ಮೆಗಾ ಡೀಲ್‌ನಿಂದ ಸೇನೆಗೆ ಮಹಾಬಲ

ಹೊಸದಿಲ್ಲಿ: ಭಾರತೀಯ ಸೇನಾ ಶಕ್ತಿಯನ್ನು ಅಗಾಧವಾಗಿ ಬೆಳೆಸಲು ಕಟಿಬದ್ಧವಾಗಿರುವ ಕೇಂದ್ರ ಸರಕಾರದ ಆಶಯದಂತೆ ಭಾರ ತೀಯ ವಾಯುಪಡೆ ವಿಶ್ವದಲ್ಲೇ ಅತೀ ದೊಡ್ಡ ಸೇನಾ ಡೀಲ್‌ ಎಂದೇ ಬಣ್ಣಿಸಲ್ಪಟ್ಟಿರುವ ಮಹಾ ಖರೀದಿಯೊಂದಕ್ಕೆ ಮುಂದಾಗಿದೆ. ಅಂದಾಜು 97,400 ಕೋ. ರೂ. ವೆಚ್ಚದಲ್ಲಿ 110 ಫೈಟರ್‌ ಜೆಟ್‌ ಖರೀದಿ ಪ್ರಕ್ರಿಯೆಗೆ ಚಾಲನೆ ನೀಡಲಾಗಿದೆ. ಯುದ್ಧ ವಿಮಾನಗಳ ಪೂರೈಕೆಗೆ IAF ‘ಆರಂಭಿಕ ಟೆಂಡರ್‌’ (ರಿಕ್ವೆಸ್ಟ್‌ ಫಾರ್‌ ಇನ್ ಫಾರ್ಮೇಷನ್‌-ಆರ್‌ಎಫ್ಐ) ಕರೆದಿದೆ.

ಈ ಟೆಂಡರ್‌ ಗೆಲ್ಲಲಿರುವ ವಿಶ್ವದ ಯಾವುದೇ ಯುದ್ಧ ವಿಮಾನ ತಯಾರಿಕಾ ಕಂಪೆನಿ ಭಾರತದಲ್ಲೇ ವಾಯುಪಡೆಗೆ ಬೇಕಾದ ಎಲ್ಲ ವಿಮಾನಗಳನ್ನೂ ತಯಾರಿಸಬೇಕಿದ್ದು, ಲಕ್ಷಾಂತರ ಕೋಟಿ ರೂ. ಮೌಲ್ಯದ ಈ ಒಪ್ಪಂದ ಪ್ರಧಾನಿ ಮೋದಿ ಆಶಯದ ‘ಮೇಕ್‌ ಇನ್‌ ಇಂಡಿಯಾ’ಕ್ಕೆ ಮತ್ತಷ್ಟು ಶಕ್ತಿ ತುಂಬಲಿದೆ. ಅಲ್ಲದೆ, ಹೊಸ ವಿಮಾನಗಳ ಸೇರ್ಪಡೆಯಿಂದ ಸೇವಾವಧಿ ಮುಗಿದಿರುವ ‘ಮಿಗ್‌’ನಂಥ ಯುದ್ಧ ವಿಮಾನಗಳನ್ನು ನೇಪಥ್ಯಕ್ಕೆ ಸರಿಸುವ ಉದ್ದೇಶವನ್ನು ವಾಯುಪಡೆ ಹೊಂದಿದೆ.

ಯಾರಿದ್ದಾರೆ ಪೈಪೋಟಿಯಲ್ಲಿ?: ವಿಶ್ವದಲ್ಲಿ ಯುದ್ಧ ವಿಮಾನಗಳನ್ನು ತಯಾರಿಸುವ ಪ್ರತಿಷ್ಠಿತ ಕಂಪೆನಿಗಳಾದ ಲಾಕಿØàಡ್‌ ಮಾರ್ಟಿನ್‌, ಬೋಯಿಂಗ್‌, ಸಾಬ್‌ ಹಾಗೂ ಡಸ್ಸಾಲ್ಟ್ ಸಂಸ್ಥೆಗಳು ಭಾರತೀಯ ವಾಯುಪಡೆಯ ಟೆಂಡರ್‌ ಗೆಲ್ಲಲು ಉತ್ಸುಕವಾಗಿವೆ. ಟೆಂಡರ್‌ ಗೆಲ್ಲುವಲ್ಲಿ ಸಫ‌ಲವಾಗುವ ಕಂಪೆನಿ 110 ಯುದ್ಧ ವಿಮಾನಗಳಲ್ಲಿ ಶೇ. 85 ಸಿಂಗಲ್‌ ಸೀಟರ್‌,  ಇನ್ನುಳಿದ ವಿಮಾನಗಳನ್ನು ಡಬಲ್‌ ಸೀಟರ್‌ ಮಾದರಿಯಲ್ಲಿ ನಿರ್ಮಿಸಬೇಕಾಗುತ್ತದೆ.

2007ರಲ್ಲೇ ಪ್ರಕ್ರಿಯೆ ಶುರು: 2007ರಿಂದಲೇ ಭಾರತ ಸರಕಾರ ಯುದ್ಧ ವಿಮಾನಗಳನ್ನು ಖರೀದಿ ಸುವ ಪ್ರಕ್ರಿಯೆಗೆ ಚಾಲನೆ ನೀಡಿತ್ತು. ಆಗ ಡಸ್ಸಾಲ್ಟ್ ಏವಿಯೇಷನ್‌ ಸಂಸ್ಥೆಯಿಂದ 126 ರಾಫೆಲ್‌ ಜೆಟ್‌ ವಿಮಾನ ಖರೀದಿಸುವ 7,14,000 ಕೋಟಿ ರೂ. ಒಪ್ಪಂದಕ್ಕೆ ಭಾರತ ಸರಕಾರ ಸಹಿ ಹಾಕಿತ್ತು. ಆದರೆ ಹಾಲಿ ಎನ್‌ಡಿಎ ಸರಕಾರ ಆ ಒಪ್ಪಂದವನ್ನು 2015ರಲ್ಲಿ ರದ್ದುಗೊಳಿಸಿತು. ಅಲ್ಲದೆ, 2016ರಲ್ಲಿ ಫ್ರೆಂಚ್‌ ಸರಕಾರದ ಜತೆ ಒಪ್ಪಂದ ಮಾಡಿಕೊಂಡು 36 ರಾಫೆಲ್‌ ಜೆಟ್‌ ವಿಮಾನಗಳನ್ನು ಪ್ರತ್ಯೇಕವಾಗಿ ಖರೀದಿಸಲು ನಿರ್ಧರಿಸಿತ್ತು.