Imran Khan: ಜೈಲಿನಲ್ಲಿ ಹುಳಗಳ ಕಾಟ: ಬಿಡುಗಡೆಗೆ ಇಮ್ರಾನ್‌ ಪರದಾಟ

ಇಸ್ಲಾಮಾಬಾದ್‌: ತೋಷಖಾನ ಪ್ರಕರಣದಲ್ಲಿ ಜೈಲುಪಾಲಾಗಿರುವ ಪಾಕಿಸ್ತಾನ ಮಾಜಿ ಪ್ರಧಾನಮಂತ್ರಿ ಇಮ್ರಾನ್‌ ಖಾನ್‌ ಅವರಿಗೆ ಜೈಲಿನಲ್ಲಿ ಅಕ್ಷರಶಃ ನರಕ ಕಾಣುವಂತಾಗಿದೆ. ಹಗಲಿನಲ್ಲಿ ನೊಣಗಳು ರಾತ್ರಿಯಲ್ಲಿ ಹುಳಗಳ ಕಾಟದಿಂದ ಬೇಸತ್ತಿರುವ ಖಾನ್‌, ತನ್ನನ್ನು ಜೈಲಿನಿಂದ ಬಿಡಿಸುವಂತೆ ತಮ್ಮ ಕಾನೂನು ಸಲಹಾ ತಂಡವನ್ನು ಕೇಳಿದ್ದಾರೆ.

ಖಾನ್‌ ಅವರನ್ನು ಭೇಟಿಯಾಗಲೆಂದು ವಕೀಲರು ಜೈಲಿಗೆ ತೆರಳಿದ್ದ ಸಂದರ್ಭದಲ್ಲಿ ಶುಚಿತ್ವವಿಲ್ಲದ ಸಿ ದರ್ಜೆಯ ಜೈಲಿನಲ್ಲಿ ಅವರನ್ನು ಇರಿಸಿರುವುದು ತಿಳಿದುಬಂದಿದೆ. ಅಲ್ಲಿ ಯಾವುದೇ ಕನಿಷ್ಠ ಸೌಲಭ್ಯಗಳೂ ಇಲ್ಲದೇ ಹುಳಗಳು, ನೊಣಗಳ ಕಾಟ ಹೆಚ್ಚಿದೆ ಎಂಬುದನ್ನು ಖಾನ್‌ ಹೇಳಿಕೊಂಡಿದ್ದಾರೆ. ಅಲ್ಲದೇ, ಸಾಧ್ಯವಾದಷ್ಟು ಬೇಗ ತಮ್ಮನ್ನು ಜೈಲಿನಿಂದ ಹೊರ ಕರೆಸಿಕೊಳ್ಳುವಂತೆಯೂ ಕೇಳಿದ್ದಾರೆಂದು ಮಾಧ್ಯಮಗಳು ವರದಿ ಮಾಡಿವೆ. ಈಗಾಗಲೇ ಪ್ರಕರಣ ಸಂಬಂಧಿಸಿದಂತೆ ಖಾನ್‌ ಅವರಿಗೆ ಮೂರು ವರ್ಷಗಳ ಜೈಲು ಶಿಕ್ಷೆ ವಿಧಿಸಿರುವ ಇಸ್ಲಾಮಾಬಾದ್‌ ವಿಚಾರಣಾ ನ್ಯಾಯಾಲಯದ ತೀರ್ಪನ್ನು ಪ್ರಶ್ನಿಸಿ ಹೈಕೋರ್ಟ್‌ನಲ್ಲಿ ಮೇಲ್ಮನವಿ ಸಲ್ಲಿಸಲಾಗಿದೆ.