ಅಮೆರಿಕದ ತೆರಿಗೆಗೆ ಭಾರತದ ಪ್ರತೀಕಾರ

ನವದೆಹಲಿ: ಟ್ರಂಪ್‌ ದರ ಸಮರ ಹಾಗೂ ಆದ್ಯತಾ ಪಟ್ಟಿಯಿಂದ ಭಾರತವನ್ನು ಹೊರಗಿಟ್ಟಿದ್ದಕ್ಕೆ ಪ್ರತೀಕಾರವಾಗಿ ಕೇಂದ್ರ ವಿತ್ತ ಇಲಾಖೆ, ಅಮೆರಿಕದಿಂದ ಆಮದಾಗುವ ಸೇಬು, ಬಾದಾಮಿ, ವಾಲ್ನಟ್ ಸೇರಿ 29 ವಸ್ತುಗಳಿಗೆ ಹೆಚ್ಚುವರಿ ಆಮದು ಸುಂಕ ವಿಧಿಸಲು ನಿರ್ಧರಿಸಿದೆ. ಜೂ.16ರಿಂದಲೇ ಈ ಹೊಸ ದರ ಜಾರಿಗೆ ಬರಲಿದ್ದು, ಈ ಎಲ್ಲಾ ವಸ್ತುಗಳ ಬೆಲೆಯಲ್ಲಿ ಭಾರೀ ಪ್ರಮಾಣದ ಹೆಚ್ಚಳವಾಗಲಿದೆ. ಕಳೆದ ವರ್ಷವಷ್ಟೇ ಅಮೆರಿಕ ಕೂಡ ಭಾರತದಿಂದ ಆಮದಾಗುವ ಕೆಲವು ವಸ್ತುಗಳಿಗೆ ಹೆಚ್ಚಿನ ಸುಂಕ ವಿಧಿಸಿತ್ತು. ಇದಕ್ಕೆ ಪ್ರತಿಯಾಗಿ ಆಗಲೇ ಭಾರತ ಅಮೆರಿಕದ ವಸ್ತುಗಳಿಗೂ ಹೆಚ್ಚಿನ ಆಮದು ಸುಂಕ ವಿಧಿಸುವ ಬಗ್ಗೆ ನಿರ್ಧರಿಸಿತ್ತು. ಆದರೆ, ಇದು ಜಾರಿಯಾಗಿರಲಿಲ್ಲ. ಭಾರತದ ನಿರ್ಧಾರಕ್ಕೆ ಇನ್ನೊಂದು ಕಾರಣವೂ ಇದೆ. ಜೂ. 5ರಂದು ಅಮೆರಿಕ ಭಾರತವನ್ನು ‘ಆದ್ಯತೆಯ ದೇಶ’ ಪಟ್ಟಿಯಿಂದ ಕೈಬಿಟ್ಟಿತ್ತು. ಇದರಿಂದಾಗಿ ಭಾರತದ ವಸ್ತುಗಳು ಅಮೆರಿಕದಲ್ಲಿ ದುಬಾರಿಯಾಗಲಿವೆ.