ಸೋಲಾರ್‌ ಕ್ಷೇತ್ರದ ಪಿಎಲ್‌ಐ ಹೆಚ್ಚಳ

ದೇಶೀಯವಾಗಿ ಸೋಲಾರ್‌ ಸೆಲ್‌ಗ‌ಳು, ಸೋಲಾರ್‌ ಮಾಡ್ಯೂಲ್‌ಗ‌ಳನ್ನು ಉತ್ಪಾದಿಸುವ ಕಂಪನಿಗಳಿಗೆ ಉತ್ಪಾದನಾ ಆಧಾರಿತ ಪ್ರೋತ್ಸಾಹ ಧನ (ಪಿಎಲ್‌ಐ) ನೀಡಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ.

ಇದಕ್ಕಾಗಿ ಮೀಸಲಿಡುವ ಅನುದಾನವನ್ನು 24,000 ಕೋಟಿ ರೂ.ಗಳಿಗೆ ಹೆಚ್ಚಿಸಲು ಬಜೆಟ್‌ನಲ್ಲಿ ತಿಳಿಸಲಾಗಿದೆ. ಸದ್ಯಕ್ಕೆ ಈ ಕ್ಷೇತ್ರದ ಪಿಎಲ್‌ಐ ಅನುದಾನ 4,500 ರೂ.ಗಳಷ್ಟಿದೆ. ಈಗ ಅನುದಾನ ಹೆಚ್ಚಳದಿಂದ ಮೇಕ್‌ ಇನ್‌ ಇಂಡಿಯಾ ಅಡಿಯಲ್ಲಿ ಸೋಲಾರ್‌ ಮೂಲಸೌಕರ್ಯ ಉತ್ಪಾದನೆಗೆ ಹೆಚ್ಚಿನ ಪ್ರೋತ್ಸಾಹ ಸಿಕ್ಕಂತಾಗುತ್ತದೆ.

“”2030ರ ಹೊತ್ತಿಗೆ ದೇಶವನ್ನು 280 ಗಿಗಾವ್ಯಾಟ್‌ ಸೋಲಾರ್‌ ವಿದ್ಯುತ್‌ ಉತ್ಪಾದನಾ ರಾಷ್ಟ್ರವನ್ನಾಗಿಸುವ ಗುರಿಯನ್ನು ಹೊಂದಲಾಗಿದೆ. ಈಗ, 4,500 ಕೋಟಿ ರೂ.ಗಳನ್ನು ಉತ್ಪಾದನಾ ಆಧಾರಿತ ಪ್ರೋತ್ಸಾಹ ಧನವನ್ನಾಗಿ (ಪಿಎಲ್‌ಐ) ನೀಡಲಾಗುತ್ತಿದೆ. ಇದಕ್ಕೆ 19,500 ಕೋಟಿ ರೂ.ಗಳನ್ನು ಹೆಚ್ಚುವರಿಯಾಗಿ ಮೀಸಲಿರಿಸಲಾಗುತ್ತದೆ. ಇದರಿಂದ, ಈ ಕ್ಷೇತ್ರದ ಬೆಳವಣಿಗೆಗೆ ಹೆಚ್ಚಿನ ಬೆಂಬಲ ನೀಡಲಾಗಿದೆ” ಎಂದು ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌, ತಮ್ಮ ಬಜೆಟ್‌ ಭಾಷಣದಲ್ಲಿ ತಿಳಿಸಿದ್ದಾರೆ.

2021ರ ಏ. 14ರಂದು ನಡೆದಿದ್ದ ಕೇಂದ್ರ ಸಂಪುಟ ಸಭೆಯಲ್ಲಿ ಸೋಲಾರ್‌ ಮೂಲಸೌಕರ್ಯ ಕ್ಷೇತ್ರದ ಕಂಪನಿಗಳಿಗೆ 4,500 ಕೋಟಿ ರೂ. ಪಿಎಲ್‌ಐ ಮೀಸಲಿರಿಸುವ ಪ್ರಸ್ತಾವನೆಗೆ ಕೇಂದ್ರ ಸಂಪುಟ ಒಪ್ಪಿಗೆ ನೀಡಿತ್ತು.