ಭಾರತಕ್ಕೆ ಹ್ಯಾಟ್ರಿಕ್‌ ಸೋಲು: ವನಿತಾ ಏಕದಿನ ಸರಣಿ ಗೆದ್ದ ನ್ಯೂಜಿಲ್ಯಾಂಡ್‌

ಕ್ವೀನ್ಸ್‌ಟೌನ್‌ (ನ್ಯೂಜಿಲ್ಯಾಂಡ್‌): ಅಮೋಘ ಬ್ಯಾಟಿಂಗ್‌ ಪ್ರದರ್ಶನದ ಹೊರತಾಗಿಯೂ ಆತಿಥೇಯ ನ್ಯೂಜಿಲ್ಯಾಂಡ್‌ ವಿರುದ್ಧ ಹ್ಯಾಟ್ರಿಕ್‌ ಸೋಲುಂಡ ಭಾರತದ ವನಿತೆಯರು ಏಕದಿನ ಸರಣಿಯನ್ನು ಕಳೆದುಕೊಂಡಿದ್ದಾರೆ.

ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಭಾರತ 49.3 ಓವರ್‌ಗಳಲ್ಲಿ 279 ರನ್‌ ಪೇರಿಸಿತು. ನ್ಯೂಜಿಲ್ಯಾಂಡ್‌ ಆರಂಭಿಕ ಕುಸಿತದಿಂದ ಚೇತರಿಸಿಕೊಂಡೂ 49.1 ಓವರ್‌ಗಳಲ್ಲಿ 7 ವಿಕೆಟಿಗೆ 280 ರನ್‌ ಬಾರಿಸಿತು.

ಶತಕದ ಜತೆಯಾಟ
ಸ್ಮತಿ ಮಂಧನಾ ಕ್ವಾರಂಟೈನ್‌ನಿಂದ ಹೊರಬಂದರೂ ಈ ಪಂದ್ಯದಲ್ಲಿ ಆಡಲಿಲ್ಲ. ಆದರೆ ಎಸ್‌. ಮೇಘನಾ (61) ಮತ್ತು ಶಫಾಲಿ ವರ್ಮ (51) ಮೊದಲ ವಿಕೆಟಿಗೆ ಕೇವಲ 13 ಓವರ್‌ಗಳಿಂದ 100 ರನ್‌ ಪೇರಿಸುವಲ್ಲಿ ಯಶಸ್ವಿಯಾದರು.

ಮಧ್ಯಮ ಕ್ರಮಾಂಕದಲ್ಲಿ ಇದೇ ಜೋಶ್‌ ಕಾಯ್ದುಕೊಳ್ಳಲು ಭಾರತ ದಿಂದ ಸಾಧ್ಯವಾಗಲಿಲ್ಲ. ಯಾಸ್ತಿಕಾ ಭಾಟಿಯಾ (19), ನಾಯಕಿ ಮಿಥಾಲಿ ರಾಜ್‌ (23), ಹರ್ಮನ್‌ಪ್ರೀತ್‌ ಕೌರ್‌ (13) ದೊಡ್ಡ ಮೊತ್ತ ಪೇರಿಸಲು ವಿಫ‌ಲರಾದರು. ಆದರೆ ಕೊನೆಯಲ್ಲಿ ದೀಪ್ತಿ ಶರ್ಮ ಸಿಡಿದು ನಿಂತ ಪರಿಣಾಮ ಸವಾಲಿನ ಮೊತ್ತ ಸಾಧ್ಯವಾಯಿತು.

ದೀಪ್ತಿ ಶರ್ಮ ಎಸೆತಕ್ಕೊಂದರಂತೆ 69 ರನ್‌ ಬಾರಿಸಿದರು (7 ಬೌಂಡರಿ, 1 ಸಿಕ್ಸರ್‌). ಓಪನರ್‌ ಮೇಘನಾ ಅವರ 61 ರನ್‌ 41 ಎಸೆತಗಳಿಂದ ಬಂತು (9 ಬೌಂಡರಿ, 2 ಸಿಕ್ಸರ್‌). ಶಫಾಲಿ 57 ಎಸೆತ ನಿಭಾಯಿಸಿ 51 ರನ್‌ ಹೊಡೆದರು (7 ಫೋರ್‌).

ಆಘಾತ ನೀಡಿದ ಜೂಲನ್‌
ಕಿವೀಸ್‌ಗೆ ಜೂಲನ್‌ ಗೋಸ್ವಾಮಿ ಬಲವಾದ ಆಘಾತವಿಕ್ಕಿದರು. 14 ರನ್‌ ಆಗುವಷ್ಟರಲ್ಲಿ ಓಪನರ್‌ಗಳಾದ ಸೋಫಿ ಡಿವೈನ್‌ (0) ಮತ್ತು ಸುಝೀ ಬೇಟ್ಸ್‌ (5) ವಿಕೆಟ್‌ ಉಡಾಯಿಸಿದರು. ಆದರೆ ಅನಂತರ ಬಂದವರೆಲ್ಲ ಕ್ರೀಸ್‌ ಆಕ್ರಮಿಸಿಕೊಳ್ಳು ವುದರೊಂದಿಗೆ ಭಾರತದ ಮೊದಲ ಗೆಲುವಿನ ಕನಸು ಛಿದ್ರಗೊಂಡಿತು.

ಸಂಕ್ಷಿಪ್ತ ಸ್ಕೋರ್‌
ಭಾರತ-49.3 ಓವರ್‌ಗಳಲ್ಲಿ 279 (ದೀಪ್ತಿ ಶರ್ಮ ಔಟಾಗದೆ 69, ಮೇಘನಾ 61, ಶಫಾಲಿ ವರ್ಮ 51, ಮೈರ್‌ 42ಕ್ಕೆ 2, ರೋವ್‌ 52ಕ್ಕೆ 2).

ನ್ಯೂಜಿಲ್ಯಾಂಡ್‌-49.1 ಓವರ್‌ಗಳಲ್ಲಿ 7 ವಿಕೆಟಿಗೆ 280 (ಕೆರ್‌ 67, ಲಾರೆನ್‌ ಡೌನ್‌ ಔಟಾಗದೆ 64, ಆ್ಯಮಿ ಸ್ಯಾಟರ್‌ವೈಟ್‌ 59, ಜೂಲನ್‌ ಗೋಸಾವಮಿ 47ಕ್ಕೆ 3).

ಪಂದ್ಯಶ್ರೇಷ್ಠ: ಲಾರೆನ್‌ ಡೌನ್‌