ಮುಂಬೈ: 2021ರ ಐಪಿಎಲ್ ನ ಮುಂದುವರಿದ ಭಾಗ ಯುಎಇ ನಲ್ಲಿ ನಡೆಯಲಿದೆ. ಕೂಟ ಪುನರಾರಂಭಕ್ಕೆ ಇನ್ನೊಂದೇ ತಿಂಗಳು ಬಾಕಿ ಉಳಿದಿದೆ. ಹೀಗಾಗಿ ತಂಡಗಳು ಕಸರತ್ತಿನಲ್ಲಿ ತೊಡಗಿದೆ.
ಕೂಟ ಆರಂಭಕ್ಕೂ ಮುನ್ನ ರಾಜಸ್ಥಾನ ರಾಯಲ್ಸ್ ತಂಡಕ್ಕೆ ಆಘಾತ ಎದುರಾಗಿದೆ. ತಂಡದ ಪ್ರಮುಖ ಆಟಗಾರ ಜೋಸ್ ಬಟ್ಲರ್ ಅವರು ಯುಎಇ ನಲ್ಲಿ ನಡೆಯಲಿರುವ ಕೂಟದಲ್ಲಿ ಭಾಗವಹಿಸುವುದಿಲ್ಲ ಎಂದು ಹೇಳಿದ್ದಾರೆ.
ಇಂಗ್ಲೆಂಡ್ ಆಟಗಾರ ಜೋಸ್ ಬಟ್ಲರ್ ಅವರ ಪತ್ನಿ ಲೂಸಿ ಗರ್ಭಿಣಿಯಾಗಿದ್ದಾರೆ. ಹೀಗಾಗಿ ಮಗುವಿನ ಜನನದ ಸಮಯದಲ್ಲಿ ತಾನು ಪತ್ನಿಯೊಂದಿಗೆ ಇರಲು ಇಚ್ಛಿಸುವುದಾಗಿ ಬಟ್ಲರ್ ರಾಜಸ್ಥಾನ್ ರಾಯಲ್ಸ್ ಫ್ರಾಂಚೈಸಿಗೆ ತಿಳಿಸಿದ್ದಾರೆ ಎಂದು ಸ್ವತಃ ಫ್ರಾಂಚೈಸಿ ಹೇಳಿಕೊಂಡಿದೆ.
ಇದನ್ನೂ ಓದಿ:ಲಂಕಾ ಕ್ರಿಕೆಟ್‌ ಒಡಂಬಡಿಕೆ: 18 ಆಟಗಾರರ ಪಟ್ಟಿ ಪ್ರಕಟ
ಜೋಸ್ ಬಟ್ಲರ್ ಅವರು 2017ರ ಅಕ್ಟೋಬರ್ ನಲ್ಲಿ ಲೂಸಿ ಅವರೊಂದಿಗೆ ವಿವಾಹವಾಗಿದ್ದರು. 2019ರಲ್ಲಿ ಮೊದಲ ಪುತ್ರಿ ಜನಿಸಿತ್ತು. ಇದೀಗ ಬಟ್ಲರ್ ದಂಪತಿ ಎರಡನೇ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ.
ಗ್ಲೆನ್ ಫಿಲಿಪ್ ಸೇರ್ಪಡೆ: ಜೋಸ್ ಬಟ್ಲರ್ ಅಲಭ್ಯತೆಯ ಕಾರಣದಿಂದ ನ್ಯೂಜಿಲ್ಯಾಂಡ್ ನ ವಿಕೆಟ್ ಕೀಪರ್ ಬ್ಯಾಟ್ಸಮನ್ ಗ್ಲೆನ್ ಫಿಲಿಪ್ ಅವರು ರಾಜಸ್ಥಾನ ತಂಡವನ್ನು ಕೂಡಿಕೊಳ್ಳಲಿದ್ದಾರೆ.
ಐಪಿಎಲ್ ನ ಮುಂದುವರಿದ ಭಾಗ ಸ.19ರಿಂದ ಆರಂಭವಾಗಲಿದೆ. ಸಂಜು ಸ್ಯಾಮ್ಸನ್ ನಾಯಕತ್ವದ ರಾಜಸ್ಥಾನ ತಂಡ ಸದ್ಯ ಅಂಕಪಟ್ಟಿಯಲ್ಲಿ ಐದನೇ ಸ್ಥಾನದಲ್ಲಿದೆ.
