ಬೆಂಗಳೂರು: ಐಸಿಸಿ ಏಕದಿನ ಕ್ರಿಕೆಟ್ ವಿಶ್ವಕಪ್ 2023ರ ಕೂಟದ ಲೀಗ್ ಹಂತದ ಎಲ್ಲಾ ಒಂಬತ್ತು ಪಂದ್ಯಗಳಲ್ಲಿ ಗೆಲುವು ಸಾಧಿಸಿರುವ ಟೀಂ ಇಂಡಿಯಾ ಅಗ್ರಸ್ಥಾನಿಯಾಗಿ ಉಪಾಂತ್ಯ ಹಂತಕ್ಕೆ ಲಗ್ಗೆಯಿಟ್ಟಿದೆ. ರವಿವಾರ ಬೆಂಗಳೂರಿನಲ್ಲಿ ನಡೆದ ಅಂತಿಮ ಲೀಗ್ ಪಂದ್ಯದಲ್ಲಿ ನೆದರ್ಲ್ಯಾಂಡ್ ವಿರುದ್ಧ ರೋಹಿತ್ ಶರ್ಮಾ ನಾಯಕತ್ವದ ತಂಡವು ಸುಲಭ ಗೆಲುವು ಸಾಧಿಸಿದೆ.
ಸೆಮಿ ಫೈನಲ್ ನಲ್ಲಿ ಭಾರತ ತಂಡವು ನ್ಯೂಜಿಲ್ಯಾಂಡ್ ತಂಡವನ್ನು ಎದುರಿಸಲಿದೆ. ಸೆಮಿ ಫೈನಲ್ ಒತ್ತಡದ ಬಗ್ಗೆ ಮಾತನಾಡಿದ ಕೋಚ್ ರಾಹುಲ್ ದ್ರಾವಿಡ್, ಅನುಭವಿ ಭಾರತ ತಂಡವು ಒತ್ತಡ ನಿಭಾಯಿಸಲಿದೆ ಎಂದಿದ್ದಾರೆ.
“ಸೆಮಿ ಫೈನಲ್ ಪಂದ್ಯವನ್ನು ಮತ್ತೊಂದು ಸಾಮಾನ್ಯ ಪಂದ್ಯದಂತೆ ನೋಡುವುದು ಸರಿಯಾಗಲಾರದು. ಅದು ಸೆಮಿ ಫೈನಲ್. ಆದರೆ ನಮ್ಮ ಕಾರ್ಯಗಳಲ್ಲಿ ಹೆಚ್ಚಿನ ಬದಲಾವಣೆಯಾಗದು. ಇದು ಮಹತ್ವದ ಪಂದ್ಯವೆಂದು ನಾವು ಗುರುತಿಸುತ್ತೇವೆ; ಇದು ನಾಕೌಟ್ ಪಂದ್ಯ. ಒಂದು ನಿರ್ದಿಷ್ಟ ಪ್ರಮಾಣದ ಒತ್ತಡ ಇರುತ್ತದೆ ಎಂಬ ಸತ್ಯವನ್ನು ನಾವು ಒಪ್ಪಿಕೊಳ್ಳಬೇಕು” ಎಂದು ರಾಹುಲ್ ದ್ರಾವಿಡ್ ಹೇಳಿದರು.
“ಇದುವರೆಗೆ ನಾವು ಒತ್ತಡವನ್ನು ನಿಭಾಯಿಸಿದ ರೀತಿಯಿಂದ ನಮಗೆ ವಿಶ್ವಾಸ ಬಂದಿದೆ. ನಾವು ಸಿದ್ದತೆ ನಡೆಸುವ ಅಥವಾ ತರಬೇತಿಯಲ್ಲಿ ಯಾವುದೇ ಬದಲಾವಣೆ ಮಾಡಿಕೊಳ್ಳುತ್ತಿಲ್ಲ. ನಾವು ಆತ್ಮವಿಶ್ವಾಸದಿಂದ ಇದ್ದೇವೆ. ಗುಂಪಿನಲ್ಲಿನ ವೈಬ್ ಮತ್ತು ತಂಡದಲ್ಲಿನ ಎನರ್ಜಿ ಉತ್ತಮವಾಗಿದೆ. ಉತ್ತಮವಾಗಿ ಯೋಜನೆ ಹಾಕಿ, ಉತ್ತಮ ತರಬೇತಿ ನಡೆಸಿ ಮತ್ತು ಉತ್ತಮ ಕ್ರಿಕೆಟ್ ಆಡಿ” ಎಂದು ದ್ರಾವಿಡ್ ಹೇಳಿದರು.
