ವಿದೇಶದಲ್ಲಿ ಐಪಿಎಲ್‌ ಹರಾಜು: ಬಿಸಿಸಿಐ ಸಭೆಯಲ್ಲಿ ಹಲವರ ವಿರೋಧ

ನವದೆಹಲಿ: ಮುಂಬೈನಲ್ಲಿ ನಡೆದ ಬಿಸಿಸಿಐ (ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ) ಸಭೆಯಲ್ಲಿ ಮುಂದಿನ ಆವೃತ್ತಿ ಐಪಿಎಲ್‌ ಹರಾಜನ್ನು ವಿದೇಶದಲ್ಲಿ ನಡೆಸುವ ಬಗ್ಗೆ ಕೆಲವರು ಮಾತನಾಡಿದರು. ಆದರೆ ಬಹು ಸಂಖ್ಯೆಯಲ್ಲಿ ಈ ಅಭಿಪ್ರಾಯಕ್ಕೆ ವಿರೋಧ ವ್ಯಕ್ತವಾಯಿತು ಎಂದು ಬಿಸಿಸಿಐ ಹಿರಿಯ ಅಧಿಕಾರಿಯೊಬ್ಬರು ಮಾಧ್ಯಮಕ್ಕೆ ತಿಳಿಸಿದ್ದಾರೆ. 

ಭಾರತದಿಂದ ಐಪಿಎಲ್‌ ಹರಾಜನ್ನು ಸ್ಥಳಾಂತರ ಮಾಡುವ ಕುರಿತು ಚರ್ಚೆ ನಡೆಯಿತು. ಈ ವೇಳೆ ಬೆರಳೆಣಿಕೆ ಜನ ಇಂಗ್ಲೆಂಡ್‌ನ‌ಲ್ಲಿ ನಡೆಸಿದರೆ ಒಳ್ಳೆಯದು ಎನ್ನುವ ಅಭಿಪ್ರಾಯ ವ್ಯಕ್ತಪಡಿಸಿದರು. ಆದರೆ ಸಭೆಯಲ್ಲಿ ಇದಕ್ಕೆ ವ್ಯಾಪಕ ವಿರೋಧ ವ್ಯಕ್ತವಾಯಿತು ಎಂದು ಅಧಿಕಾರಿ ಮಾಹಿತಿ ನೀಡಿದರು. ಈ ಬಾರಿ ಹೊಸದಾಗಿ ಐಪಿಎಲ್‌ ಹರಾಜು ನಡೆಯಲಿದೆ. ಎಲ್ಲ ಆಟಗಾರರು ಹರಾಜಿನಲ್ಲಿರುವುದು ವಿಶೇಷ.