ಭಾರತದ ಆರ್ಥಿಕ ಪ್ರಗತಿ ದರದ ನಿರೀಕ್ಷೆ ಶೇ.6.8ಕ್ಕೇರಿಕೆ: ಎಸ್‌ ಆ್ಯಂಡ್‌ ಪಿ

ನವದೆಹಲಿ: ಮುಂದಿನ ಹಣಕಾಸು ವರ್ಷದಲ್ಲಿ ಭಾರತದ ಆರ್ಥಿಕ ಪ್ರಗತಿ ದರದ ನಿರೀಕ್ಷೆಯನ್ನು ಎಸ್‌ ಆ್ಯಂಡ್‌ ಪಿ ಗ್ಲೋಬಲ್‌ ರೇಟಿಂಗ್ಸ್‌ ಸಂಸ್ಥೆ ಶೇ.6.8ಕ್ಕೇರಿಸಿದೆ. ಆದರೆ, ನಿರ್ಬಂಧಿತ ಬಡ್ಡಿ ದರಗಳು ಅರ್ಥವ್ಯವಸ್ಥೆಯ ಬೆಳವಣಿಗೆಗೆ ಅಡ್ಡಿ ಉಂಟು ಮಾಡುವ ಆತಂಕವಿದೆ ಎಂದೂ ಹೇಳಿದೆ.

2024-25ರ ವಿತ್ತ ವರ್ಷದಲ್ಲಿ ಭಾರತದ ಪ್ರಗತಿಯ ದರ ಶೇ.6.4ರಷ್ಟಿರಲಿದೆ ಎಂದು ಕಳೆದ ವರ್ಷದ ನವೆಂಬರ್‌ ನಲ್ಲಿ ಅಮೆರಿಕ ಮೂಲದ ಎಸ್‌ ಆ್ಯಂಡ್‌ ಪಿ ಅಂದಾಜಿಸಿತ್ತು. ಆದರೆ, ದೇಶೀಯವಾಗಿ ಬೇಡಿಕೆ ಹೆಚ್ಚಳ, ರಫ್ತು ಪ್ರಮಾಣ ಏರಿಕೆ ಮತ್ತಿತರ ಕಾರಣಗಳಿಂದಾಗಿ ಈ ಅಂದಾಜನ್ನು ಶೇ.6.8ಕ್ಕೇರಿಸುತ್ತಿದ್ದೇವೆ ಎಂದು ಸಂಸ್ಥೆ ಈಗ ಹೇಳಿದೆ.

ಏಷ್ಯಾದ ಉದಯೋನ್ಮುಖ ಆರ್ಥಿಕತೆಗಳಲ್ಲಿ ಪ್ರಗತಿ ದರ ಸ್ವಲ್ಪ ಮಟ್ಟಿಗೆ ಇಳಿಕೆಯಾಗಲಿದೆ. ಆದರೆ, ಭಾರತ, ಇಂಡೋನೇಷ್ಯಾ, ಫಿಲಿಪ್ಪೀನ್ಸ್‌ ಮತ್ತು ವಿಯೆಟ್ನಾಂನ ಆರ್ಥಿಕತೆಯು ಉತ್ತಮ ಪ್ರಗತಿ ಸಾಧಿಸಲಿದೆ ಎಂದೂ ಎಸ್‌ ಆ್ಯಂಡ್‌ ಪಿ ರೇಟಿಂಗ್ಸ್‌ ಹೇಳಿದೆ.