ಹೊಸದಿಲ್ಲಿ: ರಾಷ್ಟ್ರೀಯ ದಾಖಲೆ ಹೊಂದಿರುವ ಭಾರತದ ಅತ್ಯಂತ ವೇಗದ ಓಟಗಾರ್ತಿ ದ್ಯುತಿ ಚಂದ್ ಅವರಿಗೆ ನಾಲ್ಕು ವರ್ಷಗಳ ಕಾಲ ನಿಷೇಧ ಹೇರಲಾಗಿದೆ. ಡೋಪ್ ಪರೀಕ್ಷೆಯಲ್ಲಿ ವಿಫಲವಾದ ಕಾರಣ ದ್ಯುತಿ ಚಾಂದ್ ನಾಲ್ಕು ವರ್ಷಗಳ ನಿಷೇಧಕ್ಕೆ ಒಳಗಾಗಿದ್ದಾರೆ. 2021 ರ ಇಂಡಿಯನ್ ಗ್ರ್ಯಾಂಡ್ ಪ್ರಿಕ್ಸ್ 4 ರ ಸಮಯದಲ್ಲಿ 11.17 ಸೆಕೆಂಡ್‌ಗಳಲ್ಲಿ 100 ಮೀ ಓಡಿ ದ್ಯುತಿ ಹೊಸ ಭಾರತೀಯ ಮಹಿಳಾ ದಾಖಲೆಯನ್ನು ಸ್ಥಾಪಿಸಿದ್ದರು.
ನಿಷೇಧವು ಜನವರಿ 3, 2023 ರಿಂದ ಪ್ರಾರಂಭವಾಗುತ್ತದೆ. ಅಲ್ಲದೆ ಸ್ಯಾಂಪಲ್ ಸಂಗ್ರಹಣೆಯ ದಿನಾಂಕದಿಂದ (ಡಿಸೆಂಬರ್ 5, 2022) ಅವರು ಪಡೆದ ಎಲ್ಲಾ ಸ್ಪರ್ಧಾತ್ಮಕ ಫಲಿತಾಂಶಗಳನ್ನು ಅನರ್ಹಗೊಳಿಸಲಾಗುತ್ತದೆ. ಅವರು ಗೆದ್ದ ಪದಕಗಳು, ಅಂಕಗಳು ಮತ್ತು ಬಹುಮಾನಗಳನ್ನು ಕಳೆದುಕೊಳ್ಳಬೇಕಾಗುತ್ತದೆ ಎಂದು ವರದಿ ಹೇಳಿದೆ.
ದ್ಯುತಿ ಚಾಂದ್ ಅವರು ಸಾರ್ಮ್ಸ್ (SARMS) ಸೇವಿಸಿರುವುದು ಪರೀಕ್ಷೆಯಲ್ಲಿ ಪತ್ತೆಯಾಗಿದೆ. ಇದು ರೋಗಿಗಳಲ್ಲಿ ಆಸ್ಟಿಯೊಪೊರೋಸಿಸ್, ರಕ್ತಹೀನತೆ ಮತ್ತು ಗಾಯವನ್ನು ಗುಣಪಡಿಸಲು ಸಾಮಾನ್ಯವಾಗಿ ಬಳಸುವ ಸ್ಟೀರಾಯ್ಡ್ ಅಲ್ಲದ ಪದಾರ್ಥಗಳಾಗಿವೆ.
ಇದನ್ನೂ ಓದಿ:Pune ಹೊರಟಿದ್ದ ವಿಮಾನಕ್ಕೆ ಬಾಂಬ್ ಬೆದರಿಕೆ… ದೆಹಲಿಯಲ್ಲಿ ತುರ್ತು ಭೂಸ್ಪರ್ಶ
“ನಮಗೆ, ಇದು ನಿಷೇಧಿತ ವಸ್ತುವಿನ ಉದ್ದೇಶಪೂರ್ವಕವಲ್ಲದ ಸೇವನೆಯ ಸ್ಪಷ್ಟ ಪ್ರಕರಣವಾಗಿದೆ. ದೇಹದಲ್ಲಿ ವಸ್ತುವಿನ ಮೂಲವನ್ನು ಸ್ಥಾಪಿಸಲು ನಾವು ಸ್ಪಷ್ಟವಾಗಿ ಸಾಧ್ಯವಾಯಿತು, ಈ ವಸ್ತುವನ್ನು ಎಂದಿಗೂ ಯಾವುದೇ ಕ್ರೀಡಾ ಪ್ರಯೋಜನ ಪಡೆಯಲು ಬಳಸಲಿಲ್ಲ” ಎಂದು ದ್ಯುತಿ ಅವರ ಸಲಹೆಗಾರ ಪಾರ್ಥ್ ಗೋಸ್ವಾಮಿ ಹೇಳಿದರು.
“ನಾವು ಮೇಲ್ಮನವಿ ಸಲ್ಲಿಸುವ ಪ್ರಕ್ರಿಯೆಯಲ್ಲಿದ್ದೇವೆ. ಮೇಲ್ಮನವಿ ಸಮಿತಿಗೆ ಮನವರಿಕೆ ಮಾಡಲು ಸಾಧ್ಯವಾಗುತ್ತದೆ ಎಂದು ನಾವು ಭಾವಿಸುತ್ತೇವೆ” ಎಂದು ಅವರು ಹೇಳಿದರು.
