3ನೇ ಟೆಸ್ಟ್‌ ಪಂದ್ಯಕ್ಕೆ  ಮಾರ್ಕ್‌ ವುಡ್‌ ಇಲ್ಲ  

ಲೀಡ್ಸ್‌: ಬಲ ಭುಜದ ನೋವಿನಿಂದಾಗಿ ಇಂಗ್ಲೆಂಡ್‌ ವೇಗಿ ಮಾರ್ಕ್‌ ವುಡ್‌ ಭಾರತದೆದುರಿನ 3ನೇ ಟೆಸ್ಟ್‌ ಪಂದ್ಯದಿಂದ ಹೊರಗುಳಿಯಲಿದ್ದಾರೆ ಎಂದು ಇಸಿಬಿ ಪ್ರಕಟಿಸಿದೆ.

ಲಾರ್ಡ್ಸ್‌ ಟೆಸ್ಟ್‌ ಪಂದ್ಯದ 4ನೇ ದಿನದಾಟದಲ್ಲಿ ಬೌಂಡರಿ ತಡೆಯುವ ವೇಳೆ ವುಡ್‌ ಈ ಸಮಸ್ಯೆಗೆ ಸಿಲುಕಿದ್ದರು. ಆದರೆ ಅವರು ತಂಡದೊಂದಿಗೇ ಉಳಿಯುವುದರಿಂದ ಇಂಗ್ಲೆಂಡ್‌ ಬದಲಿ ಆಟಗಾರನನ್ನು ಹೆಸರಿಸಿಲ್ಲ.

ಇದರೊಂದಿಗೆ ಇಂಗ್ಲೆಂಡ್‌ ತಂಡದ ಗಾಯಾಳು ವೇಗಿಗಳ ಸಂಖ್ಯೆ 4ಕ್ಕೆ ಏರಿದೆ. ಸ್ಟುವರ್ಟ್‌ ಬ್ರಾಡ್‌, ಕ್ರಿಸ್‌ ವೋಕ್ಸ್‌, ಓಲೀ ಸ್ಟೋನ್‌ ಈ ಯಾದಿಯ ಇತರರು. ಜೋಫ್ರ ಆರ್ಚರ್‌ ಅವರಂತೂ ಗಾಯಾಳಾಗಿ ಕೆಲವು ತಿಂಗಳಿಂದ ದೂರವೇ ಉಳಿದಿದ್ದಾರೆ.