ಹಾಕಿ: ವನಿತೆಯರಿಗೆ ಮತ್ತೂಂದು ಆಘಾತ

ಟೋಕಿಯೊ: ರಾಣಿ ರಾಮ್‌ಪಾಲ್‌ ನೇತೃತ್ವದ ಭಾರತದ ವನಿತಾ ಹಾಕಿ ತಂಡ ಒಲಿಂಪಿಕ್ಸ್‌ನಲ್ಲಿ ಸತತ ಎರಡನೇ ಸೋಲಿನಿಂದ ತತ್ತರಿಸಿದೆ.

ಸೋಮವಾರದ “ಎ’ ವಿಭಾಗದ ಮುಖಾಮುಖೀಯಲ್ಲಿ ಜರ್ಮನಿ ವಿರುದ್ಧ 0-2 ಅಂತರದ ಆಘಾತಕ್ಕೆ ಸಿಲುಕಿದೆ.

ಮೊದಲ ಮುಖಾಮುಖಿಯಲ್ಲಿ ನೆದರ್ಲೆಂಡ್ಸ್‌ ಕೈಯಲ್ಲಿ 1-5ರಿಂದ ಏಟು ತಿಂದಿದ್ದ ಭಾರತ, ರಿಯೋ ಕಂಚಿನ ಪದಕ ವಿಜೇತ ಜರ್ಮನಿ ವಿರುದ್ಧವೂ ನಿರಾಶಾದಾಯಕ ಆಟವನ್ನು ಮುಂದುವರಿಸಿತು. ಪೆನಾಲ್ಟಿ ಸ್ಟ್ರೋಕ್‌ ಸಹಿತ ಅನೇಕ ಅವಕಾಶಗಳನ್ನು ವ್ಯರ್ಥಗೊಳಿಸಿದ ಭಾರತಕ್ಕೆ ಅದೃಷ್ಟ ಕೂಡ ಕೈಕೊಟ್ಟಿತು.

ನಾಯಕಿ ನೈಕ್‌ ಲಾರೆಂಜ್‌ (12ನೇ ನಿಮಿಷ) ಮತ್ತು ಅನ್ನಾ ಸ್ಕೋರ್ಡರ್‌ (35ನೇ ನಿಮಿಷ) ಜರ್ಮನಿಯ ಗೋಲುಗಳನ್ನು ದಾಖಲಿಸಿದರು. ಮೊದಲ ಪಂದ್ಯದಲ್ಲಿ ಗ್ರೇಟ್‌ ಬ್ರಿಟನ್‌ ವಿರುದ್ಧ ಜರ್ಮನಿ 2-1 ಅಂತರದ ಜಯ ಸಾಧಿಸಿತ್ತು. ಭಾರತವಿನ್ನು ಬುಧವಾರ ಗ್ರೇಟ್‌ ಬ್ರಿಟನ್‌ ವಿರುದ್ಧ ಆಡಲಿದೆ.