ನೈನಿಟಾಲ್‌ನಲ್ಲಿ ಏಷ್ಯಾದ ಅತಿ ದೊಡ್ಡ ಲಿಕ್ವಿಡ್‌ ಮಿರರ್‌ ಟೆಲಿಸ್ಕೋಪ್‌

ನವದೆಹಲಿ: ಉತ್ತರಾಖಾಂಡದ ನೈನಿಟಾಲ್‌ನಲ್ಲಿರುವ ಪರ್ವತವೊಂದರ ತುದಿಯಲ್ಲಿ, ಭೂಮಿಯಿಂದ ಸುಮಾರು 2,450 ಮೀಟರ್‌ಗಳ ಎತ್ತರದಲ್ಲಿ ದೈತ್ಯ ಟೆಲಿಸ್ಕೋಪ್‌ ಒಂದನ್ನು ಭಾರತೀಯ ವಿಜ್ಞಾನಿಗಳು ಸ್ಥಾಪಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಇದು, ದೇಶದ ಮೊದಲ ಹಾಗೂ ಏಷ್ಯಾದಲ್ಲೇ ಅತಿ ದೊಡ್ಡ ಲಿಕ್ವಿಡ್‌- ಮಿರರ್‌ ಟೆಲಿಸ್ಕೋಪ್‌ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

“ಇಂಟರ್‌ನ್ಯಾಷನಲ್‌ ಲಿಕ್ವಿಡ್‌ ಮಿರರ್‌ ಟೆಲಿಸ್ಕೋಪ್‌’ (ಐಎಲ್‌ಎಂಟಿ) ಎಂದು ಕರೆಯಲ್ಪಡುವ ಈ ದೂರದರ್ಶಕ ಯಂತ್ರವನ್ನು ಬಾಹ್ಯಾಕಾಶ ತ್ಯಾಜ್ಯಗಳನ್ನು ಪತ್ತೆ ಹಚ್ಚಲು ಹಾಗೂ ವಿವಿಧ ನಕ್ಷತ್ರಪುಂಜಗಳನ್ನು ಪತ್ತೆ ಹಚ್ಚಲು ಬಳಸಲಾಗುತ್ತದೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.

ನೈನಿಟಾಲ್‌ನಲ್ಲಿರುವ ಆರ್ಯಭಟ ವೀಕ್ಷಣಾ ವಿಜ್ಞಾನಗಳ ಸಂಶೋಧನಾ ಸಂಸ್ಥೆಯ (ಏರೀಸ್‌) ದೇವಸ್ಥಳ ಅಬ್ಸರ್ವೇಟರಿ ಕ್ಯಾಂಪಸ್‌ನಲ್ಲಿ ಈ ದೂರದರ್ಶಕ ಯಂತ್ರವನ್ನು ಸ್ಥಾಪಿಸಲಾಗಿದ್ದು, ಅದರಲ್ಲಿ ಪಾದರಸದ ತೆಳು ಹಾಳೆಯಿರುವ, 4 ಮೀಟರ್‌ ವ್ಯಾಸದ ತಿರುಗುವ ಕನ್ನಡಿಯಿದೆ. ಇದಕ್ಕೆ ಪಾಲಿಸ್ಟರ್‌ನಿಂದ ತಯಾರಿಸಿದ ಮಿಲಾರ್‌ ಉತ್ಪನ್ನದ ಮತ್ತೂಂದು ತೆಳು ಹಾಳೆಯನ್ನು ಹೊದಿಸಲಾಗಿದ್ದು ಇದು ಪಾದರಸದ ಹಾಳೆಗೆ ಗಾಳಿಯಿಂದ ಸುರಕ್ಷತೆ ನೀಡುತ್ತದೆ.ಈ ವರ್ಷಾಂತ್ಯದ ಹೊತ್ತಿಗೆ ಕಾರ್ಯಾರಂಭ ಮಾಡಲಿದೆ.