ಪೊಲೀಸ್‌ಗೆ ಸೋಂಕು; ಠಾಣೆ ಸೀಲ್‌ಡೌನ್‌

ಕಲಘಟಗಿ: ಪೊಲೀಸ್‌ ಸಿಬ್ಬಂದಿಗ ಸೋಂಕು ಬಂದಿರುವ ಹಿನ್ನೆಲೆಯಲ್ಲಿ ಪಟ್ಟಣದಲ್ಲಿನ ಪೊಲೀಸ್‌ ಠಾಣೆಯನ್ನು ಮಂಗಳವಾರ ಸೀಲ್‌ಡೌನ್‌ ಮಾಡಲಾಗಿದ್ದು, ಹಳಿಯಾಳ ಕ್ರಾಸ್‌ ನಲ್ಲಿರುವ ಪಪಂ ಸಮುದಾಯ ಭವನದಲ್ಲಿ ತಾತ್ಕಾಲಿಕ ಠಾಣೆ ತೆರೆಯಲಾಗಿದೆ.

ಸಿಪಿಐ ವಿಜಯ ಬಿರಾದಾರ ಹಾಗೂ ಪಪಂ ಮುಖ್ಯಾಧಿಕಾರಿ ಬಿ.ಚಂದ್ರಶೇಖರ ಮಾರ್ಗದರ್ಶನದಲ್ಲಿ ಠಾಣೆ ಸೇರಿದಂತೆ ಸುತ್ತಮುತ್ತಲಿನ ಪ್ರದೇಶದಲ್ಲಿ ಸ್ಯಾನಿಟೈಸರ್‌ ಸಿಂಪಡಿಸುವ ಮೂಲಕ ಮುಂಜಾಗ್ರತಾ ಕ್ರಮ ಜರುಗಿಸಲಾಗಿದೆ.

ತಾಲೂಕಿನ ಬಿ.ಗುಡಿಹಾಳದಲ್ಲಿ ಪ್ರಥಮವಾಗಿ ಒಕ್ಕರಿಸಿದ್ದ ಕೋವಿಡ್‌ -19 ಇದೀಗ ದೇವಿಕೊಪ್ಪ, ಮುತ್ತಗಿ, ಹಿರೇಹೊನ್ನಿಹಳ್ಳಿ, ಗಂಜೀಗಟ್ಟಿ, ದಾಸ್ತಿಕೊಪ್ಪ, ಲಿಂಗನಕೊಪ್ಪ, ಜುಂಜುನಬೈಲ್‌, ಕುರುವಿನಕೊಪ್ಪ, ಕಾಡನಕೊಪ್ಪ, ಕಲಘಟಗಿ ಪಟ್ಟಣದಲ್ಲೂ ಒಕ್ಕರಿಸಿದೆ. ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದರ ಜತೆಗೆ ಕಡ್ಡಾಯವಾಗಿ ಮಾಸ್ಕ್ ಧರಿಸುವುದಲ್ಲದೇ ಶುಚಿತ್ವದ ಕಡೆಗೆ ಹೆಚ್ಚು ಗಮನ ಹರಿಸಿ ಬಿಸಿ ಬಿಸಿಯಾದ ಆಹಾರ ಸೇವಿಸುವಂತೆ ಶಾಸಕ ಸಿ.ಎಂ. ನಿಂಬಣ್ಣವರ ಜನತೆಗೆ ಕರೆ ನೀಡಿದ್ದಾರೆ.