ರಾಜಸ್ಥಾನಕ್ಕೆ ಕೊನೆಯ ಸ್ಥಾನದ ಅವಮಾನ!

ದುಬಾೖ: ಐಪಿಎಲ್‌ ಇತಿಹಾಸದಲ್ಲಿ ಅಮೋಘ ಆರಂಭ ಪಡೆದ ಹಿರಿಮೆ ರಾಜಸ್ಥಾನ್‌ ರಾಯಲ್ಸ್‌ನದ್ದು. 2008ರ ಚೊಚ್ಚಲ ಐಪಿಎಲ್‌ ಚಾಂಪಿಯನ್‌ ಎಂಬ ಹಿರಿಮೆ ಈ ತಂಡದ್ದಾಗಿದೆ. ಅಂದು ಶೇನ್‌ ವಾರ್ನ್ ಸಾರಥ್ಯದ ರಾಜಸ್ಥಾನ್‌ ಫೈನಲ್‌ನಲ್ಲಿ ಚೆನ್ನೈಗೆ ಸೋಲುಣಿಸಿ ಟ್ರೋಫಿ ಎತ್ತಿ ಹಿಡಿದು ಸಂಭ್ರಮಿಸಿತ್ತು. ಇದೀಗ 2020ರ ಕೂಟದಿಂದ ರಾಜಸ್ಥಾನ್‌ ನಿರ್ಗಮಿಸಿದೆ, ಅದೂ ಕೊನೆಯ ಸ್ಥಾನಿಯಾಗಿ! ದುರಂತವೆಂದರೆ, ಐಪಿಎಲ್‌ ಚರಿತ್ರೆಯಲ್ಲೇ ಅದು ಕೊನೆಯ ಸ್ಥಾನಕ್ಕೆ ಕುಸಿದದ್ದು ಇದೇ ಮೊದಲು!

14 ಪಂದ್ಯಗಳಲ್ಲಿ ಸ್ಮಿತ್‌ ಪಡೆಗೆ ಒಲಿದದ್ದು 6 ಗೆಲುವು ಮಾತ್ರ. ಚೆನ್ನೈ, ಪಂಜಾಬ್‌ ಕೂಡ ಆರೇ ಪಂದ್ಯ ಜಯಿಸಿದ್ದರೂ ರನ್‌ರೇಟ್‌ನಲ್ಲಿ ರಾಜಸ್ಥಾನ್‌ ಇವೆರಡಕ್ಕಿಂತ ಕೆಳಗಿದೆ.  2008ರಲ್ಲಿ ಮೊದಲ ಕಿರೀಟ ಏರಿಸಿಕೊಂಡ ಬಳಿಕ ರಾಜಸ್ಥಾನ್‌ ರಾಯಲ್ಸ್‌ ಆಟಕ್ಕುಂಟು, ಲೆಕ್ಕಕ್ಕಿಲ್ಲದ ತಂಡವಾಗಿಯೇ ಉಳಿದಿದೆ. ಅನಂತರ ಪ್ಲೇ ಆಫ್‌ ಸುತ್ತು ಪ್ರವೇಶಿಸಲು ಸಾಧ್ಯವಾದದ್ದು 3 ಸಲ ಮಾತ್ರ. 2016 ಮತ್ತು 2017ರಲ್ಲಿ ಅದು ನಿಷೇಧಕ್ಕೊಳಗಾಗಿತ್ತು.

ಈ ಬಾರಿ ರಾಜಸ್ಥಾನ್‌ ಮೇಲೆ ವಿಶೇಷ ನಂಬಿಕೆ ಇಡಲಾಗಿತ್ತು. ಸ್ಮಿತ್‌, ಬಟ್ಲರ್‌, ಆರ್ಚರ್‌, ಸ್ಟೋಕ್ಸ್‌ ಅವರಿಂದ ತಂಡದ “ಫೈಯರ್‌ ಪವರ್‌’ ಹೊರಹೊಮ್ಮಿತು ಎಂದು ಭಾವಿಸಲಾಗಿತ್ತು. ಈ ನಡುವೆ ತೆವಾತಿಯಾ ಡ್ಯಾಶಿಂಗ್‌ ಹೀರೋ ಆಗಿ ಮೂಡಿಬಂದರು. ಆದರೆ ಇದ್ಯಾವುದೂ ಪ್ರಯೋಜನಕ್ಕೆ ಬರಲಿಲ್ಲ.