ದಿಲ್ಲಿ ಕರೋಲ್‌ ಬಾಗ್‌ನಲ್ಲಿ 12 ಕೋಟಿ ರೂ. ಚಿನ್ನಾಭರಣ ಕಳವು

ಹೊಸದಿಲ್ಲಿ : ಮಧ್ಯ ದಿಲ್ಲಿಯ ಕರೋಲ್‌ ಬಾಗ್‌ನಲ್ಲಿರುವ ಎರಡು ಚಿನ್ನಾಭರಣ ಉತ್ಪಾದನಾ ಘಟಕದಿಂದ ಸುಮಾರು 12 ಕೋಟಿ ರೂ. ಮೌಲ್ಯದ ಚಿನ್ನಾಭರಣಗಳು ಕಳವಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಕಳ್ಳತನದ ಕೃತ್ಯವು ಸಿಸಿಟಿವಿ ಯಲ್ಲಿ ದಾಖಲಾಗಿದ್ದು ಆರೋಪಿಗಳನ್ನು ಗುರುತಿಸಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

ದೀಪಾವಳಿಯ ದಿನ ಈ ಕಳವು ನಡೆದಿದ್ದು ಮರುದಿನ ಮಾಲಕರು ಘಟಕಗಳಿಗೆ ಮರಳಿದಾಗ ಚಿನ್ನಾಭರಣಗಳು ಕಳವಾಗಿರುವುದು ಗೊತ್ತಾಯಿತು.

ಚಿನ್ನಾಭರಣ ತಯಾರಿ ಘಟಕ ಇರುವ ಕಟ್ಟಡದ ಮೊದಲ ಮಹಡಿಯಲ್ಲಿ  ವಾಸವಾಗಿರುವ ಬಾಡಿಗೆದಾರರೇ ಈ ಕೃತ್ಯ ಎಸಗಿರುವುದು ಗೊತ್ತಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಚಿನ್ನಾಭರಣ ಇಡುವ ಲಾಕರನ್ನು ಗ್ಯಾಸ್‌ ಕಟರ್‌ ಬಳಸಿ ಕತ್ತರಿಸಿ ತೆರೆದು 6.80 ಕೋಟಿ ರೂ. ಮೌಲ್ಯದ ಒಡವೆಗಳನ್ನು  ಕಳವು ಮಾಡಲಾಗಿದೆಯಾದರೆ ಇನ್ನೊಂದು ಘಟಕದಲ್ಲಿನ ಲಾಕರ್‌ನ ಬೀಗ ಮುರಿದು 5.20 ಕೋಟಿ ರೂ. ಮೌಲ್ಯದ ಚಿನ್ನಾಭರಣಗಳನ್ನು ಕಳವು ಮಾಡಲಾಗಿದೆ ಎಂದು ಪೊಲೀಸರುತಿಳಿಸಿದ್ದಾರೆ.