ಮೆಲ್ಬೋರ್ನ್ : ಭಾರತ-ಆಸೀಸ್‌ 2ನೇ ಟಿ-20 ಪಂದ್ಯ ಮಳೆಯಿಂದ ರದ್ದು

ಮೆಲ್ಬೋರ್ನ್ : ಇಲ್ಲಿನ ಎಂಸಿಜಿ ಕ್ರಿಕೆಟ್‌ ಮೈದಾನದಲ್ಲಿ ಇಂದು ಶುಕ್ರವಾರ ಆರಂಭಗೊಂಡ ಎರಡನೇ ಟಿ-20 ಪಂದ್ಯವನ್ನು ಮಳೆಯ ಕಾರಣ ರದ್ದು ಪಡಿಸಲಾಯಿತು.

ಮಳೆಯಿಂದಾಗಿ ಪಂದ್ಯ ನಿಂತ ಹೊತ್ತಿಗೆ ಆತಿಥೇಯ ಆಸ್ಟ್ರೇಲಿಯ 19 ಓವರ್‌ಗಳಲ್ಲಿ  ಏಳು ವಿಕೆಟ್‌ ನಷ್ಟಕ್ಕೆ  132 ರನ್‌ ಕಲೆ ಹಾಕಿತ್ತು. 

ಅದಾಗಿ ಭಾರತಕ್ಕೆ 19 ಓವರ್‌ಗಳಲ್ಲಿ 137 ರನ್‌ ತೆಗೆಯುವ ಗುರಿಯನ್ನು ನಿಗದಿಸಲಾಯಿತು. ಸ್ವಲ್ಪ ಹೊತ್ತಿನ ಬಳಿಕ ಈ ಗುರಿಯನ್ನು ಬದಲಾಯಿಸಲಾಗಿ 11 ಓವರ್‌ಗಳಲ್ಲಿ 90 ರನ್‌ ತೆಗೆಯುವ ಹೊಸ ಗುರಿಯನ್ನು ನಿಗದಿಸಲಾಯಿತು. ಆದರೆ ಮಳೆ ಮುಂದುವರಿದ ಕಾರಣ ಆಟ ಅಸಾಧ್ಯವೆಂದು ಪರಿಗಣಿಸಲಾಗಿ ಪಂದ್ಯವನ್ನು ರದ್ದು ಪಡಿಸಲಾಯಿತು.

ಮೂರು ಪಂದ್ಯಗಳ ಈ ಟಿ-20 ಸರಣಿಯಲ್ಲಿ ಆಸ್ಟ್ರೇಲಿಯ 1-0 ಮುನ್ನಡೆಯಲ್ಲಿದೆ. ಇದೇ ಭಾನುವಾರ ಸರಣಿ ನಿರ್ಣಾಯಕ ಮೂರನೇ ಹಾಗೂ ಅಂತಿಮ ಟಿ-20 ಪಂದ್ಯ ಸಿಡ್ನಿ ಕ್ರಿಕೆಟ್‌ ಗ್ರೌಂಡ್‌ ನಲ್ಲಿ ನಡೆಯಲಿದೆ.