‘ಇಂಡಿಯಾ’ ಒಕ್ಕೂಟ ನಾಯಕತ್ವ: ಮಮತಾಗೆ ಹೆಚ್ಚಿದ ಬೆಂಬಲ

ನವದೆಹಲಿ: ಇಂಡಿಯಾ ಮೈತ್ರಿಕೂಟದೊಳಕ್ಕೆ ಉದ್ಭವಿಸಿರುವ ನಾಯಕತ್ವದ ಬಿಕ್ಕಟ್ಟು ಇನ್ನಷ್ಟು ತೀವ್ರವಾಗಿದೆ. ಮೈತ್ರಿಕೂಟಕ್ಕೆ ಪಶ್ಚಿಮ ಬಂಗಾಳ ಸಿಎಂ, ಟಿಎಂಸಿ ನಾಯಕಿ ಮಮತಾ ಬ್ಯಾನರ್ಜಿ ನಾಯಕತ್ವ ವಹಿಸಬೇಕೆಂಬ ಕೂಗಿಗೆ ಈಗ ಆರ್‌ಜೆಡಿ ನಾಯಕ ಲಾಲು ಪ್ರಸಾದ್‌ ಯಾದವ್‌ ಕೂಡ ದನಿಗೂಡಿಸಿದ್ದಾರೆ. ಕಾಂಗ್ರೆಸ್‌ ನಾಯಕರು ಪ್ರತಿಷ್ಠೆ ತ್ಯಜಿಸಿ, ಮಮತಾರನ್ನು ಬೆಂಬಲಿಸಬೇಕು. ನಾವು ಅವರನ್ನು ಬೆಂಬಲಿಸುತ್ತೇವೆ. ಕಾಂಗ್ರೆಸ್‌ ಆಕ್ಷೇಪ ನಮಗೆ ಮುಖ್ಯವಲ್ಲ’ ಎಂದು ಹೇಳಿದ್ದಾರೆ. ಲಾಲು ಹೇಳಿಕೆಗೆ ಆಕ್ಷೇಪಿಸಿದ ಕಾಂಗ್ರೆಸ್‌ ಪಶ್ಚಿಮ ಬಂಗಾಳ ಹೊರತುಪಡಿಸಿ ಟಿಎಂಸಿ ಅಸ್ತಿತ್ವವೆಲ್ಲಿದೆ ಎಂದು ಪ್ರಶ್ನಿಸಿದೆ.

ನಾಯಕತ್ವ ಪ್ರಶ್ನಾರ್ಹ:
ಉದ್ಧವ್‌ ಠಾಕ್ರೆ ನೇತೃತ್ವದ ಶಿವಸೇನೆ ಬಣದ ನಾಯಕ ಸಂಜಯ್‌ ರಾವತ್‌ ಮಾತನಾಡಿ ಕಾಂಗ್ರೆಸ್‌ಗಿಂತ ಹೊರತಾಗಿರುವ ಪಕ್ಷದ ನಾಯಕರು ಮೈತ್ರಿಕೂಟಕ್ಕೆ ನಾಯಕರಾಗುವುದಿದ್ದರೆ ಅದಕ್ಕೆ ನಮ್ಮ ಬೆಂಬಲ ಇದೆ. ಆ ಬಗ್ಗೆ ಚರ್ಚೆಗೆ ಸಿದ್ಧ. ಈಗಿನ ನಾಯಕತ್ವ ಪ್ರಶ್ನಾರ್ಹವಾಗಿದೆ’ ಎಂದಿದ್ದಾರೆ. ಮಹಾರಾಷ್ಟ್ರ ಚುನಾವಣೆಯಲ್ಲಿ ಎಂವಿಎ ಸೋಲಿನ ಬಳಿಕ ಇಂಡಿಯಾ ಮೈತ್ರಿಕೂಟಕ್ಕೆ ನಾಯಕಿಯಾಗುವ ಬಯಕೆಯನ್ನು ಮಮತಾ ವ್ಯಕ್ತಪಡಿಸಿದ್ದರು. ಆ ಬಳಿಕ ಮೈತ್ರಿಯೊಳಗೆ ಅವರಿಗೆ ಬೆಂಬಲ ಹೆಚ್ಚಾಗಿದೆ. ಮೊದಲು ಸಮಾಜವಾದಿ ಪಕ್ಷ, ಅನಂತರ ಶಿವಸೇನೆ (ಉದ್ಧವ್‌ ಬಣ), ಎನ್‌ಸಿಪಿ (ಶರದ್‌ ಪವಾರ್‌ ಬಣ) ಮಮತಾಗೆ ಬೆಂಬಲ ತೋರಿದ್ದವು. ಅಚ್ಚರಿಯೆಂದರೆ ಲೋಕಸಭಾ ಚುನಾವಣೆವರೆಗೆ ಬಿಜೆಪಿ ಗೆಳೆಯನಾಗಿಯೇ ಇದ್ದ ಜಗನ್‌ ಮೋಹನ್‌ ರೆಡ್ಡಿ ನಾಯಕತ್ವದ ವೈಎಸ್‌ಆರ್‌ಸಿಪಿ ಕೂಡ ಇಂಡಿಯಾ ಕೂಟ ಸೇರಿಕೊಂಡು, ಮಮತಾ ನಾಯಕತ್ವವನ್ನು ಬೆಂಬಲಿಸಿದ್ದಾರೆ.

ಇದನ್ನೂ ಓದಿ: Patna: ಕಣ್ಣು ತಂಪಾಗಿಸಲು ನಿತೀಶ್‌ ಮಹಿಳಾ ಸಂವಾದ ಯಾತ್ರೆ… ಲಾಲು ವಿವಾದ !