ಇನ್ಮುಂದೆ ಕಾಲಿವುಡ್-ಬಾಲಿವುಡ್ ನಲ್ಲಿ ನೀನಾಸಂ ಸತೀಶ್‌: ಟ್ವೀಟ್

ಸತೀಶ್‌ ನೀನಾಸಂ ಅಭಿನಯದ “ಗೋಧ್ರಾ’ ಚಿತ್ರದ ಮೊದಲ ಹಂತದ ಚಿತ್ರೀಕರಣ ಕುಕ್ಕೆ ಸುಬ್ರಹ್ಮಣ್ಯ ಮುಂತಾದ ಕಡೆ ನಡೆದಿದೆ. ಸದ್ಯದಲ್ಲೇ ಅವರ ಇನ್ನೊಂದು ಚಿತ್ರ “ಅಯೋಗ್ಯ’ದ ಚಿತ್ರೀಕರಣ ಪ್ರಾರಂಭವಾಗಲಿದೆ. ಈ ಮಧ್ಯೆ ಸತೀಶ್‌ ಸದ್ಯದಲ್ಲೇ ತಮಿಳು ಮತ್ತು ಹಿಂದಿ ಚಿತ್ರಗಳಲ್ಲಿ ನಟಿಸುವುದಕ್ಕೆ ಸಜ್ಜಾಗಿದ್ದಾರೆ.

ಹೌದು, ಸತೀಶ್‌ ಸದ್ಯದಲ್ಲೇ ತಮಿಳು ಮತ್ತು ಹಿಂದಿ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದಾರಂತೆ. ಹಾಗಂತ ಅವರೇ ಟ್ವೀಟ್‌ ಮಾಡಿಕೊಂಡಿದ್ದಾರೆ. ಅಷ್ಟೇ ಅಲ್ಲ, ಪ್ರೇಕ್ಷಕರ ಬೆಂಬಲವನ್ನೂ ಕೋರಿದ್ದಾರೆ. ಈ ಕುರಿತು ಟ್ವೀಟ್‌ ಮಾಡಿರುವ ಅವರು, “ತಮಿಳು ಮತ್ತು ಹಿಂದಿ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದೇನೆ. ನೀವು ಕೊಟ್ಟ ನಿರಂತರ ಬೆಂಬಲ ಹೀಗೆ ಇರಲಿ. ಶೀಘ್ರದಲ್ಲಿ ಮೊದಲ ವಿನ್ಯಾಸ ಬಿಡುಗಡೆಯಾಗಲಿವೆ’ ಎಂದು ಬರೆದುಕೊಂಡಿದ್ದಾರೆ.

ಅಂದಹಾಗೆ, ಸತೀಶ್‌ ಅಭಿನಯದ ತಮಿಳು ಮತ್ತು ಹಿಂದಿ ಚಿತ್ರ ಯಾವುದು, ಯಾರು ನಿರ್ದೇಶಿಸುತ್ತಿದ್ದಾರೆ, ಯಾರು ನಿರ್ಮಿಸುತ್ತಿದ್ದಾರೆ, ಕಥೆ ಏನು, ಪಾತ್ರ ಏನು … ಮುಂತಾದ ಯಾವೊಂದು ವಿಷಯಗಳ ಬಗ್ಗೆಯೂ ಅವರು ರಹಸ್ಯವನ್ನು ಬಿಟ್ಟುಕೊಟ್ಟಿಲ್ಲ. ಸದ್ಯಕ್ಕೆ ತಮಿಳು ಮತ್ತು ಹಿಂದಿ ಚಿತ್ರಗಳಲ್ಲಿ ನಟಿಸುತ್ತಿರುವುದಾಗಿ ಹೇಳಿಕೊಂಡಿರುವ ಅವರು, ಸದ್ಯದಲ್ಲೇ ಎಲ್ಲವನ್ನೂ ಬಹಿರಂಗಪಡಿಸುವುದಾಗಿ ಹೇಳಿದ್ದಾರೆ.