ಟ್ರಂಪ್‌ಗೆ ಮತ್ತೂಂದು ಆಘಾತ : ಎಚ್‌-1ಬಿ ವೀಸಾ ನಿಬಂಧನೆಗಳಿಗೆ ಕೋರ್ಟ್‌ ತಡೆ

ವಾಷಿಂಗ್ಟನ್‌: ಅಧ್ಯಕ್ಷೀಯ ಚುನಾವಣೆಯಲ್ಲಿ ಸೋಲು ಅನುಭವಿಸಿರುವ ಹಾಲಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ಗೆ ಮತ್ತೂಂದು ಆಘಾತ ಉಂಟಾಗಿದೆ.

ಮಾಹಿತಿ ತಂತ್ರಜ್ಞಾನ ಉದ್ಯೋಗಿಗಳಿಗಾಗಿ ಇರುವ ಎಚ್‌-1ಬಿ ವೀಸಾ ಹೇರಲಾಗಿದ್ದ ನಿಬಂಧನೆಗಳಿಗೆ ಉತ್ತರ ಕ್ಯಾಲಿಫೋರ್ನಿಯಾ ಜಿಲ್ಲೆಯ ನ್ಯಾಯಾಧೀಶ ಜೆಫ್ರಿ ಎಸ್‌.ವೈಟ್‌ ತಡೆಯಾಜ್ಞೆ ನೀಡಿದ್ದಾರೆ. ಇದರಿಂದಾಗಿ ಭಾರತ ಸೇರಿದಂತೆ ಹಲವು ರಾಷ್ಟ್ರಗಳ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದ ಉದ್ಯೋಗಿಗಳು ನಿಟ್ಟುಸಿರು ಬಿಡುವಂತಾಗಿದೆ.

ಟ್ರಂಪ್‌ ಸರ್ಕಾರ ಎಚ್‌-1 ಬಿ ವೀಸಾ ಹೊಂದಿರುವವರಿಗೆ ಅಮೆರಿಕದ ಕಂಪನಿಗಳು ಹೆಚ್ಚಿನ ವೇತನ ನೀಡಬೇಕು ಎಂದು ಆದೇಶಿಸಿತ್ತು.

ನಿಯೋಜಿತ ಅಧ್ಯಕ್ಷ ಜೋ ಬೈಡೆನ್‌ ಕೂಡ ಟ್ರಂಪ್‌ ಸರ್ಕಾರದ ಕೆಲವು ನಿಯಮಗಳನ್ನು ಪರಿಶೀಲಿಸಿ ಜಾರಿ ಮಾಡುವುದಾಗಿ ಹೇಳಿದ್ದರು. ಅದಕ್ಕೆ ಪೂರಕವಾಗಿ ಈ ತೀರ್ಪು ಪ್ರಕಟವಾಗಿದೆ.

ಇದನ್ನೂ ಓದಿ:ಏಕತಾ ಪ್ರತಿಮೆ ಪ್ರವೇಶ ಶುಲ್ಕ ಸಂಗ್ರಹಿಸುವ ಸಿಬ್ಬಂದಿಯಿಂದ 5.24 ಕೋಟಿ ರೂ. ವಂಚನೆ

ಮತ್ತೂಂದು ಮಹತ್ವದ ಆದೇಶದಲ್ಲಿ ನ್ಯಾಯಾಧೀಶರು ಎಚ್‌-1ಬಿ ವೀಸಾ ಅರ್ಹತೆಯನ್ನು ಅಮೆರಿಕದ ಕಂಪನಿಗಳೇ ನಿರ್ಧರಿಸಬೇಕು ಎಂಬ ಆದೇಶವನ್ನೂ ರದ್ದುಗೊಳಿಸಿದ್ದಾರೆ. ಇದರ ಜತೆಗೆ ವೇತನಕ್ಕೆ ಸಂಬಂಧಿಸಿದಂತೆ ಕಾರ್ಮಿಕ ಇಲಾಖೆ ನೀಡಿದ್ದ ಸೂಚನೆಯೂ ಮಾನ್ಯವಾದುದಲ್ಲ ಎಂದು ಮಂಗಳವಾರ ತೀರ್ಪು ನೀಡಿದ್ದಾರೆ.