ಮನೆಗೆ ನುಗ್ಗಿ ಬಿಎಸ್‌ಎಫ್ ಯೋಧನ ಕೊಂದ ಉಗ್ರರು

ಶ್ರೀನಗರ: ರಜೆ ಮೇಲೆ ಮನೆಗೆ ಬಂದಿದ್ದ ಬಿಎಸ್‌ಎಫ್ ಯೋಧನನ್ನು ಉಗ್ರಗಾಮಿಗಳು ಮನೆಗೆ ನುಗ್ಗಿ ಗುಂಡಿಕ್ಕಿ ಕೊಂದಿರುವ ಘಟನೆ ಬುಧವಾರ ರಾತ್ರಿ ಉತ್ತರ ಕಾಶ್ಮೀರದಲ್ಲಿ ನಡೆದಿದೆ.

ಬಿಎಸ್‌ಎಫ್ ಕಾನ್‌ಸ್ಟೆಬಲ್‌ ರಮೀಜ್‌ ಅಹ್ಮದ್‌ ಪರ್ರಾಯ್‌ (28) ಹುತಾತ್ಮ ಯೋಧ. ಘಟನೆ ನಡೆದ ಹಿಂದಿನ ದಿನ ರಾತ್ರಿ ಸ್ಥಳೀಯ ಪೊಲೀಸರು ಪರ್ರಾಯ್‌ ಮೊಹಲ್ಲಾದಲ್ಲಿ ಉಗ್ರಗಾಮಿಗಳ ವಿರುದ್ಧ ಕಾರ್ಯಾಚರಣೆ ಕೈಗೊಂಡಿದ್ದು, ಇದರಲ್ಲಿ ರಮೀಜ್‌ ಕೂಡ ಪಾಲ್ಗೊಂಡಿದ್ದರು. ಸೇಡು ತೀರಿಸಿಕೊಳ್ಳಲು ಉಗ್ರರು ಈ ಕೃತ್ಯ ಎಸಗಿದ್ದಾರೆ ಎನ್ನಲಾಗಿದೆ.

ತನ್ನ ಇಬ್ಬರು ತಮ್ಮಂದಿರಿಗೆ ಕೆಲಸ ಹುಡುಕಿ ಕೊಡಲೆಂದು ಕರ್ತವ್ಯಕ್ಕೆ ರಜೆ ಹಾಕಿ ಅ.26ರಂದು ಗ್ರಾಮಕ್ಕೆ ಬಂದಿದ್ದ ರಮೀಜ್‌ ಅಹ್ಮದ್‌, ಕುಟುಂಬದ ಏಕೈಕ ಆಧಾರವಾಗಿದ್ದರು. ಬುಧವಾರ ರಾತ್ರಿ ರಮೀಜ್‌ ತನ್ನ ಸೋದರರು ಹಾಗೂ ತಂದೆ ಜತೆ ಸಂಬಂಧಿಯ ಮನೆಗೆ ತೆರಳಿದ್ದು, ರಾತ್ರಿ 9.25ರ ವೇಳೆಗೆ ಮನೆಗೆ ನುಗ್ಗಿದ ಇಬ್ಬರು ಉಗ್ರರು ಏಕಾಏಕಿ ಗುಂಡಿನ ದಾಳಿ ಆರಂಭಿಸಿದ್ದಾರೆ. ಸುಮಾರು ಅರ್ಧ ಗಂಟೆ ಕಾಲ ಉಗ್ರರ ವಿರುದ್ಧ ವೀರಾವೇಷದಿಂದ ಹೋರಾಡಿದ್ದು, ಕಡೆಗೆ ಉಗ್ರರು ಅವರನ್ನು ಗನ್‌ಪಾಯಿಂಟ್‌ನಲ್ಲಿ ಶೂಟ್‌ ಮಾಡಿದರು.