INDvsENG; ಬಾಜ್ ಬಾಲ್ ಬಿಟ್ಟು ಆಡಿದ ರೂಟ್ ಶತಕ; ಆಕಾಶ್ ದೀಪ್ ಸ್ಮರಣೀಯ ಪದಾರ್ಪಣೆ

ರಾಂಚಿ: ಭಾರತ ವಿರುದ್ಧದ ಟೆಸ್ಟ್ ಸರಣಿಯ ಮೊದಲ ಮೂರು ಪಂದ್ಯಗಳಲ್ಲಿ ನೀರಸ ಬ್ಯಾಟಿಂಗ್ ಪ್ರದರ್ಶನ ನೀಡಿದ್ದ ಇಂಗ್ಲೆಂಡ್ ಸ್ಟಾರ್ ಆಟಗಾರ ಜೋ ರೂಟ್ ಅವರು ಶುಕ್ರವಾರ ಆರಂಭವಾದ ನಾಲ್ಕನೇ ಟೆಸ್ಟ್ ಪಂದ್ಯದಲ್ಲಿ ಶತಕ ಬಾರಿಸಿ ಮಿಂಚಿದ್ದಾರೆ.

ರಾಂಚಿಯಲ್ಲಿ ನಡೆಯುತ್ತಿರುವ ನಾಲ್ಕನೇ ಟೆಸ್ಟ್ ಪಂದ್ಯದಲ್ಲಿ ಒಂದು ಹಂತದಲ್ಲಿ ಇಂಗ್ಲೆಂಡ್ ತಂಡ ಸತತ ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದಾಗ ತಾಳ್ಮೆಯ ಆಟವಾಡಿದ ರೂಟ್ ತಂಡಕ್ಕೆ ಆಧಾರವಾದರು. 226 ಎಸೆತ ಎದುರಿಸಿರುವ ರೂಟ್ ಅಜೇಯ 106 ರನ್ ಗಳಿಸಿದ್ದಾರೆ.

ರೂಟ್ ಮತ್ತು ಬೆನ್ ಫೋಕ್ಸ್ ಆರನೇ ವಿಕೆಟ್ ಗೆ ಶತಕದ ಜೊತೆಯಾಟವಾಡಿದರು. ಫೋಕ್ಸ್ 47 ರನ್ ಗಳಿಸಿದರು.

ಬಾಜ್ ಬಾಲ್ ಕೈಬಿಟ್ಟ ರೂಟ್

ಟೆಸ್ಟ್ ಕ್ರಿಕೆಟ್ ನಲ್ಲಿ ಆಕ್ರಮಣಕಾರಿಯಾಗಿ ಆಡುವ ಬಾಜ್ ಬಾಲ್ ಮಾದರಿಯಲ್ಲಿ ಜೋ ರೂಟ್ ಪದೇ ಪದೇ ವೈಫಲ್ಯ ಎದುರಿಸುತ್ತಿದ್ದರು. ರಾಜಕೋಟ್ ಟೆಸ್ಟ್ ಪಂದ್ಯದಲ್ಲಿ ರಿವರ್ಸ್ ಸ್ವೀಪ್ ಮಾಡಲು ಯತ್ನಿಸಿ ಔಟಾಗಿದ್ದರು. ಇದರ ಬಳಿಕ ಇಂಗ್ಲೆಂಡ್ ಮಾಜಿ ಆಟಗಾರರು ರೂಟ್ ಬ್ಯಾಟಿಂಗ್ ಬಗ್ಗೆ ಟೀಕೆ ಮಾಡಿದ್ದರು.

ರಾಂಚಿ ಪಂದ್ಯದಲ್ಲಿ ತನ್ನ ಸಾಂಪ್ರದಾಯಿಕ ಶೈಲಿಯ ಬ್ಯಾಟಿಂಗ್ ಗೆ ಮರಳಿದ ರೂಟ್ ನಿಧಾನವಾಗಿ ಇನ್ನಿಂಗ್ಸ್ ಕಟ್ಟಿದರು. ಮೊದಲ ಸೆಶನ್ ನಲ್ಲಿ ಐದು ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಆಂಗ್ಲರ ತಂಡವನ್ನು ರೂಟ್ ಫೋಕ್ಸ್ ಜತೆ ಸೇರಿ ಆಧರಿಸಿದರು.

ಮೊದಲ ದಿನದಾಟದ ಅಂತ್ಯಕ್ಕೆ ಇಂಗ್ಲೆಂಡ್ ತಂಡವು ಏಳು ವಿಕೆಟ್ ನಷ್ಟಕ್ಕೆ 302 ರನ್ ಗಳಿಸಿದೆ. 106 ರನ್ ಗಳಿಸಿದ ಜೋ ರೂಟ್ ಮತ್ತು 31 ರನ್ ಗಳಿಸಿದ ಒಲಿ ರಾಬಿನ್ಸನ್ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ.

ಆಕಾಶ್ ಸ್ಮರಣೀಯ ಪದಾರ್ಪಣೆ

ಬೆಂಗಾಳ ಬೌಲರ್ ಆಕಾಶ್ ದೀಪ್ ಅವರು ಇಂದಿನ ಪಂದ್ಯದಲ್ಲಿ ಟೆಸ್ಟ್ ಕ್ರಿಕೆಟ್ ಗೆ ಪದಾರ್ಪಣೆ ಮಾಡಿದರು. ಆರಂಭದಲ್ಲಿಯೇ ಇಂಗ್ಲೆಂಡ್ ಬ್ಯಾಟರ್ ಗಳ ಮೇಲೆ ಸವಾರಿ ಮಾಡಿದ ಆಕಾಶ್ ದೀಪ್ ಮೊದಲ ಮೂರು ವಿಕೆಟ್ ಪಡೆದರು.

ಮೊಹಮ್ಮದ್ ಸಿರಾಜ್ ಎರಡು ವಿಕೆಟ್ ಕಿತ್ತರೆ, ರವಿಚಂದ್ರನ್ ಅಶ್ವಿನ್ ಮತ್ತು ರವೀಂದ್ರ ಜಡೇಜಾ ತಲಾ ಒಂದು ವಿಕೆಟ್ ಪಡೆದರು.