ಬುದ್ಧಿ ಕಲಿಯದ ಪಾಕ್; ಪರಮಾಣು ಸಮಿತಿ ಜೊತೆ ಇಮ್ರಾನ್ ಖಾನ್ ಸಭೆ

ಇಸ್ಲಾಮಾಬಾದ್:ಭಾರತದ ಸೇನಾಪಡೆ ಗಡಿ ನಿಯಂತ್ರಣ ರೇಖೆ ದಾಳಿ ಏರ್ ಸ್ಟ್ರೈಕ್ ನಡೆಸಿದ ಬಳಿಕ ತಿರುಗೇಟು ನೀಡಲು ಹಾತೊರೆಯುತ್ತಿರುವ ಪಾಕಿಸ್ತಾನ ಪ್ರಧಾನಮಂತ್ರಿ ಇಮ್ರಾನ್ ಖಾನ್ ಬುಧವಾರ ನ್ಯಾಶನಲ್ ಕಮಾಂಡ್ ಆಥಾರಿಟಿಯ ವಿಶೇಷ ಸಭೆಯನ್ನು ಕರೆದಿದ್ದು, ಈ ಸಂದರ್ಭದಲ್ಲಿ ಪರಮಾಣು ಬಳಕೆ ಕುರಿತು ಚರ್ಚಿಸುವ ಸಾಧ್ಯತೆ ಇದೆ ಎಂದು ಮಾಧ್ಯಮದ ವರದಿ ತಿಳಿಸಿದೆ.

ಇಮ್ರಾನ್ ಖಾನ್ ಪರಮಾಣು ಸಮಿತಿ ಜೊತೆ ಮಧ್ಯಾಹ್ನ 1ಗಂಟೆಗೆ ಪ್ರಧಾನ ಮಂತ್ರಿ ಕಚೇರಿಯಲ್ಲಿ ಸಭೆ ನಡೆಸಲಿದ್ದಾರೆ ಎಂದು ಹೇಳಿದೆ. ಭಾರತೀಯ ವಾಯುಪಡೆ ಗಡಿ ನಿಯಂತ್ರಣ ರೇಖೆ ಉಲ್ಲಂಘಿಸಿ ದಾಳಿ ನಡೆಸಿರುವ ಬಗ್ಗೆ ಚರ್ಚೆ ನಡೆಸುವ ನಿಟ್ಟಿನಲ್ಲಿ ಖಾನ್ ಸೇನಾ ಕಮಾಂಡರ್ ಗಳ ಸಭೆ ಕೂಡಾ ಕರೆದಿರುವುದಾಗಿ ತಿಳಿಸಿದೆ.

ಸಭೆಯಲ್ಲಿ ಪಾಕ್ ಆರ್ಮಿ ಚೀಫ್ ಜನರಲ್ ಖ್ವಾಮರ್ ಜಾವೆದ್ ಬಾಜ್ವಾ, ವಾಯುಪಡೆ ಮುಖ್ಯಸ್ಥ ಮಾರ್ಷಲ್ ಮುಜಾಹಿದ್ ಅನ್ವರ್ ಖಾನ್, ನೌಕಾಪಡೆಯ ಅಡ್ಮಿರಲ್ ಝಾಫರ್ ಮಹಮೂದ್ ಅಬ್ಬಾಸಿ, ಭದ್ರತಾ ಪಡೆಯ ಅಧಿಕಾರಿಗಳು ಭಾಗಿಯಾಗಲಿದ್ದಾರೆ ಎಂದು ವರದಿ ವಿವರಿಸಿದೆ.

ಮಂಗಳವಾರ ಕೂಡಾ ಇಮ್ರಾನ್ ಖಾನ್ ತುರ್ತು ಸಭೆ ಕರೆದು ಚರ್ಚೆ ನಡೆಸಿದ್ದರು. ಅಲ್ಲದೇ ಭಾರತೀಯ ವಾಯುಪಡೆ ದಾಳಿ ನಡೆಸಿಲ್ಲ, ಅದೆಲ್ಲ ಸುಳ್ಳು ಎಂದು ಖಾನ್ ಹೇಳಿಕೆ ನೀಡಿದ್ದರು.