ಸಾಯಿಕುಮಾರ್‌ ಪ್ರಮುಖ ಪಾತ್ರದಲ್ಲಿ ನಟಿಸಿರುವ “ಜವ’ ಚಿತ್ರದ ಆಡಿಯೋ ಬಿಡುಗಡೆ ಇತ್ತೀಚೆಗೆ ನಡೆಯಿತು. ನಟ ಶಿವರಾಜಕುಮಾರ್‌ ಆಡಿಯೋ ಬಿಡುಗಡೆ ಮಾಡಿ ಚಿತ್ರತಂಡಕ್ಕೆ ಶುಭಕೋರಿದರು. “ಚಿತ್ರದ ಟೈಟಲ್‌ ವಿಭಿನ್ನವಾಗಿದ್ದು, ಸಿನಿಮಾ ನೋಡಬೇಕು ಎನಿಸುವಂತಿದೆ. ಹೊಸಬರ ತಂಡಕ್ಕೆ ಒಳ್ಳೆಯದಾಗಲಿ’ ಎಂದು ಶುಭ ಹಾರೈಸಿದರು. ಅಂದಹಾಗೆ, “ಜವ’ ಚಿತ್ರವನ್ನು ಅಭಯ್‌ ಚಂದ್ರ ನಿರ್ದೇಶಿಸಿದ್ದಾರೆ. ಇವರಿಗಿದು ಮೊದಲ ಸಿನಿಮಾ.
“ಜವ’ ಒಂದು ಮಿಸ್ಟರಿ-ಥ್ರಿಲ್ಲರ್‌ ಕಥೆಯಾಗಿದ್ದು, ಚಿಕ್ಕಮಗಳೂರು ಸುತ್ತಮುತ್ತ ಚಿತ್ರೀಕರಣವಾಗಿದೆ. ಚಿತ್ರಕ್ಕೆ ಅಭಯ್‌ ಚಂದ್ರ ಸಹೋದರ ವಿನಯ್‌ ಚಂದ್ರ ಸಂಗೀತ ನೀಡಿದ್ದಾರೆ. ಸನ್ನಿವೇಶಕ್ಕೆ ತಕ್ಕಂತಹ ಹಾಡುಗಳಿದ್ದು, ಜನಕ್ಕೆ ಇಷ್ಟವಾಗುವ ವಿಶ್ವಾಸ ಅವರಿಗಿದೆ. ಈ ಚಿತ್ರವನ್ನು ತಮ್ಮದೇ ನಿರ್ಮಾಣ ಸಂಸ್ಥೆ ಹುಟ್ಟುಹಾಕಿ ನಿರ್ಮಿಸಿದ್ದಾಗಿ ಹೇಳಿಕೊಂಡರು.
ಚಿತ್ರದ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಸಾಯಿಕುಮಾರ್‌ ಅವರಿಗೆ “ಜವ’ ಒಂದು ವಿಭಿನ್ನ ಸಿನಿಮಾ ಎನಿಸಿದೆಯಂತೆ. ಜೊತೆಗೆ ಸಹೋದರರಾದ ವಿನಯ್‌ ಚಂದ್ರ ಹಾಗೂ ಅಭಯ್‌ ಚಂದ್ರ ಅವರ ಸಿನಿಮಾ ಪ್ರೀತಿ ಕೂಡಾ ಇಷ್ಟವಾಗಿದ್ದಾಗಿ ಹೇಳುತ್ತಾರೆ ಸಾಯಿಕುಮಾರ್‌. “ರಂಗಿತರಂಗ’ ಮಾಡುವಾ ಅನೂಪ್‌ ಹಾಗೂ ನಿರೂಪ್‌ ಅವರನ್ನು ರಾಮ-ಲಕ್ಷ್ಮಣ ಎಂದು ಕರೆಯುತ್ತಿದ್ದೆ.
ಈ ಅಣ್ಣ-ತಮ್ಮಂದಿರನ್ನು ಲವ-ಕುಶ ಎಂದು ಕರೆಯಲಿಚ್ಛಿಸುತ್ತೇನೆ. ಕನ್ನಡದಲ್ಲಿ ಈಗ ಸಾಕಷ್ಟು ಪ್ರಯೋಗಾತ್ಮಕ, ಹೊಸ ಬಗೆಯ ಸಿನಿಮಾಗಳು ಬರುತ್ತಿವೆ. ಆ ಸಾಲಿಗೆ “ಜವ’ ಕೂಡಾ ಸೇರುತ್ತದೆ ಎಂಬ ನಂಬಿಕೆ ಇದೆ’ ಎನ್ನುವುದು ಸಾಯಿಕುಮಾರ್‌ ಮಾತು. ಆಡಿಯೋ ಬಿಡುಗಡೆಯಲ್ಲಿ ನಟಿ ಭಾವನಾ, ಅನೂಪ್‌ ರೇವಣ್ಣ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.
