ಬಿಹಾರದಲ್ಲಿ ಐಸಿಸ್‌ ಪೋಸ್ಟರ್‌ ಪತ್ತೆ: ಸದಸ್ಯರಾಗುವಂತೆ ಯುವಕರಿಗೆ ಗಾಳ

ದೆಹರಿ ಆನ್‌ ಸೋನೆ, ಬಿಹಾರ : ಬಿಹಾರದ ರೋಹಟಾಸ್‌ ಜಿಲ್ಲೆಯಲ್ಲಿಂದು ಐಸಿಸ್‌ ಉಗ್ರ ಸಂಘಟನೆಯ ಪೋಸ್ಟರ್‌ ಒಂದು ವಿದ್ಯುತ್‌ ಕಂಬವೊಂದಕ್ಕೆ ಅಂಟಿಸಲಾಗಿರುವುದು ಕಂಡು ಬಂದಿದೆ. ಐಸಿಸ್‌ ಸದಸ್ಯರಾಗುವಂತೆ ಈ ಪೋಸ್ಟರ್‌ನಲ್ಲಿ ಬಿಹಾರದ ಯುವಕರನ್ನು ಕೇಳಿಕೊಳ್ಳಲಾಗಿದೆ.

ಪೋಸ್ಟರ್‌ನಲ್ಲಿ ಐಸಿಸ್‌ ಹೆಸರು ಮತ್ತು ಧ್ವಜದ ಚಿತ್ರವಿದೆ. ಈ ಪೋಸ್ಟರ್‌ ಪತ್ತೆಯಾದೊಡನೆಯೇ ಅದನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ ಎಂದು ದೆಹರಿಯ ಉಪ ವಿಭಾಗೀಯ ಪೊಲೀಸ್‌ ಅಧಿಕಾರಿ ಮೊಹಮ್ಮದ್‌ ಅನ್ವರ್‌ ಜಾವೇದ್‌ ಅನ್ಸಾರಿ ತಿಳಿಸಿದ್ದಾರೆ.

ಐಸಿಸ್‌ ಪೋಸ್ಟರ್‌ ಇಂಗ್ಲಿಷ್‌ನಲ್ಲಿದ್ದು ಅದನ್ನು ಹೊರಡಿಸಿದ ವ್ಯಕ್ತಿಯ ಹೆಸರು ಅದರಲ್ಲಿ ಇಲ್ಲ. ಇದೀಗ ಈ ಪೋಸ್ಟರ್‌ ಬಗ್ಗೆ ತನಿಖೆಯನ್ನು ಆದೇಶಿಸಲಾಗಿದೆ ಎಂದು ಎಸ್‌ಡಿಓಪಿ ತಿಳಿಸಿದ್ದಾರೆ.

ಇದು ಕೆಲ ಸ್ಥಳೀಯ ಸಮಾಜ ವಿರೋಧಿ ಶಕ್ತಿಗಳು ಜನರಲ್ಲಿ ಭೀತಿ ಹುಟ್ಟಿಸುವ ಉದ್ದೇಶದಲ್ಲಿ ನಡೆಸಿರುವ ಕುಚೋದ್ಯವಾಗಿದೆ ಎಂದು ಪೊಲೀಸರು ಶಂಕಿಸಿದ್ದಾರೆ. ಹಾಗಿದ್ದರೂ ಪೊಲೀಸರು ಈ ಬಗ್ಗೆ ಕಟ್ಟೆಚ್ಚರದಿಂದ ಇರುವಂತೆ ಸೂಚಿಸಲಾಗಿದೆ ಎಂದು ಎಸ್‌ಡಿಓಪಿ ತಿಳಿಸಿದ್ದಾರೆ.