ಉ.ಪ್ರ. 6ನೇ ಹಂತದ ಮತದಾನ : ಭಾರತ-ನೇಪಾಲ ಗಡಿ ಬಂದ್‌

ಮಹಾರಾಜ್‌ಗಂಜ್‌, ಉತ್ತರ ಪ್ರದೇಶ: ಏಳು ಹಂತಗಳ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆಯ ಆರನೇ ಹಂತದ ಮತದಾನ ಆರಂಭಕ್ಕೆ 24 ತಾಸುಗಳಿರುವಾಗಲೇ ಉತ್ತರಪ್ರದೇಶಕ್ಕೆ  ತಾಗಿಕೊಂಡಿರುವ ಭಾರತ – ನೇಪಾಲ ಗಡಿಯನ್ನು ಮುಚ್ಚಲಾಗಿದೆ. 

ನಾಳೆ, ಮಾರ್ಚ್‌ 4ರ ಶನಿವಾರದಂದು ಉತ್ತರ ಪ್ರದೇಶದ 49 ವಿಧಾನಸಭಾ ಕ್ಷೇತ್ರಗಳಿಗೆ ಮತದಾನ ನಡೆಯಲಿದೆ. ಮತದಾನಕ್ಕೆ 24 ತಾಸು ಮುನ್ನ 84 ಕಿ.ಮೀ. ಉದ್ದದ ಭಾರತ – ನೇಪಾಲ ಗಡಿಯನ್ನು ಮುಚ್ಚಲಾಗಿದ್ದು ಮತದಾನ ಮುಗಿಯುವ ತನಕವೂ ಅದು ಮುಚ್ಚಿರುತ್ತದೆ. ಈ ಅವಧಿಯಲ್ಲಿ ಕೇವಲ ತುರ್ತು ಸಂಚಾರದ ವಾಹನಗಳಿಗೆ ಮಾತ್ರವೇ ಗಡಿ ದಾಟಿ ಹೋಗಿ – ಬರಲು ಅನುಮತಿ ನೀಡಲಾಗುತ್ತದೆ ಎಂದು ಜಿಲ್ಲಾ ಚುನಾವಣಾಧಿಕಾರಿ ವೀರೇಂದ್ರ ಕುಮಾರ್‌ ಸಿಂಗ್‌ ತಿಳಿಸಿದ್ದಾರೆ. 

ಮತದಾನದ ವೇಳೆ ಜನರ ಅಕ್ರಮ ಹಾಗೂ ಕಾನೂನು ಬಾಹಿರ ಸಂಚಾರವನ್ನು ತಡೆಯುವ ಸಲುವಾಗಿ ವ್ಯಾಪಾರ ವಹಿವಾಟು ಹಾಗೂ ಸಾಗಟ ತಾಣಗಳಲ್ಲಿ ಕ್ಯಾಮರಾಗಳನ್ನು ಅಳವಡಿಸಲಾಗಿದೆ. ಮಹಾರಾಜಗಂಜ್‌ ಜಿಲ್ಲೆಯ ಭಾರತ – ನೇಪಾಲ ಗಡಿಯಲ್ಲಿನ ಸೋನೌಲಿ ತಾಣದಲ್ಲಿ ಈ ರೀತಿಯ ಎರಡು ಕ್ಯಾಮರಾಗಳನ್ನು ಈಗಾಗಲೇ ಅಳವಡಿಸಲಾಗಿದೆ ಎಂದು ವೀರೇಂದ್ರ ಕುಮಾರ್‌ ಸಿಂಗ್‌ ತಿಳಿಸಿದರು. 

ಆರನೇ ಹಂತದಲ್ಲಿ  ನಾಳೆ ಶನಿವಾರ ಮತದಾನಕ್ಕೆ ಒಳಪಡುವ ವಿಧಾನಸಭಾ ಕ್ಷೇತ್ರಗಳೆಂದರೆ ಸಿಸ್ವಾ, ನೌತನ್ವಾ, ಫ್ರೆಂಡಾ, ಪನಿಯಾರಾ ಹಾಗೂ ಮಹಾರಾಜಾಗಂಜ್‌.