ಇಸ್ರೇಲ್‌ ಪಿಎಂಗೆ ಮೈಸೂರು ಸೈನಿಕರ ಕಂಚಿನ ಪ್ರತಿಮೆ ಗಿಫ್ಟ್?

ನವದೆಹಲಿ: ಇಸ್ರೇಲ್‌ ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು ಜ.14ರಿಂದ 17ರ ವರೆಗೆ ಭಾರತ ಪ್ರವಾಸ ಕೈಗೊಳ್ಳಲಿದ್ದಾರೆ. ಈ ಸಂದರ್ಭದಲ್ಲಿ ಅವರಿಗೆ ಮೈಸೂರು, ಹೈದರಾಬಾದ್‌ ಮತ್ತು ಜೋಧ್‌ಪುರದ ಅಶ್ವಾರೋಹಿ ಪಡೆಯ ಮೂರು ಕಂಚಿನ ಪ್ರತಿಮೆಗಳನ್ನು ಸ್ಮರಣಿಕೆಯನ್ನಾಗಿ ನೀಡಲಾಗುತ್ತದೆ.

ಈ ಮೂರು ಪಡೆಗಳು 1918ರ ಸೆ.23ರಂದು ಮೊದಲ ವಿಶ್ವ ಮಹಾಯುದ್ಧದ ಕೊನೆಯ ಸಂದರ್ಭದಲ್ಲಿ ಸೈನಿ ಮತ್ತು ಪ್ಯಾಲೆಸ್ತೀನ್‌ ಪರ ನಡೆದ ಹೋರಾಟದಲ್ಲಿ ಹೈಫಾ ನಗರವನ್ನು ಒಟ್ಟಮನ್ಸ್‌ ಪಡೆಯಿಂದ ವಶಪಡಿಸುವಲ್ಲಿ ಯಶಸ್ವಿಯಾಗಿದ್ದವು. ಈ ಕಾಳಗದಲ್ಲಿ 44 ಮಂದಿ ಭಾರತೀಯ ಯೋಧರು ಹುತಾತ್ಮರಾಗಿದ್ದರು.

“ಹೈಫಾ ದಿನಾಚರಣೆ’ಯನ್ನು ಇದುವರೆಗೆ ಪ್ರತಿವರ್ಷ ಸೆ.23ರಂದು ಆಚರಿಸಲಾಗುತ್ತದೆ. ಗಮನಾರ್ಹ ಅಂಶವೆಂದರೆ 2003ರಲ್ಲಿ ಇಸ್ರೇಲ್‌ನ ಪ್ರಧಾನಿಯಾಗಿದ್ದ ಏರಿಯಲ್‌ ಶೆರೋನ್‌ ಭಾರತಕ್ಕೆ ಭೇಟಿ ನೀಡಿದ ಬಳಿಕ ಇದೇ ಮೊದಲ ಬಾರಿಗೆ ಹಾಲಿ ಪಿಎಂ ಬೆಂಜಮಿನ್‌ ನೆತನ್ಯಾಹು 2 ದಿನಗಳ ಪ್ರವಾಸ ಕೈಗೊಂಡಿದ್ದಾರೆ.

ಭಾರತ ಮತ್ತು ಇಸ್ರೇಲ್‌ ಪಿಎಂಗಳ ಮೊದಲ ಭೇಟಿ ನವದೆಹಲಿಯ ತೀನ್‌ಮೂರ್ತಿ ಭವನದಲ್ಲಿ ನಡೆಯಲಿದೆ. 17ರಂದು ಗುಜರಾತ್‌ ಪ್ರವಾಸದ ವೇಳೆ ಅಹಮದಾಬಾದ್‌ ಏರ್‌ಪೋರ್ಟ್‌ನಿಂದ ಸಾಬರಮತಿ ಆಶ್ರಮದ ವರೆಗೆ 8 ಕಿಮೀ ರೋಡ್‌ ಶೋ ನಡೆಸಲಿದ್ದಾರೆ. ಈ ಹಿಂದೆ ಜಪಾನ್‌ ಪ್ರಧಾನಿ ಶಿಂಜೋ ಅಬೆ ಪ್ರವಾಸ ಕೈಗೊಂಡಿದ್ದ ವೇಳೆ ಇದೇ ಮಾದರಿ ರೋಡ್‌ ಶೋ ನಡೆಸಲಾಗಿತ್ತು.