ಮನೆಯಿಂದ ಚಿನ್ನಾಭರಣ ಕಳವು

ಪುಂಜಾಲಕಟ್ಟೆ: ಹಾಡ ಹಗಲೇ ಮನೆಯೊಂದರಿಂದ ಚಿನ್ನಾ ಭರಣ ಕಳವಾದ ಘಟನೆ ಜೂ. 15ರಂದು ಸಂಭವಿಸಿದೆ.

ಬಂಟ್ವಾಳ ತಾಲೂಕಿನ ಮಣಿ ನಾಲ್ಕೂರು ಗ್ರಾಮದ ಬೀಜದಡಿ ನಿವಾಸಿ ಗುಣವತಿ ಅವರ ಮನೆಯಲ್ಲಿ ಈ ಕಳ್ಳತನ ನಡೆದಿದ್ದು, ಸುಮಾರು 2 ಲಕ್ಷ ರೂ. ಮೌಲ್ಯದ ಚಿನ್ನಾಭರಣ ಕಳವಾಗಿದೆ. ಮನೆ ಹಿಂಬಾಗಿಲನ್ನು ತೆರೆದು ಒಳನುಗ್ಗಿದ ಕಳ್ಳರು ಕೋಣೆಯೊಳಗಿದ್ದ ಕಪಾಟನ್ನು ಒಡೆದು ಕರಿಮಣಿ ಸರ, ಬೆಂಡೋಲೆ, ಗಣಪತಿ ಪದಕ, ಹಾಗೂ ಮೂಗುತಿ ಸೇರಿದಂತೆ ಒಟ್ಟು 53 ಗ್ರಾಂ ತೂಕದ ಚಿನ್ನಾಭರಣವನ್ನು ಕೊಂಡೊಯ್ದಿದ್ದಾರೆ.

ಗುಣವತಿ ಅವರು ಮಧ್ಯಾಹ್ನ ಮನೆಗೆ ಬಂದು ನೋಡಿದಾಗ ಕಳ್ಳತನದ ವಿಚಾರ ಬೆಳಕಿಗೆ ಬಂದಿತ್ತು. ಬಂಟ್ವಾಳ ಗ್ರಾಮಾಂತರ ಠಾಣೆಯಲ್ಲಿ ದೂರು ದಾಖಲಾಗಿದೆ.