Bengaluru: ಯುವತಿ ಜೊತೆ ಅಸಭ್ಯ ವರ್ತನೆ: ಮ್ಯಾನೇಜರ್‌, ಮತ್ತಿಬ್ಬರ ಮೇಲೆ ಕೇಸ್‌

ಬೆಂಗಳೂರು: ಹೊಸ ವರ್ಷದ ಸಂಭ್ರಮಾಚರಣೆ ದಿನ ಕಂಪನಿಯೊಂದರ ಸಿಗರೆಟ್‌ ಪ್ರಮೋಷನ್‌ ಮಾಡುತ್ತಿದ್ದ ಯುವತಿಗೆ ಬಲವಂತವಾಗಿ ಮದ್ಯ ಕುಡಿಸಿ ಲೈಂಗಿಕ ದೌರ್ಜನ್ಯ ಎಸಗಿದ ಆರೋಪದಡಿ ಖಾಸಗಿ ಕಂಪನಿಯ ಎಂಡಿ ಸೇರಿ ಮೂವರ ವಿರುದ್ಧ ಅಶೋಕನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

22 ವರ್ಷದ ಸಂತ್ರಸ್ತೆ ನೀಡಿದ ದೂರಿನ ಮೇರೆಗೆ ಖಾಸಗಿ ಕಂಪನಿ ಮ್ಯಾನೇಜರ್‌ ಹೇಮಂತ್‌, ಸಹೋದ್ಯೋಗಿಗಳಾದ ಪುನೀತ್‌ ಹಾಗೂ ಅಜಿತ್‌ ಎಂಬವರ ವಿರುದ್ಧ ಎಫ್ಐಆರ್‌ ದಾಖಲಾಗಿದೆ.

6 ತಿಂಗಳಿಂದ ಸಂತ್ರಸ್ತೆ ಖಾಸಗಿ ಕಂಪನಿಯೊಂದರಲ್ಲಿ ಸಿಗರೇಟ್‌ ಪ್ರಮೋಷನ್‌ ವಿಭಾಗದಲ್ಲಿ ಕೆಲಸ ಮಾಡುತ್ತಿದ್ದರು. ಕಂಪನಿಯ ಮ್ಯಾನೇಜರ್‌ ಹೇಮಂತ್‌ ಹಾಗೂ ಪುನೀತ್‌, ಅಜಿತ್‌ ಹಾಗೂ ಇತರರ ಜತೆ ಡಿ.31ರ ರಾತ್ರಿ ಬ್ರಿಗೇಡ್‌ ರಸ್ತೆಯ ಪಬ್‌ವೊಂದರಲ್ಲಿ ಮಾರಿ ಬ್ರೋ ಕಂಪನಿ ಪರವಾಗಿ ಸಿಗರೆಟ್‌ ಪ್ರಮೋಷನ್‌ ಮಾಡುತ್ತಿದ್ದರು. ಈ ವೇಳೆ ಮದ್ಯ ಕುಡಿಸಿ, ಸಂತ್ರಸ್ತೆಯನ್ನು ತಬ್ಬಿಕೊಂಡು ಅಸಭ್ಯವಾಗಿ ವರ್ತಿಸಿದ್ದರು. ಈ ಬಗ್ಗೆ ಸಂತ್ರಸ್ತೆ ಲೈಂಗಿಕ ದೌರ್ಜನ್ಯ ದೂರು ನೀಡಿದ್ದರು.