ITF; ಋತುಜಾಗೆ ಸೋಲು: ಭಾರತದ ಸವಾಲು ಅಂತ್ಯ

ಬೆಂಗಳೂರು: ಭಾರತದ ಆಟಗಾರ್ತಿ ಋತುಜಾ ಭೋಸಲೆ, ಇಲ್ಲಿನ ಕೆಎಸ್‌ಎಲ್‌ಟಿಎ ಟೆನಿಸ್‌ ಅಂಕಣದಲ್ಲಿ ನಡೆಯುತ್ತಿರುವ ಮಹಿಳಾ ಐಟಿಎಫ್ ಕೂಟದಲ್ಲಿ ಸೋತು ಹೊರಬಿದ್ದಿದ್ದಾರೆ.

ಸೆಮಿಫೈನಲ್‌ನಲ್ಲಿ ಅವರು ಫ್ರಾನ್ಸ್‌ನ ಕೆರೋಲ್‌ ಮಾನೆಟ್‌ ಎದುರು 2-6, 0-6 ಸೆಟ್‌ಗಳಿಂದ ಸೋಲನ್ನು ಕಂಡರು. ಇನ್ನೊಂದು ಸೆಮಿಫೈನಲ್‌ ಪಂದ್ಯದಲ್ಲಿ ಲಾತ್ವಿಯದ ದರ್ಜಾ ಸೆಮಿನಿಸ್ಟಜಾ 6-4, 6-1 ಸೆಟ್‌ಗಳಿಂದ ಜಪಾನಿನ ನಾಹೊ ಸಾಟೊ ವಿರುದ್ಧ ಗೆಲುವು ಸಾಧಿಸಿದರು. ಮಾನೆಟ್‌ ಮತ್ತು ದರ್ಜಾ ನಡುವೆ ಫೈನಲ್‌ ನಡೆಯಲಿದೆ.

ಋತುಜಾ 63 ನಿಮಿಷಗಳ ಹೋರಾಟದಲ್ಲಿ ಯಾವುದೇ ಹೋರಾಟವನ್ನು ತೋರಿಸಲಿಲ್ಲ. ಎದುರಾಳಿಗೆ ಸುಲಭವಾಗಿ ಅಂಕಗಳನ್ನು ಬಿಟ್ಟುಕೊಟ್ಟರು. ಅವರ ಸೋಲಿನೊಂದಿಗೆ ಕೂಟದಲ್ಲಿ ಭಾರತೀಯರ ಸ್ಪರ್ಧೆ ಅಂತ್ಯಗೊಂಡಿತು.

ಡಬಲ್ಸ್‌ ನಲ್ಲೂ ದರ್ಜಾಗೆ ಪ್ರಶಸ್ತಿ
ಶನಿವಾರ ನಡೆದ ಮಹಿಳಾ ಡಬಲ್ಸ್‌ ಫೈನಲ್‌ನಲ್ಲಿ ದರ್ಜಾ ಸೆಮಿನಿಸ್ಟಜಾ-ಕೆಮಿಲ್ಲಾ ರೊಸಾಟೆಲ್ಲೊ ಜೋಡಿ 3-6, 6-2, 10-8 ಅಂಕಗಳಿಂದ ಯು ಯನ್‌ ಲಿ-ಎರಿ ಶಿಮಿಜು ಅವರನ್ನು ಮಣಿಸಿತು. ದರ್ಜಾ ಜೋಡಿಗೆ ಡಬಲ್ಸ್‌ನಲ್ಲೂ ಪ್ರಶಸ್ತಿ ಲಭಿಸಿತು.