ಜಮ್ಮು ಕಾಶ್ಮೀರದಲ್ಲಿ ಮೂವರು ಜೈಶ್‌ ಉಗ್ರರ ಸೆರೆ; ಅಪಾರ ಶಸ್ತ್ರಾಸ್ತ್ರ ವಶ

ಹೊಸದಿಲ್ಲಿ : ಜಮ್ಮು ಕಾಶ್ಮೀರ ಪೊಲೀಸರು ನಿನ್ನೆ ಭಾನುವಾರ ಶ್ರೀನಗರ – ಬಾರಾಮುಲ್ಲಾ ಹೆದ್ದಾರಿಯಲ್ಲಿನ ನರಬಾಲ್‌ ಚೆಕ್‌ ಪಾಯಿಂಟ್‌ ಸಮೀಪ ಜೈಶ್‌ ಎ ಮೊಹಮ್ಮದ್‌ ಉಗ್ರ ಸಂಘಟನೆಯ ಮೂವರು ಭಯೋತ್ಪಾದಕರನ್ನು ಬಂಧಿಸಿದರು.

ಬಂಧಿತ ಉಗ್ರರಿಂದ ಪೊಲೀಸರು ಅಪಾರ ಪ್ರಮಾಣದ ಮದ್ದು ಗುಂಡು, ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಂಡಿದ್ದಾರೆ. ಈ ಸಂಬಂಧ ಪೊಲೀಸರು ಬಂಧಿತ ಉಗ್ರರ ವಿರುದ್ದ ಕೇಸು ದಾಖಲಿಸಿದ್ದಾರೆ.

ಮೂವರು ಜೈಶ್‌ ಉಗ್ರರು ಕಾರಿನಲ್ಲಿ ಸಾಗುತ್ತಿದ್ದಾರೆ ಎಂಬ ಖಚಿತ ಮಾಹಿತಿಯನ್ನು ಅನುಸರಿಸಿ ಪೊಲೀಸರು ಅವರನ್ನು ಶ್ರೀನಗರ – ಬಾರಾಮುಲ್ಲಾ ಹೆದ್ದಾರಿಯಲ್ಲಿನ ಲವಯಪೋರಾ ಎಂಬಲ್ಲಿ ಕಾರನ್ನು ತಡೆದು ಸೆರೆಹಿಡಿದರು.

ಬಂಧಿತ ಉಗ್ರರನ್ನು ರಯೀಸ್‌ ಹುರಾಹ್‌, ಶಾಹೀದ್‌ ಭಟ್‌, ಮತ್ತು ಇಷ್‌ಫಾಕ್‌ ಲೋನ್‌ ಎಂದು ಗುರುತಿಸಲಾಗಿದೆ.