Politics: ಹೋಳಾಗಿರುವ ಉದ್ಧವ್‌ ಶಿವಸೇನೆ ಬಣಕ್ಕೆ 23 ಕ್ಷೇತ್ರ ಕೊಡೋದು ಕಷ್ಟ: ಕಾಂಗ್ರೆಸ್‌

ಹೊಸದಿಲ್ಲಿ: ಮುಂದಿನ ಲೋಕಸಭೆ ಚುನಾವಣೆಯಲ್ಲಿ ಮಹಾರಾಷ್ಟ್ರದಲ್ಲಿ 23 ಸ್ಥಾನಗಳನ್ನು ನೀಡಬೇಕು ಎಂಬ ಶಿವ ಸೇನೆಯ ಉದ್ಧವ್‌ ಠಾಕ್ರೆ ಬಣದ ಬೇಡಿಕೆ ಪುರಸ್ಕರಿಸಲು ಸಾಧ್ಯವಿಲ್ಲ ಎಂದ ಕಾಂಗ್ರೆಸ್‌ ಮೂಲಗಳು ಹೇಳಿವೆ. ಶಿವ ಸೇನೆ ಈಗಾಗಲೇ ವಿಭಜನೆಯಾಗಿರುವು ದರಿಂದ ಕೇಳಿದಷ್ಟು ಸ್ಥಾನ ಕೊಡಲು ಸಾಧ್ಯವಿಲ್ಲ ಎಂಬ ಅಭಿಪ್ರಾಯವನ್ನು ಕಾಂಗ್ರೆಸ್‌ ವರಿಷ್ಠರು ಮಾಜಿ ಸಿಎಂ ಉದ್ಧವ್‌ ಠಾಕ್ರೆ ಅವರಿಗೆ ತಿಳಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಪಕ್ಷ ವಿಭಜನೆಗೊಂಡಿರುವಾಗ ಉದ್ಧವ್‌ ಠಾಕ್ರೆ ಅವಾಸ್ತವಿಕ ಬೇಡಿಕೆಯನ್ನು ಮುಂದಿಟ್ಟಿದ್ದಾರೆ ಎಂದು ಕಾಂಗ್ರೆಸ್‌ ನಾಯಕರು ಅಭಿಪ್ರಾಯಪಟ್ಟಿದ್ದಾರೆ. ಅದಕ್ಕೆ ಪೂರಕವಾಗಿ ಮಹಾರಾಷ್ಟ್ರ ವಿಧಾನ ಸಭೆ ಸ್ಪೀಕರ್‌ ರಾಹುಲ್‌ ನಾರ್ವೇಕರ್‌ ಸಿಎಂ ಏಕನಾಥ ಶಿಂಧೆ ಬಣವೇ ನಿಜವಾದ ಶಿವಸೇನೆ ಎಂದು ಬುಧವಾರ ಘೋಷಣೆ ಮಾಡಿರುವುದು ಉದ್ಧವ್‌ ಠಾಕ್ರೆ ಬಣಕ್ಕೆ ಭಾರೀ ಹಿನ್ನಡೆಯಾಗಿದೆ. ಇತ್ತೀಚೆಗೆ ಹೊಸದಿಲ್ಲಿಯಲ್ಲಿ ನಡೆದ “ಇಂಡಿಯಾ’ ಒಕ್ಕೂಟದ ಸಭೆಯಲ್ಲಿ ಎನ್‌ಸಿಪಿ ಕೂಡ ಭಾಗವಹಿಸಿತ್ತು. ಆದರೆ ಈ ವೇಳೆ ಪಕ್ಷವು ಸ್ಥಾನ ಹಂಚಿಕೆ ಕುರಿತು ಯಾವುದೇ ಚರ್ಚೆ ನಡೆಸಿಲ್ಲ. ಆದರೆ ಪ್ರಕಾಶ್‌ ಅಂಬೇಡ್ಕರ್‌ ಅವರ ವಂಚಿತ್‌ ಬಹುಜನ್‌ ಅಘಾಡಿ ಅನ್ನು ಐ.ಎನ್‌.ಡಿ.ಐ.ಎ. ಒಕ್ಕೂಟಕ್ಕೆ ಸೇರಿ ಸುವಂತೆ ಎನ್‌ಸಿಪಿ ಮನವಿ ಮಾಡಿದೆ. ಸೀಟು ಹಂಚಿಕೆ ಬಗ್ಗೆ ಮುಂದಿನ ಸಭೆಗಳಲ್ಲಿ ನಿರ್ಧರಿಸುವುದಾಗಿ ಹೇಳಿದೆ.

12ರಂದು ಚರ್ಚೆ: “ಮುಂದಿನ ಲೋಕ ಸಭೆಯಲ್ಲಿ ಸೀಟು ಹಂಚಿಕೆ ಕುರಿತು ಜ.12ರಂದು ನಡೆಯುವ ಸಭೆಯಲ್ಲಿ ಆಪ್‌ ಪಕ್ಷದೊಂದಿಗೆ ಚರ್ಚಿಸಲಾಗು ವುದು. ಜ.8ರ ಮೊದಲ ಸಭೆಯಲ್ಲಿ ಸೀ ಟು ಹಂಚಿಕೆ ಕುರಿತು ಚರ್ಚೆ ನಡೆದಿಲ್ಲ” ಎಂದು ದಿಲ್ಲಿ ಕಾಂಗ್ರೆಸ್‌ ಅಧ್ಯಕ್ಷ ಅರವಿಂದ್‌ ಸಿಂಗ್‌ ಲವ್ಲಿ ತಿಳಿಸಿದ್ದಾರೆ.

ಇನ್ನೊಂದೆಡೆ, ಲೋಕಸಭೆ ಚುನಾವ ಣೆಗೆ ದಿಲ್ಲಿ, ಪಂಜಾಬ್‌, ಹರಿಯಾಣ, ಗೋವಾ ಮತ್ತು ಗುಜರಾತ್‌ನಿಂದ ಆಪ್‌ ಸ್ಪರ್ಧಿಸಲಿದೆ ಎಂದು ಆಪ್‌ ದಿಲ್ಲಿ ಸಂಚಾಲಕ ಗೋಪಾಲ್‌ ರೈ ಹೇಳಿದ್ದಾರೆ.