ಸಾಮಾನ್ಯವಾಗಿ ಒಂದು ಸಿನಿಮಾ ರಿಲೀಸ್ ಗೆ ಬಂದರೆ ಅದರ ಪೋಸ್ಟರ್ ಗಳು ಹೇಗಿರುತ್ತವೆ ಹೇಳಿ? ಸಿನಿಮಾದ ಹೀರೋ ಅಥವಾ ಹೀರೋ-ಹೀರೋಯಿನ್‌ ಇಬ್ಬರೂ ಇರುವ ವಿಭಿನ್ನ ಪೋಸ್ಟರ್‌ಗಳನ್ನು ಬಿಡುಗಡೆ ಮಾಡಿ ಸಿನಿಮಾದ ಪ್ರಮೋಶನ್‌ ಆರಂಭಿಸುತ್ತದೆ. ಆದರೆ, ಇಲ್ಲೊಂದು ಚಿತ್ರತಂಡ ಮಾತ್ರ ಸಿನಿಮಾದ ಯಾವ ಆರ್ಟಿಸ್ಟ್‌ ಫೋಟೋ ಬಳಸದೇ ವಿಭಿನ್ನ ರೀತಿಯ ಪೋಸ್ಟರ್ ಬಿಡುಗಡೆ ಮಾಡಿ ಗಮನ ಸೆಳೆದಿದೆ. ಅದು ಜಗ್ಗೇಶ್ ನಾಯಕರಾಗಿರುವ “ತೋತಾಪುರಿ-2′ ಚಿತ್ರ.
ಹೌದು, ಜಗ್ಗೇಶ್-ಧನಂಜಯ್ ಮುಖ್ಯಭೂಮಿಕೆಯಲ್ಲಿರುವ “ತೋತಾಪುರಿ-2′ ಚಿತ್ರ ಬಿಡುಗಡೆಯ ಹಂತಕ್ಕೆ ಬಂದಿದೆ. ಮೊದಲ ಹಂತವಾಗಿ ಚಿತ್ರತಂಡ ರಿಲೀಸ್ ಮಾಡಿರುವ ಪೋಸ್ಟರ್‌ಗಳು ಗಮನ ಸೆಳೆಯುತ್ತಿವೆ.
ಮೊದಲ ದಿನ ರಾಮ, ಮಾರನೇ ದಿನ ರಾಮ+ಆಂಜನೇಯ, ಮತ್ತೂಂದು ದಿನ ಗಣೇಶ ಹಾಗೂ ಕೃಷ್ಣ..! ಹೀಗೆ ದಿನಕ್ಕೊಂದು ಪೋಸ್ಟರ್ ಬಿಟ್ಟು ಕುತೂಹಲ ಮೂಡಿಸಿದೆ
“ತೋತಾಪುರಿ-2′. ಔಟ್‌ ಅಂಡ್‌ ಔಟ್‌ ಕಮರ್ಷಿಯಲ್‌ ಸಿನಿಮಾವೊಂದು ಈ ರೀತಿಯ ಪೋಸ್ಟರ್ ಬಿಟ್ಟಿರೋದು ಸಖತ್‌ ವೈರಲ್ ಆಗಿದ್ದು, ಚಿತ್ರತಂಡದ ಮೊಗದಲ್ಲಿ ನಗು ಮೂಡಿದೆ. ಕಾಮಿಡಿ ಸಿನಿಮಾವೊಂದರ ಪೋಸ್ಟರ್‌ಗೆ ಧಾರ್ಮಿಕ ಟಚ್‌ ನೀಡಿರುವುದು ಯಾಕೆ ಎಂಬ ಕುತೂಹಲ ಸಿನಿಪ್ರೇಮಿಗಳದ್ದು. ಕೆಲವು ಸಿನಿಮಾಗಳ ಪೋಸ್ಟರ್‌ಗೂ ಸಿನಿಮಾದೊಳಗಿರುವ ಕಥೆಗೂ ಸಂಬಂಧವಿರುವುದಿಲ್ಲ, ಇನ್ನು ಕೆಲವು ಸಿನಿಮಾಗಳು ಥೀಮ್‌ ಪೋಸ್ಟರ್ ಬಿಡುಗಡೆ ಮಾಡಿ, ಆ ಮೂಲಕ ತಮ್ಮ ಸಿನಿಮಾದೊಳಗಿನ ಕಥೆಯ ಬಗ್ಗೆ ಪ್ರೇಕ್ಷಕರಿಗೆ ಒಂದು ಸ್ಪಷ್ಟತೆ ಕೊಡುತ್ತಾರೆ. ಹಾಗಾದರೆ, “ತೋತಾಪುರಿ-2′ ಪೋಸ್ಟರ್‌ನ ಹಿಂದಿನ ಉದ್ದೇಶವೇನು ಎಂಬುದು ಸ್ಪಷ್ಟವಾಗಿಲ್ಲ.
“ತೋತಾಪುರಿ-2′ ಚಿತ್ರದ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳು ಮುಕ್ತಾಯದ ಹತದಲ್ಲಿದ್ದು, ಶೀಘ್ರದಲ್ಲೇ ಚಿತ್ರತಂಡ ಬಿಡುಗಡೆ ದಿನಾಂಕ ಅನೌನ್ಸ್‌ ಮಾಡಿದೆ. ವಿಜಯಪ್ರಸಾದ್‌ ನಿರ್ದೇಶನದ ಈ ಚಿತ್ರವನ್ನು ಸುರೇಶ್‌ ಆರ್ಟ್ಸ್ನಡಿ ಕೆ.ಎ.ಸುರೇಶ್‌ ನಿರ್ಮಿಸಿದ್ದಾರೆ.
ಚಿತ್ರದಲ್ಲಿ ಜಗ್ಗೇಶ್, ಡಾಲಿ ಧನಂಜಯ್, ದತ್ತಣ್ಣ, ಸುಮನ್‌ ರಂಗನಾಥ್‌, ಅದಿತಿ ಪ್ರಭುದೇವ, ವೀಣಾ ಸುಂದರ್‌, ಹೇಮಾದತ್‌ ಮುಂತಾದವರು ನಟಿಸಿದ್ದಾರೆ
