನ ಒಂದು ದಿನದಲ್ಲಿ ಅತ್ಯಧಿಕ ಆರು ಸೋಂಕಿತರು ಸಾವನ್ನಪ್ಪಿರುವುದು ವರದಿಯಾಗಿತ್ತು.

45 ವರ್ಷದ ಪುರುಷ, 58 ವರ್ಷದ ಇಬ್ಬರು ಪುರುಷರು, 35 ವರ್ಷದ ಮಹಿಳೆ, 63 ವರ್ಷದ ವೃದ್ಧೆ, 56 ವರ್ಷದ ಪುರುಷ, 78 ವರ್ಷದ ವೃದ್ಧ, 62 ವರ್ಷದ ವೃದ್ಧ, 52 ವರ್ಷ ಮತ್ತು 55 ವರ್ಷದ ಪುರುಷರು ಕೋವಿಡ್ ಸೋಂಕಿಗೆ ಬಲಿಯಾಗಿದ್ದಾರೆ.

ಹೊಸ 168 ಸೋಂಕಿತರೊಂದಿಗೆ ಜಿಲ್ಲೆಯಲ್ಲಿ ಒಟ್ಟು ಸೋಂಕಿತರ ಸಂಖ್ಯೆ 4,946ಕ್ಕೆ ಏರಿಕೆಯಾಗಿ ಐದು ಸಾವಿರ ಗಡಿಯತ್ತ ಬಂದಿದೆ. ಇದೇ ವೇಳೆ 199 ಜನರು ಬುಧವಾರ ಆಸ್ಪತ್ರೆಯಿಂದ ಬಿಡುಗಡೆಗೊಂಡಿದ್ದಾರೆ. ಈ ಮೂಲಕ ಇಲ್ಲಿವರೆಗೆ ಒಟ್ಟು 2,429 ಮಂದಿ ರೋಗಿಗಳು ಬಿಡುಗಡೆಗೊಂಡಂತೆ ಆಗಿದೆ. ಇನ್ನು, 2,435 ಸಕ್ರಿಯ ಪ್ರಕರಣಗಳು ಇವೆ.