ನ್ಯಾ.ಚಲಮೇಶ್ವರ್‌ಗೆ ಸುಪ್ರೀಂ ವಿದಾಯ

ನವದೆಹಲಿ: ಮುಂದಿನ ತಿಂಗಳ 22ರಂದು ಸೇವಾ ನಿವೃತ್ತಿ ಪಡೆಯಲಿರುವ ಸುಪ್ರೀಂಕೋರ್ಟ್‌ ಹಿರಿಯ ನ್ಯಾಯ ಮೂರ್ತಿ ಜಸ್ತಿ ಚಲಮೇಶ್ವರ್‌ ಶುಕ್ರವಾರ ಸಿಜೆಐ ದೀಪಕ್‌ ಮಿಶ್ರಾ ಜತೆ ನ್ಯಾಯಪೀಠ ಹಂಚಿಕೊಂಡಿದ್ದಾರೆ. ಮೇ 20ರಿಂದ ಜುಲೈ 1ರ ವರೆಗೆ  ಸುಪ್ರೀಂಕೋರ್ಟ್‌ ಬೇಸಗೆ ರಜೆ ಇದೆ. ಹೀಗಾಗಿ, ಶುಕ್ರವಾರವೇ ನ್ಯಾ.ಜೆ.ಚಲಮೇಶ್ವರ್‌ಗೆ ಕೊನೆಯ ಕರ್ತವ್ಯದ ದಿನವಾಗಿತ್ತು.

ಕೋರ್ಟ್‌ ಹಾಲ್‌ ಸಂಖ್ಯೆ 1ರಲ್ಲಿ ಸಿಜೆಐ ಮಿಶ್ರಾ, ನ್ಯಾ.ಡಿ.ವೈ.ಚಂದ್ರಚೂಡ್‌ ಅವರಿದ್ದ ಪೀಠದಲ್ಲಿ ನ್ಯಾ. ಚಲಮೇಶ್ವರ್‌ ಕೂಡ ಕುಳಿತಿದ್ದರು. ಸೇವಾ ನಿವೃತ್ತಿ ಪಡೆಯುವ ನ್ಯಾಯಮೂರ್ತಿಗೆ ಕೊನೆಯ ದಿನ ಸಿಜೆಐ ಜತೆಗೆ ಪೀಠ ಹಂಚಿಕೊಳ್ಳುವ ಅವಕಾಶ ನೀಡುವುದನ್ನು ಸುಪ್ರೀಂಕೋರ್ಟ್‌ ಪಾಲಿಸಿಕೊಂಡು ಬಂದಿದೆ. ಹಿರಿಯ  ನ್ಯಾಯವಾದಿಗಳಾದ ರಾಜೀವ್‌ ದತ್ತಾ, ಪ್ರಶಾಂತ್‌ ಭೂಷಣ್‌, ಗೋಪಾಲ ಶಂಕರನಾರಾಯಣನ್‌ ಅವರು ಈ ವೇಳೆ ನ್ಯಾ.ಚಲಮೇಶ್ವರ್‌ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದರು. ಬಳಿಕ ನ್ಯಾ.ಚಲಮೇಶ್ವರ್‌ ಕೈಮುಗಿದು ಕೋರ್ಟ್‌ ಹಾಲ್‌ನಿಂದ ತೆರಳಿದರು. 

ಸುಪ್ರೀಂಕೋರ್ಟ್‌ ಬಾರ್‌ ಎಸೋಸಿಯೇಶನ್‌ ನ್ಯಾ.ಚಲಮೇಶ್ವರ್‌ ಗೌರವಾರ್ಥ ಬೀಳ್ಕೊಡುಗೆ ಕಾರ್ಯಕ್ರಮ ಆಯೋಜಿಸಲು ಉದ್ದೇಶಿಸಿತ್ತಾದರೂ, ಅವರು ಅದಕ್ಕೆ ಒಪ್ಪಿರಲಿಲ್ಲ. ಅಷ್ಟೇ ಅಲ್ಲ, ಕರ್ತವ್ಯದ ಕೊನೆಯ ದಿನ ಸಿಜೆಐ ದೀಪಕ್‌ ಮಿಶ್ರಾ ಅವರ ಜೊತೆಯಲ್ಲಿ ಕುಳಿತುಕೊಳ್ಳು ವುದಿಲ್ಲ ಎಂದೂ ಅವರು 3 ದಿನಗಳ ಹಿಂದಷ್ಟೇ ಹೇಳಿದ್ದರು ಎಂದು ವರದಿಯಾಗಿತ್ತು.