ಇರಾನ್‌ : ದಾಖಲೆ ಸಂಖ್ಯೆಯ ಸೋಂಕು

ಟೆಹ್ರಾನ್‌ : ಇರಾನ್‌ನಲ್ಲಿ ಗುರುವಾರ ಒಂದೇ ದಿನ 3,574 ಕೋವಿಡ್‌ ಸೋಂಕಿನ ಪ್ರಕರಣಗಳು ವರದಿಯಾಗುವುದರೊಂದಿಗೆ ಫೆಬ್ರವರಿಯಿಂದೀಚೆಗಿನ ಎಲ್ಲ ದಾಖಲೆಗಳು ಮುರಿದಿವೆ. ಇರಾನ್‌ನಲ್ಲಿ ಮೊದಲ ಸೋಂಕು ದೃಢವಾದದ್ದು ಫೆಬ್ರವರಿಯಲ್ಲಿ. ಅನಂತರ ಮಾ.30ರಂದು ಒಂದೇ ದಿನ 3,186 ಸೋಂಕಿನ ಪ್ರಕರಣಗಳು ಪತ್ತೆಯಾದದ್ದು ಇಷ್ಟರ ತನಕದ ದಾಖಲೆಯಾಗಿತ್ತು. ಕಳೆದ ನಾಲ್ಕು ದಿನಗಳಲ್ಲಿ ಸತತವಾಗಿ ಸರಾಸರಿ 3,000ದಂತೆ ಹೊಸ ಸೋಂಕಿತರು ಪತ್ತೆಯಾಗುತ್ತಿದ್ದಾರೆ.

ಲಾಕ್‌ಡೌನ್‌ ಸಡಿಲಿಸಿದ ಬಳಿಕ ಇರಾನ್‌ನಲ್ಲಿ ಸೋಂಕು ಕಾಳ್ಗಿಚ್ಚಿನಂತೆ ಹರಡುತ್ತಿದೆ. ಆದರೆ ಸರಕಾರ ಇದನ್ನು ಒಪ್ಪಿಕೊಳ್ಳಲು ತಯಾರಿಲ್ಲ. ಪರೀಕ್ಷೆಗಳು ಹೆಚ್ಚಿದ ಕಾರಣ ಪೊಸಿಟಿವ್‌ ಪ್ರಕರಣಗಳು ಹೆಚ್ಚುತ್ತಿವೆ ಎಂದು ಆರೋಗ್ಯ ಇಲಾಖೆ ಸಮರ್ಥನೆ ನೀಡಿದೆ. ಇಲ್ಲಿ ಇಷ್ಟರತನಕ ಹತ್ತು ಲಕ್ಷಕ್ಕೂ ಹೆಚ್ಚು ಮಂದಿಯನ್ನು ಪರೀಕ್ಷೆಗೊಳಪಡಿಸಲಾಗಿದೆ. ಇರಾನ್‌ನಲ್ಲಿ ಲಾಕ್‌ಡೌನ್‌ ಸಡಿಲಿಕೆ ಬಹಳ ಬೇಗನೆ ಆಗಿತ್ತು. ದೇಶದ ಆರ್ಥಿಕತೆ ಪಾತಾಳಕ್ಕಿಳಿಯುತ್ತಿರುವುದರಿಂದ ಕಳವಳಗೊಂಡಿದ್ದ ಸರಕಾರ ಜನರಿಗೆ ಸ್ವಯಂ ರಕ್ಷಣೆಯ ಜವಾಬ್ದಾರಿ ವಹಿಸಿ ಲಾಕ್‌ಡೌನ್‌ ಸಡಿಲಿಸಿದೆ.

ಸಾಮಾಜಿಕ ಅಂತರ ಪಾಲನೆ, ಮಾಸ್ಕ್ ಧರಿಸುವುದು ಈ ಮುಂತಾದ ನಿಯಮಗಳು ಜಾರಿಯಲ್ಲಿದ್ದರೂ ಜನರು ಮುತುವರ್ಜಿಯಿಂದ ಪಾಲಿಸುತ್ತಿಲ್ಲ. ಹಬ್ಬದ ಸಂದರ್ಭದಲ್ಲಿ ನೆರವೇರಿದ ಸಾಮೂಹಿಕ ಪ್ರಾರ್ಥನೆಗಳು ಸೋಂಕು ಕ್ಷಿಪ್ರವಾಗಿ ಹರಡಲು ಕಾರಣವಾಗಿರಬಹುದು ಎಂಬ ಅನುಮಾನ ಇದೆ. ಬುಧವಾರ ಇಲ್ಲಿ ಕೋವಿಡ್‌ಗೆ 59 ಬಲಿಯಾಗುವುದರೊಂದಿಗೆ ಸಾವಿನ ಸಂಖ್ಯೆ 8,071ಕ್ಕೇರಿದೆ. ಒಟ್ಟು 1,64,270 ಮಂದಿ ಸೋಂಕಿಗೊಳಗಾಗಿದ್ದಾರೆ.