ಒಲಿಂಪಿಕ್‌ ಅರ್ಹತಾ ಕೂಟಕ್ಕೆ ಭಾರತ ವನಿತಾ ಹಾಕಿ ತಂಡ

ಹಿರೋಶಿಮಾ: ಎಫ್ಐಎಚ್‌ ಸೀರಿಸ್‌ ಫೈನಲ್ಸ್‌ನ ಸೆಮಿಫೈನಲ್‌ನಲ್ಲಿ ಚಿಲಿ ತಂಡವನ್ನು 4-2 ಗೋಲುಗಳಿಂದ ಸೋಲಿಸಿದ ಭಾರತೀಯ ವನಿತಾ ಹಾಕಿ ತಂಡ ಟೋಕಿಯೊ ಒಲಿಂಪಿಕ್‌ ಅರ್ಹತಾ ಕೂಟದ ಅಂತಿಮ ಸುತ್ತಿನಲ್ಲಿ ಆಡುವ ಅವಕಾಶ ಪಡೆದಿದೆ.

ಈ ಗೆಲುವಿನಿಂದ ಭಾರತ ಎಫ್ಐಎಚ್‌ ಸೀರಿಸ್‌ನಲ್ಲಿ ಫೈನಲ್‌ ಹಂತಕ್ಕೇರಿತು. ರವಿವಾರ ನಡೆಯುವ ಫೈನಲ್‌ನಲ್ಲಿ ಭಾರತೀಯರು ರಶ್ಯ ಅಥವಾ ಜಪಾನ್‌ ತಂಡವನ್ನು ಎದುರಿಸಲಿದ್ದಾರೆ.

ಈ ಕೂಟದ ಅಗ್ರ ಎರಡು ತಂಡಗಳು 2020ರ ಒಲಿಂಪಿಕ್ಸ್‌ನ ಅರ್ಹತಾ ಕೂಟದ ಅಂತಿಮ ಸುತ್ತಿ ನಲ್ಲಿ ಆಡಲು ಅರ್ಹತೆ ಗಳಿಸಲಿವೆ. ಈ ಅರ್ಹತಾ ಕೂಟ ವರ್ಷಾಂತ್ಯದಲ್ಲಿ ನಡೆಯಲಿದೆ.

ಚಿಲಿ ಮೊದಲ ಗೋಲು
ಕ್ಯಾರೋಲಿನಾ ಗಾರ್ಸಿಯಾ ಮೂಲಕ ಚಿಲಿ 18ನೇ ನಿಮಿಷ ದಲ್ಲಿ ಗೋಲು ಹೊಡೆದು ಮುನ್ನಡೆ ದಾಖಲಿಸಿತು. ಆದರೆ 22ನೇ ನಿಮಿಷದಲ್ಲಿ ಗುರ್ಜೀತ್‌ ಕೌರ್‌ ಅವರಿಂದ ಪಂದ್ಯ ಸಮಬಲ ಗೊಂಡಿತು. ಮೊದಲಾರ್ಧದ ತನಕ ಇದೇ ಸ್ಥಿತಿ ಮುಂದುವರಿಯಿತು.

ಅನಂತರ ಭಾರತ 6 ನಿಮಿಷಗಳ ಅಂತರದಲ್ಲಿ 2 ಗೋಲು ಹೊಡೆದು ಮುನ್ನಡೆಯನ್ನು ಹೆಚ್ಚಿಸಿತು.