ಭಾರತೀಯ ನಿಕ್ಕಿ ಅಮೆರಿಕ ಅಧ್ಯಕ್ಷೀಯ ಆಕಾಂಕ್ಷಿ

ಹೊಸದಿಲ್ಲಿ : ವಿಶ್ವಸಂಸ್ಥೆಗೆ ಅಮೆರಿಕ ರಾಯಭಾರಿಯಾಗಿರುವ ಭಾರತೀಯ ಮೂಲದ ನಿಕ್ಕಿ ಹ್ಯಾಲೆ 2020ರಲ್ಲಿ ಅಮೆರಿಕದ ಅಧ್ಯಕ್ಷ ಹುದ್ದೆಗೆ ಸ್ಪರ್ಧಿಸುವ ಸಾಧ್ಯತೆಯಿದೆ ಎಂದು ಮಿಶೆಲ್‌ ವೂಲ್ಫ್ ಬರೆದ ಫೈರ್‌ ಆಂಡ್‌ ಫ್ಯೂರಿ ಎಂಬ ಪುಸ್ತಕದಲ್ಲಿ ಹೇಳಲಾಗಿದೆ.

ಹಾಲಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವಧಿ ಮುಗಿದ ನಂತರ ರಿಪಬ್ಲಿಕನ್‌ ಪಕ್ಷದ ಅಭ್ಯರ್ಥಿಯಾಗಿ ನಿಕ್ಕಿ ಹ್ಯಾಲೆಯನ್ನು ಕಣಕ್ಕಿಳಿಸುವ ಸಾಧ್ಯತೆಯಿದೆ ಎಂದು ಮಿಶೆಲ್‌ ಬರೆದಿದ್ದಾರೆ. ದಕ್ಷಿಣ ಕೆರೊಲಿನಾದ ಮಾಜಿ ಗವರ್ನರ್‌ ಆಗಿರುವ ನಿಕ್ಕಿ, ಟ್ರಂಪ್‌ಗಿಂತ ಹೆಚ್ಚು ಅರ್ಹರು ಎಂಬ ಅಭಿಪ್ರಾಯ ವೈಟ್‌ಹೌಸ್‌ನಲ್ಲಿದೆ. ಟ್ರಂಪ್‌ ಪುತ್ರಿ ಇವಾಂಕಾ ಜತೆಗೆ ಸ್ನೇಹ ಹೊಂದಿರುವ ನಿಕ್ಕಿ, ಟ್ರಂಪ್‌ ಆಡಳಿತ ಹಾಗೂ ಟ್ರಂಪ್‌ ಕುಟುಂಬದ ಒಳಗುಟ್ಟುಗಳನ್ನು ಅರಿತಿದ್ದಾರೆ. ಅಷ್ಟೇ ಅಲ್ಲ, ಟ್ರಂಪ್‌ ಏರ್‌ಫೋರ್ಸ್‌ ಒನ್‌ನಲ್ಲಿ ಪ್ರಯಾಣಿಸುವಾಗ ಈಗಾಗಲೇ ಅಧ್ಯಕ್ಷೀಯ ತರಬೇತಿಯನ್ನೂ ಪಡೆದಿದ್ದಾರೆ ಎಂದು ಉಲ್ಲೇಖೀಸಲಾಗಿದೆ.

ನಿಕ್ಕಿಯನ್ನು ವಿದೇಶಾಂಗ ಸಚಿವೆಯನ್ನಾಗಿ ನೇಮಕ ಮಾಡಲು ಟ್ರಂಪ್‌ ಪರಿಗಣಿಸಿದ್ದರಾದರೂ, ಟ್ರಂಪ್‌ಗಿಂತ ಹೆಚ್ಚು ಪ್ರಭಾವ ಹೊಂದಬಹುದು ಎಂಬ ಕಾರಣಕ್ಕೆ ಟ್ರಂಪ್‌ ಆಪ್ತರು ಈ ಪ್ರಸ್ತಾಪವನ್ನು ಕೈಬಿಡುವಂತೆ ಸೂಚಿಸಿದರು ಎನ್ನಲಾಗಿದೆ.