ಬೆಂಗಳೂರು: ತರಕಾರಿ ಕತ್ತರಿಸುವ ಚಾಕುವಿಗಾಗಿ ಶುರುವಾದ ಅಡುಗೆ ಭಟ್ಟರ ಜಗಳ ಕೊಲೆಯಲ್ಲಿ ಅಂತ್ಯ

ಬೆಂಗಳೂರು: ತರಕಾರಿ ಕತ್ತರಿಸುವ ಚಾಕಿಗಾಗಿ ಇಬ್ಬರು ಅಡುಗೆ ಭಟ್ಟರ ಜಗಳ ಒಬ್ಬನ ಕೊಲೆಯಲ್ಲಿ ಅಂತ್ಯವಾಗಿರುವ ಘಟನೆ ರಾಜರಾಜೇಶ್ವರಿನಗರ ಠಾಣೆ ವ್ಯಾಪ್ತಿಯಲ್ಲಿ ಸೋಮವಾರ ಮಧ್ಯಾಹ್ನ ನಡೆದಿದೆ.

ನೇಪಾಳ ಮೂಲದ ಮಿಲನ್‌ ಬರ್ಲಾಲ್‌ (25) ಕೊಲೆಯಾದವ. ಕೃತ್ಯ ಎಸಗಿದಆರ್ಯನ್‌ ಪುಷ್ಕರ್‌(20) ಎಂಬಾತನನ್ನು ಬಂಧಿಸಲಾಗಿದೆ.

ಮಿಲನ್‌ ಬರ್ಲಾಲ್‌ ಮತ್ತು ಆರ್ಯನ್‌ ಪುಷ್ಕರ್‌ ನೇಪಾಳ ಮೂಲದವರಾಗಿದ್ದು, ಆರ್‌.ಆರ್‌.ನಗರದಲ್ಲಿ ಆಂಧ್ರಸ್ಟೈಲ್‌ ಹೋಟೆಲ್‌ವೊಂದರಲ್ಲಿ ಅಡುಗೆ ಕೆಲಸ ಮಾಡುತ್ತಿದ್ದರು. ಹೀಗಾಗಿ ಹೋಟೆಲ್‌ನ ಕೊಠಡಿಯೊಂದರಲ್ಲಿ ವಾಸವಾಗಿದ್ದರು. ಸೋಮವಾರ ಎಂದಿನಂತೆ ಕೆಲಸಕ್ಕೆ ಬಂದಿದ್ದಾರೆ. ಈ ವೇಳೆ ಆರ್ಯನ್‌ ಪುಷ್ಕರ್‌ ತರಕಾರಿ ಕತ್ತರಿಸಲು ಬಳಸುತ್ತಿದ್ದ ಚಾಕು ಅನ್ನು ಮಿಲನ್‌ ಬರ್ಲಾಲ್‌ ತೆಗೆದುಕೊಂಡಿದ್ದಾನೆ. ಅದೇ ವಿಚಾರವಾಗಿ ಇಬ್ಬರ ನಡುವೆ ಜಗಳ ನಡೆದಿದೆ.

ಅದು ವಿಕೋಪಕ್ಕೆ ಹೋದಾಗ ಕೋಪಗೊಂಡ ಆರ್ಯನ್‌ ಅದೇ ಚಾಕು ಕಸಿದುಕೊಂಡು ಮಿಲನ್‌ ಬರ್ಲಾನ್‌ನ ಹೊಟ್ಟೆ ಹಾಗೂ ಬೇರೆ ಬೇರೆ ಭಾಗಕ್ಕೆ ಇರಿದಿದ್ದಾನೆ. ತೀವ್ರ ರಕ್ತಸ್ರಾವದಿಂದ ಮಿಲನ್‌ ಬರ್ಲಾನ್‌ ಸ್ಥಳ ದಲ್ಲೇ ಮೃತಪಟ್ಟಿದ್ದಾನೆ. ವಿಚಾರ ತಿಳಿದು ಸ್ಥಳಕ್ಕೆ ದೌಡಾಯಿಸಿದ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ.

ಆರ್‌.ಆರ್‌.ನಗರ ಠಾಣೆಯಲ್ಲಿ ಕೊಲೆ ಪ್ರಕರಣ ದಾಖಲಾಗಿದೆ.