ಸೇನೆಯ ಕಾಪ್ಟರ್‌ ಪತನ: ಇಬ್ಬರು ಪೈಲಟ್‌ಗಳ ಸಾವು

ಹೊಸದಿಲ್ಲಿ: ಭಾರತೀಯ ಸೇನೆಯ ಚೀತಾ ಹೆಲಿಕಾಪ್ಟರ್‌ವೊಂದು ಭೂತಾನ್‌ನ ಪೂರ್ವಭಾಗದಲ್ಲಿ ಶುಕ್ರವಾರ ಪತನಗೊಂಡಿದ್ದು, ಅದರಲ್ಲಿದ್ದ ಇಬ್ಬರು ಪೈಲಟ್‌ಗಳೂ ಮೃತಪಟ್ಟಿದ್ದಾರೆ. ಒಂದೇ ಎಂಜಿನ್‌ ಇರುವ ಹೆಲಿಕಾಪ್ಟರ್‌ ಶುಕ್ರವಾರ ಮಧ್ಯಾಹ್ನ ಅರುಣಾಚಲಪ್ರದೇಶದ ಖೀರ್ಮು ಎಂಬಲ್ಲಿಂದ ಭೂತಾನ್‌ನ ಯೋನ್‌ಫ‌ುಲಾಗೆ ಹೊರಟಿತ್ತು. ಸುಮಾರು 1 ಗಂಟೆ ವೇಳೆಗೆ ಕಾಪ್ಟರ್‌ ಸಂಪರ್ಕ ಕಡಿದುಕೊಂಡು, ಪತನಗೊಂಡಿತು. ಅದರಲ್ಲಿದ್ದ ಇಬ್ಬರು ಪೈಲಟ್‌ಗಳಾದ ಭಾರತೀಯ ಸೇನೆಯ ಲೆಫ್ಟಿನೆಂಟ್‌ ಕರ್ನಲ್‌ ರಜನೀಶ್‌ ಪರ್ಮಾರ್‌ ಹಾಗೂ ಭೂತಾನ್‌ನ ಸೇನೆಯ ಪೈಲಟ್‌ ಸಾವಿಗೀಡಾಗಿದ್ದಾರೆ. ಶುಕ್ರವಾರವೇ ರಜನೀಶ್‌ ಅವರ ಜನುಮ ದಿನವೂ ಆಗಿತ್ತು ಎಂದು ಹೇಳಲಾಗಿದೆ. ಘಟನೆ ಕುರಿತು ಉನ್ನತ ಮಟ್ಟದ ತನಿಖೆಗೆ ಆದೇಶಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.