ಅಂಧರ ವಿಶ್ವಕಪ್‌ ಕ್ರಿಕೆಟ್‌  ಭಾರತ ಫೈನಲ್‌ ಪ್ರವೇಶ

ಅಜ್ಮಾನ್‌ (ಯುಎಇ): ಹಾಲಿ ಚಾಂಪಿಯನ್‌ ಭಾರತ ತಂಡ 5ನೇ ಅಂಧರ ಏಕದಿನ ವಿಶ್ವಕಪ್‌ ಕ್ರಿಕೆಟ್‌ ಕೂಟದ ಫೈನಲ್‌ ಪ್ರವೇಶಿಸಿದೆ. ಬುಧವಾರ ನಡೆದ ಸೆಮಿಫೈನಲ್‌ ಪಂದ್ಯದಲ್ಲಿ ಭಾರತ 7 ವಿಕೆಟ್‌ಗಳ ಅಂತರದಿಂದ ಬಾಂಗ್ಲಾದೇಶವನ್ನು ಮಣಿಸಿತು. ಜ. 20ರಂದು ನಡೆಯಲಿರುವ ಫೈನಲ್‌ನಲ್ಲಿ ಭಾರತವು ಪಾಕಿಸ್ಥಾನ ತಂಡವನ್ನು ಎದುರಿಸಲಿದೆ. ಈ ಪಂದ್ಯ ಶಾರ್ಜಾದಲ್ಲಿ ನಡೆಯಲಿದೆ.

ಟಾಸ್‌ ಗೆದ್ದು ಮೊದಲು ಬ್ಯಾಟಿಂಗ್‌ ಮಾಡಿದ ಬಾಂಗ್ಲಾದೇಶ 38.5 ಓವರ್‌ಗಳಲ್ಲಿ 256 ರನ್‌ ಗಳಿಸಿ ಆಲೌಟಾಯಿತು. ಬಾಂಗ್ಲಾ ಪರ ಅಬ್ದುಲ್‌ ಮಲಿಕ್‌ 108 ರನ್‌ ಬಾರಿಸಿದರು. ಭಾರತದ ಪರ ದುರ್ಗಾ ರಾಬವ್‌ 3 ವಿಕೆಟ್‌ ಪಡೆದರು.
ಭಾರತ ಗಣೇಶ್‌ಭಾಯಿ ಮಧುಕರ್‌ ಅವರ 112 ರನ್‌ ನೆರವಿನಿಂದ (69 ಎಸೆತ) ಸುಲಭ ಜಯ ಸಾಧಿಸಿತು. ಮಧುಕರ್‌ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಪಾತ್ರರಾದರು.