10ರಂದು ಜಯದೇವ ಹೃದ್ರೋಗ ಆಸ್ಪತ್ರೆ ಲೋಕಾರ್ಪಣೆ

ಮೈಸೂರು: ಹಳೇ ಮೈಸೂರು ಭಾಗದ ಹೃದ್ರೋಗಿಗಳಿಗೆ ಅನುಕೂಲವಾಗುವ ನಿಟ್ಟಿನಲ್ಲಿ ಮೈಸೂರಿನ ಮೇಟಗಳ್ಳಿಯಲ್ಲಿ ನಿರ್ಮಿಸಿರುವ 350 ಹಾಸಿಗೆ ಸಾಮರ್ಥ್ಯದ ಜಯದೇವ ಹೃದ್ರೋಗ ವಿಜ್ಞಾನ ಮತ್ತು ಸಂಶೋಧನಾ ಸಂಸ್ಥೆಯ ನೂತನ ಕಟ್ಟಡವನ್ನು ಮಂಗಳವಾರ ಮುಖ್ಯಮಂತ್ರಿ ಸಿದ್ದರಾಮಯ್ಯ ಲೋಕಾರ್ಪಣೆ ಮಾಡಲಿದ್ದಾರೆ ಎಂದು ಜಯದೇವ ಹೃದ್ರೋಗ ವಿಜ್ಞಾನ ಮತ್ತು ಸಂಶೋಧನಾ ಸಂಸ್ಥೆಯ ನಿರ್ದೇಶಕ ಡಾ.ಸಿ.ಎನ್‌.ಮಂಜುನಾಥ್‌.

ಭಾನುವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, 2010ರಲ್ಲಿ ಸರ್ಕಾರ ಮಂಜೂರು ಮಾಡಿದ 15 ಎಕರೆ ಜಾಗದಲ್ಲಿ ನಾಲ್ಕು ಅಂತಸ್ತಿನ ಸುಸಜ್ಜಿತ ಆಸ್ಪತ್ರೆ ಕಟ್ಟಡ ನಿರ್ಮಿಸಲಾಗಿದ್ದು, ಇನ್ನು 4 ರಿಂದ 6 ವಾರಗಳಲ್ಲಿ ಹೊಸ ಕಟ್ಟಡದಲ್ಲಿ ಪೂರ್ಣಪ್ರಮಾಣದಲ್ಲಿ ಆಸ್ಪತ್ರೆ ಕಾರ್ಯಾರಂಭ ಮಾಡಲಿದೆ. ಆಸ್ಪತ್ರೆಯ ಕಟ್ಟಡ ಕಾಮಗಾರಿಗೆ ಸರ್ಕಾರ 150 ಕೋಟಿ ರೂ. ಅನುದಾನ ನೀಡಿದ್ದು, ಆಸ್ಪತ್ರೆಯ ಉಪಕರಣಗಳು ಇನ್ನಿತರೆ ಆಂತರಿಕ ಸೌಲಭ್ಯಗಳಿಗೆ ಸಂಸ್ಥೆಯ ಆಂತರಿಕ ಸಂಪನ್ಮೂಲಗಳಿಂದ 60 ಕೋಟಿ ರೂ. ವೆಚ್ಚ ಮಾಡಲಾಗಿದೆ ಎಂದು ಹೇಳಿದರು.

3 ಐಸಿಯು ಘಟಕ: ನಾಲ್ಕು ಶಸ್ತ್ರಚಿಕಿತ್ಸಾ ಕೊಠಡಿಗಳು, ನಾಲ್ಕು ಕಾರ್ಡಿಯಾಕ್‌ ಕ್ಯಾತ್‌ಲ್ಯಾಬ್‌, 60 ಹಾಸಿಗೆಗಳ 3 ಐಸಿಯು ಘಟಕ, ಕಾರ್ಡಿಯಾಕ್‌ ಸಿ.ಟಿ. ಮತ್ತು ಎಂ.ಆರ್‌.ಐ ಸೌಲಭ್ಯ, ಹೊರರೋಗಿಗಳ ವಿಭಾಗ, ಒಳರೋಗಿಗಳ ವಿಭಾಗ, ಸಾಮಾನ್ಯ ವಾರ್ಡ್‌, ವಿಶೇಷ ವಾರ್ಡ್‌, ಡಿಲಕ್ಸ್‌ ವಾರ್ಡ್‌, ಎಕೋ ವಿಭಾಗ, ಟಿ.ಎಂ.ಟಿ. ವಿಭಾಗ ಇನ್ನಿತರೆ ಚಿಕಿತ್ಸಾ ಸೌಲಭ್ಯಗಳೂ ಇಲ್ಲೇ ದೊರೆಯುವ ಜತೆಗೆ 12 ಜನ ಹೃದ್ರೋಗ ತಜ್ಞರು, ಐವರು ಸರ್ಜನ್‌ಗಳು ಇಲ್ಲಿ ಕೆಲಸ ಮಾಡುವುದರಿಂದ ಇನ್ನು ಈ ಭಾಗದ ಹೃದ್ರೋಗಿಗಳು ಬೆಂಗಳೂರಿಗೆ ಬರಬೇಕಾದ ಅವಶ್ಯಕತೆ ಇಲ್ಲ.

ಜತೆಗೆ ಹೊಸ ಕಟ್ಟಡ ಪಂಚತಾರಾ ಸೌಲಭ್ಯ ಹೊಂದಿದ್ದರೂ ಚಿಕಿತ್ಸೆಯ ದರದಲ್ಲಿ ಹೆಚ್ಚಳ ಮಾಡುವುದಿಲ್ಲ ಎಂದು ಸ್ಪಷ್ಟಪಡಿಸಿದರು. 110 ಹಾಸಿಗೆ ಸಾಮರ್ಥ್ಯದ ಜಯದೇವ ಹೃದ್ರೋಗ ಆಸ್ಪತ್ರೆಯ ಮೈಸೂರು ಶಾಖೆಯು 2010ನೇ ಇಸವಿಯಿಂದ ಕೆ.ಆರ್‌. ಆಸ್ಪತ್ರೆಯ ಆವರಣದಲ್ಲಿ ಅತ್ಯುತ್ತಮವಾಗಿ ಕಾರ್ಯ ನಿರ್ವಹಿಸುತ್ತಿದ್ದು, ಕ

ಳೆದ ಏಳು ವರ್ಷಗಳಲ್ಲಿ 4.5 ಲಕ್ಷ ಹೊರ ರೋಗಿಗಳ ತಪಾಸಣೆ, 40 ಸಾವಿರ ಒಳ ರೋಗಿಗಳಿಗೆ ಚಿಕಿತ್ಸೆ, 16,500 ಆಂಜಿಯೋಗ್ರಾಮ್‌, 7,600 ಆಂಜಿಯೋಪ್ಲಾಸ್ಟಿ, 1.75 ಲಕ್ಷ ಎಕೋ ಕಾರ್ಡಿಯೋಗ್ರಾಮ್‌, 2.76 ಲಕ್ಷ ಇ.ಸಿ.ಜಿ., 350 ಬಲೂನ್‌ ವಾಲ್‌Ì ಲೋಪ್ಲಾಸ್ಟಿ, 450 ಫೇಸ್‌ಮೇಕರ್‌ ಇಂಪ್ಲಾಂಟೇಷನ್‌ ಚಿಕಿತ್ಸೆ ಮಾಡಿ ಸ್ಥಳೀಯವಾಗಿ ದಾಖಲೆ ಮಾಡಲಾಗಿದೆ ಎಂದರು.

ಸದ್ಯ ಮೈಸೂರು ಶಾಖೆಯಲ್ಲಿ ತಜ್ಞ ವೈದ್ಯರು, ಶುಶ್ರೂಷಕರುಗಳು, ತಂತ್ರಜ್ಞರು ಸೇರಿದಂತೆ ಒಟ್ಟು 180 ಸಿಬ್ಬಂದಿ ಕರ್ತವ್ಯ ನಿರ್ವಹಿಸುತ್ತಿದ್ದು, ಈ ಎಲ್ಲಾ ಸಿಬ್ಬಂದಿ ಹೊಸ ಕಟ್ಟಡಕ್ಕೆ ವರ್ಗಾವಣೆಯಾಗಲಿದ್ದಾರೆ ಎಂದು ತಿಳಿಸಿದರು.

ಟೆಲಿಮೆಡಿಸನ್‌: ಹೊಸ ಆಸ್ಪತ್ರೆ ಕಾರ್ಯಾರಂಭವಾದ ನಂತರ ಮೈಸೂರು ಸುತ್ತಮುತ್ತಲಿನ ಜಿಲ್ಲಾ ಮತ್ತು ತಾಲೂಕು ಆಸ್ಪತ್ರೆಗಳ ಜತೆಗೆ ಟೆಲಿಮೆಡಿಸನ್‌ ಆರಂಭಿಸಲಾಗುವುದು. ಸಾಮಾಜಿಕ ಜಾಲತಾಣಗಳನ್ನು ಬಳಸಿಕೊಂಡು ವೈದ್ಯಕೀಯ ವರದಿ ಆಧರಿಸಿ, ಸೂಕ್ತ ಚಿಕಿತ್ಸಾ ಸಲಹೆ ನೀಡಲಾಗುವುದು. ಜತೆಗೆ ಹೃದಯಾಘಾತಕ್ಕೆ ಒಳಗಾಗಿ ಬರುವವರಿಗಾಗಿಯೇ ಒಂದು ಕ್ಯಾತಲಾಬ್‌ ಮೀಸಲಿಡಲಾಗುವುದು.

ಇನ್ನು ಮುಂದೆ ತರೆದ ಹೃದಯ ಶಸ್ತ್ರಚಿಕಿತ್ಸೆಗೂ ಬೆಂಗಳೂರಿಗೆ ಬರಬೇಕಾದ ಅಗತ್ಯವಿಲ್ಲ ಎಂದು ತಿಳಿಸಿದರು. ಜಯದೇವ ಹೃದ್ರೋಗ ಸಂಸ್ಥೆಯ ಮೈಸೂರು ಶಾಖೆ ಮುಖ್ಯಸ್ಥ ಡಾ.ಸದಾನಂದ, ಬೆಂಗಳೂರಿನ ಡಾ.ರವೀಂದ್ರನಾಥ್‌, ಮೈಸೂರು ಶಾಖೆ ಮುಖ್ಯ ಆಡಳಿತಾಧಿಕಾರಿ ಚಿಕ್ಕತಿಮ್ಮಯ್ಯ, ಕಾಳಪ್ಪ ಇದ್ದರು.

ತುರ್ತು ಸಂದರ್ಭದಲ್ಲಾದರೂ ಖಾಸಗಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಮೊದಲು-ಪಾವತಿ ನಂತರ ಎನ್ನುವ ಭಾವನೆ ಬರಬೇಕು. ಜಯದೇವ ಹೃದ್ರೋಗ ಆಸ್ಪತ್ರೆಯಲ್ಲಿ ಮಾನವೀಯತೆಗೆ ಮೊದಲ ಆದ್ಯತೆ.
-ಡಾ.ಸಿ.ಎನ್‌.ಮಂಜುನಾಥ್‌, ನಿರ್ದೇಶಕರು, ಜಯದೇವ ಹೃದ್ರೋಗ ಸಂಸ್ಥೆ