Kadaba ಕೊಲೆ ಬೆದರಿಕೆ; ಪೊಲೀಸರಿಗೆ ದೂರು

ಕಡಬ: ಜಮೀನಿಗೆ ಅಕ್ರಮ ಪ್ರವೇಶ ಮಾಡಿ ಕಲ್ಲಿನ ಕಂಬಗಳನ್ನು ಜೆಸಿಬಿ ಬಳಸಿ ಹಾನಿಗೊಳಿಸಿದ್ದಲ್ಲದೆ ನನ್ನ ಮಗನ ಮೇಲೆ ಜೆಸಿಬಿ ಹತ್ತಿಸುವ ಬೆದರಿಕೆ ಹಾಕಿರುವುದಾಗಿ ಕೋಡಿಂಬಾಳ ಗ್ರಾಮದ ಕಲ್ಲಂತಡ್ಕ ನಿವಾಸಿ ಸೈಮನ್‌ ಲೂಯಿಸ್‌ ರೋಡ್ರಿಗಸ್‌ ಅವರು ಸ್ಥಳೀಯ ನಿವಾಸಿಗಳಾದ ಪ್ರಕಾಶ್‌, ಸತ್ಯನಾರಾಯಣ ಹಾಗೂ ಇನ್ನಿತರರ ವಿರುದ್ಧ ಕಡಬ ಪೊಲೀಸರಿಗೆ ದೂರು ನೀಡಿದ್ದಾರೆ.

ಮಂಗಳೂರಿನಲ್ಲಿರುವ ತಮ್ಮ ಸಂಬಂಧಿಕರ ಮನೆಗೆ ಹೋಗಿದ್ದಾಗ, ಕುಂಡೋಳಿ ಮಾಲೇಶ್ವರದಲ್ಲಿರುವ ನಮ್ಮ ಜಮೀನಿಗೆ ಆರೋಪಿಗಳು ಅಕ್ರಮ ಪ್ರವೇಶ ಮಾಡಿ, ಜಾಗಕ್ಕೆ ಹಾಕಿದ್ದ ಕಲ್ಲು ಕಂಬಗಳನ್ನು ಜೆಸಿಬಿ ವಾಹನಗಳಿಂದ ಕಿತ್ತು ಹಾಕಿದ್ದಾರಲ್ಲದೆ ಕೆಲವು ಕಂಬಗಳನ್ನು ಕಳವು ಮಾಡಿದ್ದಾರೆ. ಆಬಳಿಕ ಪುತ್ರ ವಿಲ್ಫೆಡ್‌ ರೋಡ್ರಿಗಸ್‌ ಈ ಬಗ್ಗೆ ವಿಚಾರಿಸಲು ಹೋದಾಗ ಆರೋಪಿಗಳು ಅವಾಚ್ಯ ಶಬ್ದಗಳಿಂದ ಬೈದು ಕೊಲೆಗೈಯುವುದಾಗಿ ಹೇಳಿದ್ದಲ್ಲದೆ ಬೆದರಿಕೆ ಹಾಕಿದ್ದಾರೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಈ ಬಗ್ಗೆ ಕಡಬ ಪೊಲೀಸ್‌ ಠಾಣೆ ಪ್ರಕರಣ ದಾಖಲಾಗಿದೆ.